മലയോരപ്രദേശത്തിലെ കുളപ്പട എന്ന ഗ്രാമത്തില്‍ നിന്നും 'ഞാന്‍ കോടീശ്വരന്‍' എന്ന പരിപാടിയില്‍ പങ്കെടുക്കാനായി വണ്ടി കയറുമ്പോള്‍ സനൂജയ്‌ക്ക്‌ കൈമുതലായുണ്ടായത്‌ ശുഭാപ്‌തി വിശ്വാസം മാത്രം. മനസിലാരാധിക്കുന്ന സൂപ്പര്‍സ്റ്റാര്‍ സുരേഷ്‌ ഗോപിയെ ഒന്നു നേരിട്ട്‌ കാണാം, സംസാരിക്കാം. അത്‌ തന്നെ ഒരു വലിയ കാര്യമാണ്‌. ഒപ്പം അറിയാതെയൊന്ന്‌ പ്രാര്‍ത്ഥിച്ചു പോയി, ഈ പരിപാടികൊണ്ട്‌ ഭര്‍ത്താവിന്റെ കടങ്ങള്‍ക്ക്‌ ഒരു കൈ സഹായമാവുമെങ്കില്‍... കാരണം, അത്രയ്‌ക്ക്‌ കഷ്‌ടപ്പാടാണ്‌ ജീവിതം തള്ളിനീക്കാന്‍. ബുദ്ധിമുട്ടുകള്‍ നിറഞ്ഞ കുട്ടിക്കാലം. വിവാഹത്തോടെ അതിനൊരു മോചനം കിട്ടുമെന്നാഗ്രഹിച്ചെങ്കിലും പ്രാരാബ്‌ദ്ധങ്ങള്‍ കൂടിയതേ ഉള്ളൂ. പ്രണയവിവാഹമായിരുന്നു സനൂജയുടേത്‌. ഭര്‍ത്താവായ രാജന്‍ കൂലിപ്പണിക്കാരനാണ്‌. ഭര്‍ത്താവിന്റെ കഷ്‌ടപ്പാടുകള്‍ കണ്ട സനൂജ എങ്ങനേയും ഒരു സര്‍ക്കാര്‍ ജോലി നേടാനായി പരിശ്രമിച്ചു. അങ്ങനെ ഒരു സര്‍ക്കാര്‍ ജോലിയും നേടി. ഇപ്പോള്‍ തിരുവനന്തപുരം കളക്‌ട്രേറ്റിലെ ലാസ്റ്റ്‌ ഗ്രേഡ്‌ ജീവനക്കാരിയാണ്‌ സനൂജ. ഓരോന്നാലോചിച്ച്‌ ഏഷ്യാനെറ്റ്‌ എത്തിയതറിഞ്ഞില്ല. സ്റ്റുഡിയോയിലെത്തിയപ്പോള്‍ ആകെ അമ്പരപ്പായിരുന്നു. അറിവിന്റെ നിറകുടങ്ങളായ മത്സരാര്‍ത്ഥികളോടൊപ്പം ഒരു നാടന്‍ പെണ്ണ്‌. ശീതികരിച്ച സ്റ്റുഡിയോ ഫ്‌ളോറും ലൈറ്റും ക്യാമറയുമെല്ലാം കൗതുകമായി. എല്ലാ ഒരുക്കങ്ങളും കഴിഞ്ഞു. സിനിമയിലും ടിവിയിലും മാത്രം കണ്ടിട്ടുള്ള സൂപ്പര്‍സ്റ്റാര്‍ സുരേഷ്‌ ഗോപി ഇതാ കണ്‍മുന്നില്‍. ആകെ ടെന്‌ഷനായി.
'ഞാന്‍ കൊടീ......ശ്വരന്‍' എന്ന്‌ സുരേഷ്‌ഗോപി നീട്ടിപ്പറഞ്ഞതോടെ പരിപാടി തുടങ്ങി. 4 മത്സരാര്‍ത്ഥികളാണ്‌ ഈ ഘട്ടത്തില്‍ മത്സരിക്കുന്നത്‌. അവരില്‍ നാലാമത്തേതാണ്‌ സനൂജ. ഒന്നാമന്‍, രണ്ടാമന്‍, മൂന്നാമന്‍... ഇനി ഊഴം തന്റേതാണ്‌. സുരേഷ്‌ ഗോപി ഉറക്കെപ്പറഞ്ഞു മിസിസ്‌ സനൂജ...  മാനസിക സമ്മര്‍ദ്ധത്താല്‍ ആകെ വട്ടം ചുറ്റി. താന്‍ ഹോട്ട്‌ സീറ്റിലേക്ക്‌. ലോകം മുഴുവന്‍ തന്നിലേക്ക്‌. മലയാളം, പുരാണം, ഖുറാന്‍, ചരിത്രം, ശാസ്‌ത്രം, പൊതുവിജ്ഞാനം എന്നീ വിഭാഗങ്ങളിലായ്‌ 15 ചോദ്യങ്ങള്‍. സങ്കോചത്തോടെ ഒന്നൊന്നായി ഉത്തരങ്ങള്‍ നല്‍കി. അങ്ങനെ തന്റെ സമ്പാദ്യം 50 ലക്ഷം. ഇനി ഒരൊറ്റ ചോദ്യം, ഒരുകോടിയുടേത്‌. ചിലപ്പോള്‍ അത്‌ തന്റെ ജീവിതത്തെ മാറ്റി മറിച്ചേക്കാം. അല്ലങ്കില്‍ എല്ലാം നഷ്‌ടപ്പെട്ട്‌ വീട്ടില്‍ പോകാം. സാരമില്ല ഒന്നുമില്ലാതെയല്ലേ വന്നത്‌, മത്സരിക്കാം. ശുഭപ്രതീക്ഷയോടെ പതിനഞ്ചാമത്തെ ചോദ്യം. കിട്ടിയാല്‍ ഒരു കോടി... ഉത്തരത്തെപ്പറ്റി ഒരു ആശങ്ക. ലൈഫ്‌ ലൈനായി കൂടെയുള്ളത്‌ സഹപ്രവര്‍ത്തകനും ആര്‍ടിഒയിലെ ക്ലാര്‍ക്കുമായ ഷിംജിയാണ്‌. ഷിംജിയുടെ സഹായം ഒരു ടേണിംഗ്‌ പോയിന്റാവണേ...
