ആരാധകർ ആകാംഷയോടെ കാത്തിരുന്ന സ്റ്റൈൽ മന്നൻ രജനീകാന്തിന്റെ ബ്രഹ്മാണ്ഡ ചിത്രം '2.0' യുടെ ടീസര്‍ ഇറങ്ങി. ശങ്കർ സംവിധാനം ചെയ്ത ചിത്രം 'യന്തിരന്‍' സിനിമയുടെ രണ്ടാം ഭാഗമാണ്. പൂര്‍ണമായും 3ഡി ഫോര്‍മാറ്റില്‍ ചിത്രീകരിക്കുന്ന ആദ്യ ഇന്ത്യന്‍ ചിത്രമായ '2.0' ല്‍ വിഎഫ്‌എക്സിന് വലിയ പ്രാധാന്യം നല്‍കിയിട്ടുണ്ട്. വിവിധ രാജ്യങ്ങളില്‍ നിന്നുള്ള 3000 ടെക്നിഷ്യന്‍മാര്‍ ചേര്‍ന്നൊരുക്കുന്ന വിഎഫ്‌എക്സ് വിസ്മയമാണ് '2.0' .

മൊബൈല്‍ ഫോണ്‍ റേഡിയേഷനിലൂടെ മ്യൂട്ടേഷന്‍ സംഭവിക്കുന്ന പക്ഷികളുടെ പരിണാമവും തുടര്‍ന്ന് ലോകത്തിന് ഭീഷണിയുയര്‍ത്തുന്ന അക്രമകാരികളായി അവ മാറുന്നതിനെയും കുറിച്ചാണ് സിനിമ. ഈ ലോകം മനുഷ്യര്‍ക്ക് മാത്രമുള്ളതല്ല എന്നര്‍ത്ഥം വരുന്ന ടാഗ്‌ലൈനാണ് ചിത്രം മുന്നോട്ടുവയ്ക്കുന്നത്.

രജനീകാന്ത് ഡബിള്‍ റോളിലെത്തുന്ന ചിത്രത്തില്‍ ബോളിവുഡ് താരം അക്ഷയ് കുമാര്‍ ആണ് വില്ലന്‍ വേഷത്തിലെത്തുന്നത്. ആമി ജാക്സണ്‍ ആണ് ചിത്രത്തിലെ നായിക. സുധാന്‍ഷു പാണ്ഡെ, ആദില്‍ ഹുസൈന്‍, മലയാളി താരങ്ങളായ റിയാസ് ഖാന്‍, കലാഭവന്‍ ഷാജോണ്‍ എന്നിവരും ചിത്രത്തില്‍ അഭിനയിക്കുന്നുണ്ട്. നീരവ് ഷാ ആണ് ക്യാമറ കൈകാര്യം ചെയ്യുന്നത്. എ.ആര്‍.റഹ്മാന്‍ സംഗീതം നിര്‍വ്വഹിക്കുന്നു. മുത്തുരാജ് ആണ് കലാസംവിധാനം. വിഷ്വല്‍ ഇഫക്റ്റ്സ് ശ്രീനിവാസ് മോഹനും റസൂല്‍ പൂക്കുട്ടി സൗണ്ട് ഡിസൈനിങ്ങും നിര്‍വ്വഹിക്കും. 543 കോടിയാണ് ചിത്രത്തിന്റെ മുതല്‍മുടക്ക്.

രജനീകാന്ത് റോബോട്ട് ആയ യന്തിരൻ ഇന്ത്യയാകെ വൻ വിജയമായിരുന്നു. അന്ന് തന്നെ ചിത്രത്തിന് രണ്ടാം ഭാഗം ഉണ്ടാകുമെന്ന് സംവിധായകൻ ശങ്കർ പറഞ്ഞിരുന്നു. നവംബര്‍ 29നാണ് ചിത്രം പ്രദര്‍ശനത്തിനെത്തുന്നത്. ലോകമെമ്ബാടുമുള്ള 10000 സ്ക്രീനുകളിലാണ് സിനിമ റിലീസ് ചെയ്യുന്നത്. തമിഴ്, തെലുങ്ക്, ഹിന്ദി ഭാഷകളില്‍ ചിത്രം ആദ്യദിനം തന്നെ തിയേറ്ററുകളിലെത്തും.