എറണാകുളം മുളന്തുരുത്തിക്ക് സമീപം നടന്ന വാഹനാപകടത്തിൽ യുവനടി മേഘ മാത്യൂവിന് പരിക്കേറ്റു. മേഘ സഞ്ചരിച്ച കാർ മറ്റൊരു കാറുമായി ഇടിച്ച് തലകീഴായി മറിയുകയായിരുന്നു. ഇന്ന് രാവിലെ ഒൻപത് മണിക്കാണ് സംഭവം. എറണാകുളത്തെ താമസസ്ഥലത്ത് നിന്ന് സഹോദരന്റെ വിവാഹ നിശ്ചയത്തിൽ പങ്കെടുക്കുന്നതിനായി കോട്ടയത്തെ വീട്ടിലേക്ക് പോകുന്നതിനിടെയായിരുന്നു അപകടം.

കനത്ത മഴയത്ത് എതിരെ വന്ന വണ്ടിയുമായി കൂട്ടിയിടിച്ച് കാർ മറിയുകയായിരുന്നു. അപകടത്തിന് ശേഷം ഒരു മണിക്കൂറോളം കാർ തലകീഴായി തന്നെ റോഡരികിൽ കിടന്നു. കാറിനുള്ളിൽ കുടുങ്ങി കിടന്ന മേഘ മരിച്ചെന്ന് കരുതി ആരും ആശുപത്രിയിൽ എത്തിക്കാൻ തയ്യാറായില്ല. പിന്നീട് മേഘയെ തിരിച്ചറിഞ്ഞ ഒരു ഫോട്ടോഗ്രാഫറാണ് ആശുപത്രിയിൽ എത്തിച്ചത്. അതേസമയം, ഇടിച്ച കാർ നിർത്താതെ പോയി.

നിസാര പരിക്കായതിനെ തുടർന്ന് മേഘ ഇന്ന് വൈകീട്ട് പാലക്കാട് നടക്കുന്ന ദിലീഷ് പോത്തൻ-ഹരീഷ് പേരടി ടീമൊരുക്കുന്ന ലീയാൻസിന്റെ ഷൂട്ടിംഗ് സെറ്റിലേക്ക് മടങ്ങും. ഒരു മെക്സിക്കൻ അപാരത എന്ന ടോവിനോ തോമസ് ചിത്രത്തിലൂടെയാണ് മേഘ പ്രേക്ഷക ശ്രദ്ധ നേടിയത്. മോഹൻലാൽ നായകനായി എത്തുന്ന നീരാളി, ആസിഫ് അലി നായകനാകുന്ന മന്ദാരം തുടങ്ങിയവയാണ് മേഘയുടെ മറ്റ് ചിത്രങ്ങൾ.

വീഡിയോ കാണാം.....