തൃഷ തെന്നിന്ത്യയില്‍ തിളങ്ങി നില്‍ക്കാന്‍ തുടങ്ങിയിട്ട് ഒന്നരപ്പതിറ്റാണ്ട് കഴിഞ്ഞു. കഠിനാധ്വാനവും തന്നിലുള്ള വിശ്വാസവുമാണ് തന്റെ വിജയരഹസ്യമെന്ന് താരം പറയുന്നു. ഒരിടത്തും കാലിടറാതെയാണ് മുന്നോട്ട് പോകുന്നത്. മറ്റുള്ളവരെ ബഹുമാനിക്കുക എന്നത് പ്രധാനപ്പെട്ട കാര്യമാണെന്നും തൃഷ വിശ്വസിക്കുന്നു. ജീവിതത്തില്‍ ഏറ്റവും അത്യന്താപേക്ഷിതമായത് പ്രണയമാണ്. പ്രണയ സുഖം അനുഭവിച്ചാണ് ഓരോ ദിവസവും കടന്ന് പോകുന്നത.് നയന്‍താര കഴിഞ്ഞാല്‍ തമിഴകത്തെ മിന്നും നായികയാണ് തൃഷ. ആറിലധികം സിനിമകളിലാണ് തൃഷ ഇപ്പോള്‍ അഭിനയിക്കുന്നത്. തമിഴും തെലുങ്കും കടന്ന് ബോളിവുഡിലും താരം അഭിനയിച്ചു. 

കരിയര്‍ ഇങ്ങനെ പോകുന്നതില്‍ വലിയ സന്തോഷമുണ്ടെന്നും തൃഷ പറഞ്ഞു. പ്രേക്ഷകരോടും അവസരങ്ങള്‍ തന്നവരോടും വലിയ കടപ്പാടാണുള്ളത്. സിനിമയില്‍ പലപ്പോഴും നമ്മള്‍ വിചാരിക്കുന്നത് നടക്കണമെന്നില്ല. അങ്ങനെ നടക്കാതിരിക്കുന്നത് തന്റെ നന്‍മയ്ക്ക് വേണ്ടിയാണെന്ന് താരം ഉറച്ച് വിശ്വസിക്കുന്നു. നിശ്ചയിച്ചുറപ്പിച്ച വിവാഹം നടക്കാതിരുന്നതും അങ്ങനെയാണെന്നും താരം വിശ്വസിക്കുന്നു. തിരക്കേറിയ അഭിനയത്തിനൊപ്പം റിയല്‍ എസ്റ്റേറ്റ് ബിസിനസിലും താരം പണം മുടക്കുന്നുണ്ട്. ചെന്നെയിലും ബാംഗ്ലൂരിലും ഭൂമിയും വസ്തുവകകളും താരം വാങ്ങിക്കൂട്ടിയിട്ടുണ്ട്. പലപ്പോഴും ഇവ കൈമാറ്റം ചെയ്യുകയും പുതിയവ വാങ്ങുകയും ചെയ്യുന്നു. 

ഷൂട്ടിംഗിന്റെ ഇടവേളകളില്‍ താരം വിദേശങ്ങളിലേക്ക് പറക്കും. പതിനഞ്ച് വര്‍ഷത്തെ സിനിമാ ജീവിതത്തില്‍ പലതും നേടിയെടുത്തു. ഇപ്പോഴും നടക്കാത്ത ഒരു സ്വപ്‌നമുണ്ട്, രജനീകാന്തിനൊപ്പം അഭിനയിക്കണം. എന്നെങ്കിലും അത് സഫലമാകുമെന്ന വിശ്വാസത്തിലാണ് താരം. കമലാഹാസനൊപ്പം തൂങ്കാനഗരത്തില്‍ അഭിനയിച്ചിരുന്നു. ഇത്രയൊക്കെ സക്‌സസില്‍ എത്തിയിട്ടും തൃഷയെ ഭീതിപ്പെടുത്തുന്ന ഒരു കാര്യമുണ്ട്, പലപ്പോഴും അങ്ങനെ സംഭവിക്കില്ലെന്ന് മനസിനെ സമാധാനപ്പെടുത്താറുണ്ടെങ്കിലും അത് തന്നെ വേട്ടയാടുന്നെന്ന് തൃഷ പറയുന്നു. ജീവനോടെ തന്നെ സംസ്‌കരിക്കരുത്. അത് പക്ഷെ, പലപ്പോഴും സ്വപ്‌നത്തിലേക്ക് കടന്ന് വരുകയാണെന്ന് താരം വെളിപ്പെടുത്തി.