ഒരുകാലത്ത് തെന്നിന്ത്യന്‍ സിനിമകളില്‍ നിറഞ്ഞു നിന്നിരുന്ന താരമായിരുന്നു ഷക്കീല. ഒരു നീണ്ട ഇടവേളയ്ക്ക് ശേഷം വീണ്ടും താരം സിനിമ മേഖലയില്‍ സജീവമാകുകയാണ്. തെലുങ്ക് ചിത്രമായ ശീലാവതി വാട്ട് ദ ഫക്ക് എന്ന ചിത്രത്തിലൂടെയാണ് താരത്തിന്റെ രണ്ടാം വരവ്. എന്നാല്‍ താരത്തിന്റെ പുതിയ ചിത്രത്തിനെതിരെ സെന്‍സര്‍ ബോര്‍ഡ് രംഗത്തെത്തിയിരിക്കുകയാണ്. ചിത്രത്തിന്റെ പേരാണ് ഇവിടെ പ്രശ്‌നമായിരിക്കുന്നത്. സിനിമയുടെ കഥയുമായി യോജിച്ച പേരല്ല നല്‍കിയിരിക്കുന്നതെന്നാണ് സെന്‍സര്‍ ബോര്‍ഡ് ചൂണ്ടിക്കാണിക്കുന്നത്.

സെന്‍സര്‍ ബോര്‍ഡിന്റെ നടപടിയില്‍ ഫേസ്ബുക്കിലൂടെയാണ് താരം തന്റെ പ്രതിഷേധം അറിയിച്ചത്. എന്തിന്റെ അടിസ്ഥാനത്തിലാണ് സെന്‍സര്‍ ബോര്‍ഡ് ഈ സിനിമയ്ക്ക് പേര് ചേരുന്നില്ല എന്നു പറയുന്നതെന്നും ഇവര്‍ ചോദിക്കുന്നുണ്ട്. സെന്‍സര്‍ ബോര്‍ഡ് അംഗങ്ങളുടെ ഈ തീരുമാനത്തിന്റെ അടിസ്ഥാനത്തെ കുറിച്ച് തനിയ്ക്ക് ഒരു പിടിയും കിട്ടുന്നില്ലെന്നും ഷക്കീല ഫേസ്ബുക്കില്‍ പറഞ്ഞു. കൂടാതെ ഇതൊരു ഷക്കീല ചിത്രമായതു കൊണ്ടാണോ അവര്‍ ഇത്തരത്തിലുള്ള ഒരു തീരുമാനം എടുത്തതെന്നും താരം ചോദിക്കുന്നുണ്ട്. സിനിമ കാണുക പോലും ചെയ്യാതെയാണ് അവര്‍ ഇങ്ങനെ പറയുന്നത്. ദയവ് ചെയ്ത് സെന്‍സര്‍ ബോര്‍ഡ് തങ്ങളുടെ തീരുമാനം പുനഃപരിശേധിക്കണമെന്നും ഷക്കീല പറയുന്നുണ്ട്.

ഒരു സൈക്കോ ത്രില്ലര്‍ ഗണത്തില്‍പ്പെടുന്ന ചിത്രമാണ് ശീലവതി വാട്ട് ദഫക്ക്. തെലുങ്കില്‍ ഒരുങ്ങുന്ന ചിത്രമാണെങ്കില്‍ സിനിമയ്ക്ക് കേരളവുമായി ബന്ധമുണ്ട്. കേരളത്തില്‍ നടന്ന സംഭവത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത് .

അതിനാല്‍ തന്നെ കേരളത്തിലെ പ്രേക്ഷകരും ആകാംക്ഷയോടെ കാത്തിരിക്കുന്ന ഒരു ചിത്രമാണിത്. ചിത്രത്തിന്റെ ഫസ്റ്റ് ലുക്ക് പോസ്റ്ററിനും ടീസറിനുമെല്ലാം മികച്ച ജനശ്രദ്ധയാണ് ലഭിച്ചത്. ഒരു ഹൊറര്‍ പശ്ചാത്തലത്തിലാണ് ടീസര്‍ നിര്‍മ്മിച്ചിരിക്കുന്നത്. നീണ്ട പത്തു വര്‍ഷത്തിനു ശേഷം വീണ്ടും സിനിമയില്‍ സജീവമാകാന്‍ തയ്യാറെടുക്കുകയാണ് താരം.