ബാര് തുറക്കാന് ഉമ്മന്ചാണ്ടി പാണക്കാട്ടേക്ക്?
ബാര് തുറക്കുന്ന വിഷയത്തില് സുധീരന് സര്ക്കാരിനെതിരെ തിരിഞ്ഞു നില്ക്കുന്ന പശ്ചാത്തലത്തില് ഘടകകക്ഷികളെ കൈയിലെടുത്ത് ബാര് തുറക്കാന് ഉമ്മന്ചാണ്ടി ശ്രമം തുടങ്ങി. കുഞ്ഞാലികുട്ടിയും കെ.എം. മാണിയുമായി ചര്ച്ച നടത്തിയ ഉമ്മന്ചാണ്ടി ബാര് വിഷയത്തില് യു.ഡി.എഫ്. യോഗം വിളിക്കാന് തീരുമാനിക്കുകയും ചെയ്തു.
പ്ലസ് ടു വിഷയത്തില് അന്വേഷണം വേണമെന്ന് പറഞ്ഞ സുധീരനെതിരെ തിരിഞ്ഞിരിക്കുകയാണ് ലീഗ് നേതൃത്വം. കെ.എം മാണി പറഞ്ഞാല് സുധീരന് ഗൗരവമായെടുക്കുമെന്ന് ഉമ്മന്ചാണ്ടി വിശ്വസിക്കുന്നു, പൂട്ടി കിടക്കുന്ന 418 ബാറുകളില് 2 സ്റ്റാര് നിലവാരമുള്ളവ തുറക്കാനാണ് ഉമ്മന് ചാണ്ടി ശ്രമിക്കുന്നത്. ഇപ്പോള് മുസ്ലീംലീഗ് നേതൃത്വം സുധീരനൊപ്പമാണ് നില്ക്കുന്നത്. ഏതായാലും ആഗസ്റ്റ് 26 ന് കേരള സര്ക്കാര് ഹൈക്കോടതിയില് നിലപാട് വ്യക്തമാക്കണം അതിനുമുമ്പ് വിഷയം തീര്ക്കാനാണ് ഉമ്മന്ചാണ്ടി ശ്രമിക്കുന്നത്. പ്രായോഗിക നിലപാട് വേണമെന്ന ആവശ്യമാണ് ഉമ്മന്ചാണ്ടിയും കെ.ബാബുവും മുന്നോട്ടു വയ്ക്കുന്നത്. ലീഗ് അയഞ്ഞില്ലെങ്കില് ഉമ്മന്ചാണ്ടി പാണക്കാട് തങ്ങളെ കാണാം. എന്നിട്ടും അയഞ്ഞില്ലെങ്കില് പ്ലസ് ടു അഴിമതി കാര്യത്തില് കോടതി വിധിയുടെ മറവില് വിജിലന്സ് അന്വേഷണം പ്രഖ്യാപിച്ച് ലീഗിനെ സമ്മര്ദ്ദത്തിലാക്കും.
കെ.എം.മാണി ബാര് വിഷയത്തില് രണ്ട് നിലപാടുകള് ഇതിനകം പറഞ്ഞിട്ടുണ്ട്. ബാര് വിഷയത്തില് ആദ്യം മാണി നിലപാട് മയപ്പെടുത്തിയെങ്കിലും. പൂട്ടിയ ബാറുകളില് ഒന്നു പോലും തുറക്കരുതെന്ന് ഇന്ന് സംശയത്തിനിട വരാത്തവണ്ണം പറഞ്ഞു കഴിഞ്ഞു. അതിനാല് തന്നെ മുസ്ലീംലീഗിന്റെ പിന്തുണ ബാര് വിഷയത്തില് ആവശ്യമുണ്ട്.
ബാര് വിഷയം കാബിനറ്റ് തീരുമാനിക്കട്ടെ എന്ന നിലപാടാണ് കോണ്ഗ്രസിലെ എ ഗ്രൂപ്പ് സ്വീകരിക്കുന്നത്. മന്ത്രി സഭ തീരുമാനമെടുത്തത് കോടതിയെ അറിയിക്കുമ്പോള് അതിന് വ്യക്തത വരുമെന്നും എ ഗ്രൂപ്പ് പറയുന്നു. ഏതായാലും സുധീരനെ ഒഴിവാക്കികൊണ്ടൊരു തീരുമാനം എ ഗ്രൂപ്പ് സ്വീകരിക്കാനിടയില്ല.
ഉമ്മന്ചാണ്ടി സര്ക്കാരിനെ താഴെയിറക്കാന് ആഗ്രഹിക്കുന്നവരാണ് ബാര് വിഷയത്തില് കര്ശന നിലപാട് തുടരുന്നതെന്ന് ഉമ്മന്ചാണ്ടി ആരോപിക്കുന്നു. കേരളത്തില് വ്യാജ മദ്യ ദുരന്തമുണ്ടാക്കി ജനങ്ങളെ കൊന്ന ശേഷം സര്ക്കാരിനെ താഴെയിറക്കാനാണ് ചിലരുടെ ശ്രമമെന്ന് ഉമ്മന്ചാണ്ടിയുമായി അടുപ്പമുള്ളവര് പറയുന്നു. നിലവാരമുളള ബാറുകള് തുറന്നിരുന്നപ്പോള് നിശബ്ദമായിരുന്നവര് കൈയടിക്കു വേണ്ടിയാണ് സര്ക്കാരിനെ പ്രതിസന്ധിയിലാക്കിയിരിക്കുന്നതെന്നും ഉമ്മന്ചാണ്ടി ആരോപിക്കുന്നു. കെ.പി.സി.സി യോഗത്തിലും യുഡിഎഫ് യോഗങ്ങളിലും അദ്ദേഹം ഇതു തന്നെയാണ് ആവര്ത്തിക്കുന്നത്.
നിലവാരമുള്ള ബാറുകള് തുറക്കാന് അനുവദിക്കാതിരുന്നാല് പൂട്ടി കിടക്കുന്ന 418 ബാറുകളും തുറക്കേണ്ടി വരുമെന്ന് മുഖ്യമന്ത്രി മുന്നറിയിപ്പ് നല്കുന്നു. ഇത് അരാജകത്വത്തിന് കാരണമാകും. സര്ക്കാര് മദ്യനയം രൂപീകരിക്കാതിരുന്നാല് അത് എല്ലാ ബാറുകള്ക്കും പ്രവര്ത്തനാനുമതി നല്കുന്നതിന് തുല്യമായിരിക്കുമെന്നും അതിനുള്ള അവകാശം അവര് ഹൈകോടതിയിലൂടെ നേടുമെന്നും ഉമ്മന്ചാണ്ടി പറയുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