എല്ലാവരും മനമുരുകി പ്രാര്‍ത്ഥിച്ചു. ഉത്തരം പറഞ്ഞു.
സര്‍വ്വവും തകര്‍ന്ന മട്ടിലുള്ള സുരേഷ്‌ഗോപിയുടെ നില്‍പ്പ്‌. സുരേഷ്‌ഗോപി അലറിവിളിച്ചു, ഉത്തരം ശരി. ദൈവമേ... 1 കോടി!!!
പിന്നീടങ്ങോട്ട്‌ അഭിന്ദന പ്രവാഹം. സനൂജ എല്ലാവരോടും നന്ദി പറഞ്ഞു, പ്രത്യേകിച്ച്‌ ഭര്‍ത്താവിനോട്‌. സുരേഷ്‌ ഗോപിയുടെ മുമ്പില്‍ സനൂജ വിതുമ്പി. സുരേഷ്‌ ഗോപിയെപ്പറ്റി പറയുമ്പോള്‍ സനൂജയ്‌ക്ക്‌ നൂറ്‌ നാവാണ്‌. എത്ര വലിയ മനുഷ്യനാ. താന്‍ ടെന്‍ഷനോടെയാണ്‌ ഹോട്ട്‌ സീറ്റിലെത്തിയത്‌. എന്നാല്‍ ആ ഹോട്ട്‌ സീറ്റിനെ കൂള്‍ സീറ്റാക്കിയത്‌ സൂപ്പര്‍ താരമാണെന്നാണ്‌ സനൂജയുടെ വിശ്വാസം. കാരണം സുരേഷ്‌ഗോപി നല്‍കിയ ആത്മാര്‍ത്ഥത അത്രയ്‌ക്കുണ്ട്‌.  ഇത്രയും വലിയ തുക കൊണ്ട്‌ എന്ത്‌ ചെയ്യണമെന്ന്‌ ഇപ്പോഴും സനൂജ ചിന്തിച്ചിട്ടില്ല. എങ്കിലും വീടുവച്ച കടം തീര്‍ക്കണം. കൂലിപ്പണിക്കാരനായ ഭര്‍ത്താവിനൊരു മോചനം നല്‍കണം. മരണപ്പെട്ട ഭര്‍ത്താവിന്റെ അനുജന്റെ കുടുംബത്തെ സംരക്ഷിക്കണം. ഒപ്പം മക്കളെ നന്നായി പഠിപ്പിക്കണം. സനൂജയ്‌ക്ക്‌ രണ്ട്‌ മക്കളാണ്‌. സാജനും സാഗറും. ഒരു കോടി രൂപ കൈയ്യില്‍ കിട്ടിയിട്ടില്ല. ഇപ്പോള്‍ ഷൂട്ടിന്‌ വേണ്ടി കൊടുത്ത ഡമ്മി ചെക്കാണ്‌. പിന്നീടേ ഒരു കോടി കിട്ടുകയുള്ളൂ. ഈ മാസം മുപ്പതിനാണ്‌ സനുജയുടെ ആ ഭാഗം ടെലികാസ്റ്റ്‌ ചെയ്യുന്നത്‌. കോടീശ്വരനെ കളിയാക്കിക്കൊണ്ടുള്ള മറ്റ്‌ ചാനല്‍ പരിപാടിക്കാരോട്‌ സനൂജയ്‌ക്ക്‌ പറയാനുള്ളത്‌ ബൗധികമായ അറിവ്‌ നേടാനുള്ള ഏത്‌ ഷോയും നല്ലതാണെന്നാണ്‌. നാട്ടിലും ഓഫീസിലുമായി സനുജയ്‌ക്കായി പല സ്വീകരണങ്ങളും ഒരുക്കിക്കഴിഞ്ഞു. അങ്ങനെ സനൂജ തിരക്കിലാണ്‌.