കമലഹാസന്‍ പിറന്നാള്‍ ആഘോഷം റദ്ദാക്കി
നടന്‍ കമലഹാസന്‍ തന്റെ 62-ാം പിറന്നാള്‍ ആഘോഷം റദ്ദാക്കി. ചെന്നൈയില്‍ അടുത്തിടെയുണ്ടായ കനത്ത മഴയേയും വെള്ളപ്പൊക്കത്തേയും തുടര്‍ന്നാണിത്. പിറന്നാള്‍ ആഘോഷത്തിന് പകരം കമലഹാസന്‍ രാവിലെ ചെന്നൈയില്‍ നിന്ന് 20 കിലോമീറ്റര്‍ അകലെയുള്ള ആവടിയില്‍ ആരാധകര്‍ സംഘടിപ്പിച്ചിരിക്കുന്ന മെഡിക്കല്‍ ക്യാന്പില്‍ പങ്കെടുക്കും. ഉച്ചയോടെ കമലഹാസന്‍ തന്റെ മൊബൈല്‍ ഫോണ്‍ ആപ്പ് പുറത്തിറക്കും. അപ്പോള്‍ രാഷ്ട്രീയ പ്രവേശനം സംബന്ധിച്ച് കമലഹാസന്‍ സംസാരിക്കുമെന്ന് അദ്ദേഹത്തിന്റെ വക്താവ് പറഞ്ഞു.
തയ്യാറായിരിക്കൂ, എല്ലാം നവംബര്‍ ഏഴിന് പറയും' എന്നായിരുന്നു പ്രമുഖ തമിഴ് മാഗസിനായ ആനന്ദവികടനില്‍ താന്‍ കൈകാര്യം ചെയ്യുന്ന കോളത്തില്‍ അദ്ദേഹം നേരത്തെ അറിയിച്ചിരുന്നത്.
തമിഴ്‌നാടിനെ സേവിക്കുക കര്‍ത്തവ്യമാണെന്ന് കരുതുന്നവരെ താന്‍ ക്ഷണിക്കുകയാണ്. ഒരു വലിയ സംഘം യുവാക്കള്‍ കാത്തിരിക്കുകയാണ്. അവരെ ഏകോപിപ്പിക്കാനുള്ള കര്‍ത്തവ്യം എന്റേതുകൂടിയാണ്. അവര്‍ക്കായി എല്ലാ കാര്യങ്ങളും നവംബര്‍ ഏഴിന് പറയും'' ലേഖനത്തില്‍ കമലഹാസന്‍ പറഞ്ഞു.
രാഷ്ട്രീയ അരങ്ങേറ്റം സംബന്ധിച്ച് വ്യക്തമായ സൂചനകള്‍ കഴിഞ്ഞ ജൂലായ് മുതല്‍ കമലഹാസന്‍ നല്‍കുന്നുണ്ട്. തമിഴ്‌നാട് സര്‍ക്കാരിനും കേന്ദ്രത്തിനുമെതിരെ പല വിഷയങ്ങളിലും കമല്‍ നിലപാട് വ്യക്തമാക്കുകയും ചെയ്തിട്ടുണ്ട്. കഴിഞ്ഞ മാസം ഡല്‍ഹി മുഖ്യമന്ത്രി അരവിന്ദ് കേജ്‌രിവാളുമായും കേരള മുഖ്യമന്ത്രി പിണറായി വിജയനുമായും താരം കൂടിക്കാഴ്ച നടത്തിയിരുന്നു.
https://www.facebook.com/Malayalivartha
