വാടകച്ചീട്ട് വ്യാജമെന്ന് കണ്ടെത്തലോടെ അമലാപോള് കുടുക്കിലേക്ക്
അമലാ പോള് പുതുച്ചേരിയില് കാര് രജിസ്ട്രേഷന് നടത്തിയത് നിയമ വിരുദ്ധമായി തന്നെയെന്ന് മോട്ടോര് വാഹന വകുപ്പിന്റെ കണ്ടെത്തല്. പുതുച്ചേരിയില് നടി കാര് രജിസ്റ്റര് ചെയ്തിരിക്കുന്ന വിലാസം വ്യാജമാണെന്നാണ് മോട്ടോര് വാഹന വകുപ്പ് കണ്ടെത്തിയിരിക്കുന്നത്. ഇതോടെ താരം നിയമ നടപടികള് നേരിടേണ്ടി വന്നേക്കുമെന്നാണ് സൂചന.
അതേ സമയം തനിക്ക് നേരെ നടക്കുന്നത് കുപ്രചാരണമാണെന്ന് അമലപോള് നേരത്തെ പറഞ്ഞിരുന്നു. അധികൃതര് പോലും നിയമവിരുദ്ധമായി ഒന്നും കണ്ടിട്ടില്ലാത്ത കാര്യമാണ് തനിക്കെതിരെ പ്രചരിക്കുന്നതെന്ന് അമല ആരോപിച്ചു. ഇന്ത്യന് പൗരത്വമുള്ള തനിക്ക് രാജ്യത്ത് എവിടെ വേണമെങ്കിലും ജോലി എടുക്കാനും സ്വത്ത് സമ്പാദിക്കാനുമുള്ള അവകാശമുണ്ട്. കേരളത്തിലെ പണത്തിനുള്ള അതേ മൂല്യമാണ് ഇന്ത്യയിലെ മറ്റ് സ്ഥലങ്ങളിലുമുള്ളതെന്നും അമല വിശദീകരിക്കുന്നു. അന്യ ഭാഷാ ചിത്രങ്ങളില് അഭിനയിക്കുന്നതിന് വിമര്ശകരുടെ അനുവാദം വേണമോയെന്നും അമല പോസ്റ്റിലൂടെ പരിഹസിക്കുന്നു.
അതേസമയം, അമലയുടെ പ്രസ്താവനക്കെതിരെ രൂക്ഷവിമര്ശനമാണ് സമൂഹമാധ്യമങ്ങളില് ഉയരുന്നത്. വാഹന രജിസ്ട്രേഷന് സംബന്ധിച്ച അടിസ്ഥാന വിവരം പോലും അമലാ പോളിന് അറിയില്ലെന്ന് വിമര്ശകര് പറയുന്നു. ഇന്ത്യന് പൗരന് രാജ്യത്തെ നിയമങ്ങള് പാലിക്കാനുള്ള ബാധ്യതയുണ്ടെന്നും, എല്ലാ വര്ഷവും കോടികള് നികുതി അടയ്ക്കുന്നു എന്നത് നിയമലംഘനത്തിനുള്ള ലൈസന്സ് അല്ലെന്നുമാണ് മറ്റുചിലരുടെ അഭിപ്രായം.
അമല പോള് തന്റെ ബെന്സ് കാര് റജിസ്റ്റര് ചെയ്തിരിക്കുന്നത് നടിക്ക് ഒരു പരിചയവുമില്ലാത്ത ഒരു എന്ജിനിയറിങ് വിദ്യാര്ഥിയുടെ പേരിലാണെന്നും 20 ലക്ഷം രൂപയുടെ നികുതി വെട്ടിപ്പാണ് ഈ വകയില് അമല നടത്തിയിരിക്കുന്നതെന്നുമാണ് ആരോപണം. ആരോപണത്തെ ശരി വയ്ക്കുന്ന തെളിവുകള് ഉദ്യോഗസ്ഥര്ക്കും ലഭിച്ചെന്നും താരത്തിനെതിരെ നിയമനടപടിയുണ്ടാകുമെന്നുമാണ് സൂചന. 
ചെന്നൈയില് നിന്നും ഓഗസ്റ്റ് നാലിനാണ് ഒരു കോടി പന്ത്രണ്ട് ലക്ഷം രൂപ വില മതിക്കുന്ന എസ് ക്ലാസ് ബെന്സ് അമല വാങ്ങുന്നത്. ഓഗസ്റ്റ് ഒമ്പതിനു കാര് പോണ്ടിച്ചേരിയില് റജിസ്റ്റര് ചെയ്തു. പോണ്ടിച്ചേരിയിലെ നികുതി ആനുകൂല്യം മുതലാക്കി ഒന്നേകാല് ലക്ഷം രൂപ മാത്രം നികുതി നല്കിയാണ് കാര് റജിസ്ട്രേഷന് ചെയ്തത്. അതേസമയം ഈ കാര് ഇപ്പോള് ഓടുന്നത് കൊച്ചിയിലുമാണ്.
പോണ്ടിച്ചേരി തിലാസപ്പേട്ടിലെ സെന്റ് തെരേസാസ് സ്ട്രീറ്റിലെ വിലാസമാണ് അമല പോള് റജിസ്ട്രേഷനായി ഉപയോഗിച്ചിരിക്കുന്നത്. എന്നാല് അമലാ പോള് നല്കിയ വിലാസത്തില് താമസിക്കുന്നത് ഒരു എന്ജിനീയറിങ് വിദ്യാര്ത്ഥിയാണ്. ഇവര്ക്ക് അമല പോളിനെയോ കാര് റജിസ്ട്രേഷന് നടത്തിയതോ അറിയുക പോലുമില്ല. സംഭവത്തില് ഇങ്ങനെയൊരു പ്രതികരണവുമായി താരം എത്തിയത് കൂടുതല് ചര്ച്ചകള്ക്ക് വഴിവെച്ചിരിക്കുകയാണ്.
https://www.facebook.com/Malayalivartha
