സായി പല്ലവി തമിഴ് നടൻ സൂര്യയുടെ നായികയാകുന്നു
പ്രേമം എന്ന മലയാളചിത്രത്തിലൂടെ നായികയായി സിനിമയിലെത്തിയ സായി പല്ലവി ടോളിവുഡിൽ അരങ്ങേറ്റം കുറിച്ചശേഷം തമിഴിൽ അരങ്ങേറ്റം കുറിക്കാനൊരുങ്ങുകയാണ്. എ.എൽ. വിജയുടെ കരു എന്ന ചിത്രത്തിലൂടെ തമിഴ് സിനിമാലോകത്തേയ്ക്ക് ചുവടുവയ്ക്കുന്നതോടൊപ്പം നടിപ്പിൻ നായകൻ സൂര്യയുടെ നായികയാകുകയാണ് സായി.
സെൽവരാഘവൻ ഒരുക്കുന്ന ചിത്രത്തിലാണ് സായി സൂര്യയുടെ നായികയായി എത്തുന്നതെന്നാണ് തമിഴ് സൈറ്റുകൾ റിപ്പോർട്ട് ചെയ്തിരിക്കുന്നത്. രണ്ട് നായികമാരുള്ള ചിത്രത്തിൽ രാകുൽ പ്രീത് സിംഗായിരിക്കും മറ്റൊരു കഥാപാത്രത്തെ അവതരിപ്പിക്കുക. ജനുവരി മൂന്നാം വാരത്തിൽ ഷൂട്ടിംഗ് ആരംഭിക്കുന്ന ചിത്രത്തിന് ഇനിയും പേരിട്ടിട്ടില്ല. 2018 ദീപാവലി ദിനത്തിൽ ചിത്രം തിയേറ്ററുകളിൽ എത്തിക്കാനാണ് ലക്ഷ്യമിടുന്നതെന്ന് നിർമ്മാതാവ് ആർ.എസ് പ്രഭു പറഞ്ഞു.
സായിയെ തേടി നിരവധി അവസരങ്ങൾ വരുന്നുണ്ടെങ്കിലും വളരെ സെലക്ടീവായി മാത്രമാണ് സായി സിനിമ തിരഞ്ഞെടുക്കുന്നത്. മണി രത്നം ചിത്രമായ കാട്രു വെളിയിടെ, വിക്രമിന്റെ ധ്രുവനച്ചത്തിരം തുടങ്ങിയ ചിത്രങ്ങളിൽ കരാറൊപ്പിട്ട ശേഷം പിൻമാറിയിട്ടുള്ള താരമാണ് സായി പല്ലവി. ഔദ്യോഗികമായി പ്രഖ്യാപിക്കാത്ത മറ്റൊരു ചിത്രത്തിലും നായികയായി സായി പല്ലവി എത്തുന്നുണ്ടെന്നാണ് റിപ്പോർട്ടുകൾ. ഹരീഷ് ശങ്കർ, നിഥിൻ, സർവ്വാനന്ദ് എന്നിവർ പ്രധാന കഥാപാത്രങ്ങളായി എത്തുന്ന സിനിമയിലാണ് സായി നായികയാകുന്നത്. നാനി നായകനാകുന്ന മിഡിൽ ക്ലാസ് അബ്ബായി എന്ന തെലുങ്ക് ചിത്രമാണ് സായിയുടേതായി റിലീസാകാനുള്ളത്.
https://www.facebook.com/Malayalivartha