മലയാള സിനിമ ചിത്രീകരണത്തിനിടയില്‍ തേനീച്ചയുടെ കുത്തേറ്റ് നടീനടന്‍മാരുള്‍പ്പെടെ സിനിമാ പ്രവര്‍ത്തകരായ 27 പേര്‍ക്ക് പരുക്കേറ്റു. കൊച്ചി ധനുഷ്‌കോടി ദേശീയ പാതയില്‍ ശാസ്താംമുകള്‍ പാറമടക്ക് സമീപമാണ് സംഭവം.

ഇന്നലെ രാവിലെ പത്തരയോടെയായിരുന്നു സംഭവം. ഗുരുതരമായി പരുക്കേറ്റ മൂന്ന് പേര്‍ കോലഞ്ചേരി മെഡിക്കല്‍ കോളജാശുപത്രിയില്‍ തീവ്രപരിചരണ വിഭാഗത്തില്‍ പ്രവേശിപ്പിച്ചു. അസിസ്റ്റന്റ് ക്യാമറാമാന്‍ എറണാകുളം സ്വദേശി പ്രവീണ്‍(23), മേക്കപ്പ് മാന്‍ ആലുവ വെണ്ണിപ്പറമ്ബില്‍ മനോജ്(40), ഫോട്ടോഗ്രാഫര്‍ എറണാകുളം വാഴക്കാല സ്വദേശി ജോജി(48) എന്നിവരാണ് ആശുപത്രിയില്‍ ചികിത്സയിലുള്ളത്.

മറ്റുള്ളവരെ പ്രഥമ ചികിത്സക്ക് ശേഷം വിട്ടയച്ചു. മറ്റുള്ളവര്‍ ഓടി രക്ഷപ്പെട്ടതിനാല്‍ തേനീച്ചയുടെ കാര്യമായ കുത്തേറ്റില്ല. മലയാള സിനിമയുടെ ഷൂട്ടിങ് ലൊക്കേഷനിലായിരുന്നു സംഭവം. നായകന്റെ ചെറുപ്പകാലം ഷൂട്ട് ചെയ്യുന്നതിനിടെ ഹെലി ക്യാമിന്റെ ശബ്ദവും വെളിച്ചവുമാണ് തേനീച്ചക്കൂട് ഇളകുവാന്‍ കാരണമെന്നാണ് നാട്ടുകാര്‍ പറയുന്നത്.

ദേശീയപാതയോട് ചേര്‍ന്നുള്ള പാറമടയില്‍ മൂന്നിടങ്ങളിലാണ് തേനീച്ചക്കൂട്ടം ഉള്ളത്. ഇത് യാത്രക്കാര്‍ക്ക് ഭീഷണിയാണെന്ന് പലതവണ അധികൃതരെ അറിയിച്ചെങ്കിലും അവഗണിക്കുകയായിരുന്നു.