ബോളിവുഡ് സുന്ദരി പ്രിയങ്ക ചോപ്ര ഹോളിവുഡ് നടനും സൂഹൃത്തുമായ നിക് ജോനാസിനെയും കൂട്ടി ഇന്ത്യയില്‍ എത്തി. വ്യാഴാഴ്ച രാത്രി ഇരുവരും മുംബൈയില്‍ വിമാനമിറങ്ങിയതായാണ് വിവരം. പപ്പരാസികള്‍ ചിത്രങ്ങളെടുക്കാതിരിക്കാന്‍ മുഖം മറച്ച് മറ്റുള്ളവരുടെ കണ്ണില്‍ പെട്ടെന്ന് പെടാത്ത രീതിയിലാണത്രേ ഇരുവരും വിമാനമിറങ്ങി കാറില്‍ രക്ഷപ്പെട്ടത്. അമ്മ മധു ചോപ്രയെ നിക് ജോനാസിനു പരിചയപ്പെടുത്താനാണ് പ്രിയങ്ക ചോപ്ര നിക് ജോനാസുമായി ഇന്ത്യയിലേക്ക് വന്നത്.

നിക് ജോനാസിനെ അമ്മയ്ക്കു ഇഷ്ടപ്പെട്ടാല്‍ ജോനാസുമായുള്ള ബന്ധം ദൃഢമായി മുന്നോട്ടു കൊണ്ടുപോകാനാണ് പ്രിയങ്കയുടെ തീരുമാനം. ഇതോടൊപ്പം പ്രിയങ്കയുടെ പുതിയ വീടിന്റെ ഗൃഹപ്രവേശന ചടങ്ങും നടത്താന്‍ തീരുമാനിച്ചിട്ടുണ്ട്. ബോളിവുഡിലെ സിനിമാ സുഹൃത്തുക്കള്‍ ഉള്‍പ്പെടെ പങ്കെടുക്കുന്ന വലിയൊരു പാര്‍ട്ടിയാണ് പ്രിയങ്ക ഏര്‍പ്പാടാക്കുന്നത്. ഈ പാര്‍ട്ടിയില്‍ നിക് ജോനാസിനെ പ്രിയങ്ക പരിചയപ്പെടുത്തുമെന്നും പ്രതീക്ഷിക്കുന്നു.

അടുത്തിടെ നിക് ജോനാസിന്റെ കസിന്റെ വിവാഹത്തിനു ന്യൂ ജഴ്‌സിയില്‍ പ്രിയങ്ക നിക് ജോനാസിനോടൊപ്പം പോയത് വാര്‍ത്തയായിരുന്നു. ഇതോടൊപ്പം നിക് ജോനാസിന്റെ പഴയകാല കാമുകിയും ഓസ്‌ട്രേലിയന്‍ ഗായികയുമായി ഡെല്‍റ്റയും നിക് പ്രിയങ്കയുമായി പ്രണയത്തിലാണെന്ന വാദവുമായി രംഗത്തുവന്നിരുന്നു. താനും നിക്കും അഭിപ്രായ വ്യത്യാസത്തിന്റെ പേരില്‍ അല്പകാലം പിണങ്ങിയിരുന്നു.

ഈ പിണങ്ങിയ സമയത്താണ് പ്രിയങ്ക നിക്കിന്റെ മനസില്‍ ഇടം നേടിയതെന്നും ബോളിവുഡിലെ സൂപ്പര്‍സുന്ദരി പ്രിയങ്ക ചോപ്രയുമായി മത്സരിക്കാന്‍ തനിക്കു ശേഷിയില്ലെന്നും ഡെല്‍റ്റ വ്യക്തമാക്കിയിരുന്നു. നിക് ജോനാസുമായുള്ള ബന്ധം ശക്തമായ രീതിയില്‍ പ്രിയങ്ക മുന്നോട്ടു കൊണ്ടുപോകുകയാണ്. 35 വയസുള്ള പ്രിയങ്കയേക്കാള്‍ പത്തു വയസിന് ഇളയതാണ് നിക് ജോനാസ്.