കെഎംഎംഎല് അട്ടിമറിക്ക് പിന്നില് സ്വകാര്യ കമ്പനി, തൃശൂര് സ്വദേശിയെ സംശയം
ചവറ കെ.എം.എം.എല്ലില് തുടര്ച്ചയായി രണ്ടാം ദിവസവും വാതകം ചോര്ന്ന സംഭവം അട്ടിമറിയാണെന്ന് ഇന്റലിജന്സിന് സംശയം. കൊച്ചിയിലെ ഒരു സ്വകാര്യ കമ്പനിക്കുവേണ്ടി തൃശൂര് സ്വദേശിയായ ഒരു മനുഷ്യാവകാശപ്രവര്ത്തകന് ആസൂത്രണം ചെയ്ത സംഭവമാണ് വാതകചോര്ച്ചയെന്നാണ് സംശയിക്കുന്നത്.
കെ.എം.എം.എല്ലിന്റെ ഉല്പ്പന്നം വെറും 35,000 രൂപക്ക് കിട്ടുമ്പോള് കൊച്ചിയിലെ സ്വകാര്യ കമ്പനി അത് 90,000 രൂപക്കാണ് വില്ക്കുന്നത്. കൊച്ചിയിലെ സ്വകാര്യ കമ്പനി പണം നല്കിയാണ് ഹരിത ട്രൈബ്യൂണലില് തൃശൂര് സ്വദേശികള് കേസ് ഫയല് ചെയ്തതെന്ന് പോലീസ് സംശയിക്കുന്നുണ്ട്. വിഴിഞ്ഞം പദ്ധതിക്കതിരെ ചിലര് കോടതിയെ സമീപിച്ചതിന് സമാനമാണ് സംഭവം. വിദ്യാര്ത്ഥികള്ക്ക് വാതകചോര്ച്ച വഴി ബോധക്ഷയം ഉണ്ടാകുന്നതിന് മുമ്പ് നിരവധി ആമ്പുലന്സുകള് ദേശീയപാതയില് എത്തിയതെങ്ങനെയാണെന്നും പോലാസ് അന്വേഷിക്കുന്നു. രണ്ടാം ദിവസവും വാതകചോര്ച്ച ഉണ്ടായതിനു പിന്നില് അട്ടിമറിയാണെന്ന് സ്ഥലം എംഎല് എയായ തൊഴില് മന്ത്രി ഷിബു ബേബ് ജോണ് ആരോപിച്ചിരുന്നു.
ഹരിത ട്രൈബ്യൂണലില് സാധാരണ ആരും ഉത്തമ ബോധ്യത്തോടെ കേസിന് പോകാറില്ലെന്നാണ് സര്ക്കാരിന്റെ വിശ്വാസം. ഡല്ഹിയില് കേസ് നടത്താന് ലക്ഷക്കണക്കിന് രൂപ ചെലവുണ്ട്. അങ്ങനെ ലക്ഷങ്ങള് ചെലവഴിക്കാന് സാധാരണ കേസ് കൊടുക്കുന്നവര്ക്ക് കഴിയാറില്ല. കെ.എം.എം.എല്ലിനെതിരെ കേസ് ഫയല് ചെയ്ത തൃശൂര് സ്വദേശിയെ കെ.എം.എം.എല്ലിലെ പരിസ്ഥിതി മലിനീകരണം ഒരുതരത്തിലും ബാധിക്കുന്നതല്ല. അപ്പോള് അദ്ദേഹത്തിന്റെ താല്പര്യം എന്താണെന്നാണ് പോലീസ് സംശയിക്കുന്നത്. മനുഷ്യാവകാശ പ്രവര്ത്തകനായ ഇദ്ദേഹം നേരത്തെയും നിരവധി കേസുകള് ഫയല് ചെയ്തിട്ടുണ്ട്. ചില കേസുകള് വിജയിച്ചിട്ടുണ്ട്.
പൊതുപ്രവര്ത്തകരെന്ന് പറഞ്ഞ് സര്ക്കാര് സ്ഥാപനങ്ങള്ക്കെതിരെയും പദ്ധതികള്ക്കെതിരെയും കേസ് ഫയല് ചെയ്യുന്നവര്ക്ക് വ്യക്തമായ ലക്ഷ്യമുണ്ടെന്നും ഇത്തരക്കാരെ നിരീക്ഷിക്കണമെന്നും നിരവധിതവണ ഇന്റലിജന്സ് മുന്നറിയിപ്പ് നല്കിയിട്ടും സര്ക്കാര് അനങ്ങിയിട്ടില്ല. മനുഷ്യാവകാശ പ്രവര്ത്തകരെ നിരീക്ഷിച്ചാല് അവര് കേസു കൊടുക്കുമെന്നാണ് സര്ക്കാരിന്റെ ഭയം.
അതേ സമയം മനുഷ്യാവകാശ പ്രവര്ത്തകര്ക്കെതിരെ കമ്മീഷന് രംഗത്തെത്തി. മനുഷ്യാവകാശത്തിന്റെ പേരു പറഞ്ഞ് വ്യാപകമായ പിരിവ് നടക്കുന്നുവെന്നാണ് കമ്മീഷന്റെ ആക്ഷേപം. ഇത്തരം പിരിവുകള് പോലീസ് തടയണമെന്നും കമ്മീഷന് പത്രകുറിപ്പില് ആവശ്യപ്പെട്ടു.
https://www.facebook.com/Malayalivartha
