ബാര്‍ വിഷയം സങ്കീര്‍ണ്ണം; മാണിയുടെ നിലപാട്‌ നിര്‍ണായകം, നികുതി സെക്രട്ടറി സര്‍ക്കാരിനെ പ്രതിസന്ധിയിലാക്കും
സംസ്ഥാനത്ത്‌ പൂട്ടി കിടക്കുന്ന 418 ബാറുകള്‍ തുറക്കാനുള്ള നടപടികളുടെ ആദ്യ പടിയായി ബാറുകളില്‍ നിലവാര പരിശോധന ആരംഭിച്ചു. എന്നാല്‍ ബാറുകള്‍ തുറക്കേണ്ടതില്ലെന്ന മന്ത്രി കെ.എം മാണിയുടെ കര്‍ശന നിലപാട്‌ സര്‍ക്കാരിനെ പ്രതിസന്ധിയിലാക്കും. കാരണം, നികുതി വകുപ്പിന്റെ മന്ത്രി കെ.എം മാണിയാണ്‌. എക്‌സൈസ്‌ കമ്മീഷണറും നികുതി വകുപ്പ്‌ സെക്രട്ടറിയും സംയുക്തമായി പരിശോധനാ റിപ്പോര്‍ട്ട്‌ ഫയല്‍ ചെയ്യണമെന്നാണ്‌ ഹൈക്കോടതി സര്ക്കാരിന് നല്‍കിയിരിക്കുന്ന നിര്‍ദ്ദേശം. നികുതി സെക്രട്ടറി അജിത്‌ കുമാര്‍ കെ.എം മാണിക്ക്‌ കീഴിലുള്ള ഉദ്യോഗസ്ഥനാണ്‌. ഒരു കാരണവശാലും മന്ത്രി മാണിയുമായി ആലോചിക്കാതെ അജിത്‌കുമാറിന്‌ പരിശോധനാ ഫലം ഹൈക്കോടതിയില്‍ സമര്‍പ്പിക്കാനാവില്ല. എക്‌സൈസ്‌ മന്ത്രിക്ക്‌ കീഴില്‍ പ്രവര്‍ത്തിക്കുന്ന എക്‌സൈസ്‌ കമ്മീഷണര്‍ അദ്ദേഹത്തിന്റെ മന്ത്രിയുടെ താത്‌പര്യപ്രകാരം വിശദീകരണം സമര്‍പ്പിക്കും. രണ്ടു മന്ത്രിമാര്‍ തമ്മിലുള്ള പോരിലേക്ക്‌ കാര്യങ്ങള്‍ നീങ്ങുമെന്നാണ്‌ സൂചന. വരുന്ന 26 ന്‌ വിശദീകരണം ഹൈക്കോടതിയില്‍ ഫയല്‍ ചെയ്യേണ്ടതുണ്ട്‌. സെക്രട്ടറിയും കമ്മീഷണറും തമ്മില്‍ അഭിപ്രായ ഐക്യം ഉണ്ടാകാതിരുന്നാല്‍ എങ്ങനെയാണ്‌ വിശദീകരണം ഫയല്‍ ചെയ്യുക? പ്രശ്‌നം സങ്കീര്‍ണമായാല്‍ മന്ത്രിസഭയ്‌ക്ക്‌ ഇക്കാര്യത്തില്‍ ഇടപെടേണ്ടി വരും. അങ്ങനെ വരുമ്പോള്‍ വി.എം. സുധീരന്റെ ആശയങ്ങള്‍ വീണ്ടും തലപൊക്കും.
സംസ്ഥാനം ഗുരുതരമായ ഒരു പ്രതിസന്ധിയിലേക്ക്‌ നീങ്ങുന്നതിന്റെ സൂചനയാണ്‌ ഇത്. ബാറുകളുടെ നിലവാരം പരിശോധിക്കാന്‍ ഹൈക്കോടതി നിര്‍ദ്ദേശം നല്‍കിയപ്പോള്‍ മുഖ്യമന്ത്രിക്കും എക്‌സൈസ്‌ മന്ത്രിക്കും ആശ്വാസമുണ്ടായി. എന്നാല്‍ നികുതി സെക്രട്ടറിയെ കൂട്ടി ഇതിന്‌ ചട്ടം കെട്ടിയതോടെ ആശ്വാസം പമ്പ കടന്നു. അതിനിടെയാണ്‌ ബാറുകള്‍ ഒരിക്കലും തുറക്കേണ്ടതില്ലെന്ന പ്രസ്‌താവനയുമായി മന്ത്രി മാണി രംഗത്തെത്തിയത്‌. മാണിയുടെ തീരുമാനത്തിന്‌ പിന്നില്‍ ക്രൈസ്‌തവ മത മേലധ്യക്ഷന്‍മാരാണെന്നും പറയപ്പെടുന്നു. ഇവര്‍ ബാറുകള്‍ തുറക്കുന്നതിന്‌ തീര്‍ത്തും എതിരാണ്‌.
ഉദ്യോഗസ്ഥതലത്തിലുണ്ടാകാന്‍ സാധ്യതയുള്ള അഭിപ്രായ വ്യത്യാസം സര്‍ക്കാര്‍ ഇതുവരെയും ഗൗരവമായെടുത്തിട്ടില്ല. എക്‌സൈസ്‌ മന്ത്രിക്കും നികുതി സെക്രട്ടറിയുടെ മേല്‍ ആധിപത്യം ഉണ്ടെന്നാണ്‌ എക്‌സൈസ്‌ മന്ത്രാലയത്തിലെ ഉയര്‍ന്ന ഉദ്യോഗസ്ഥര്‍ പറയുന്നത്‌. സെക്രട്ടറിമാര്‍ക്ക്‌ അവരുടെ അഭിപ്രായങ്ങള്‍ പറയാനാവില്ലെന്നും സര്‍ക്കാരിന്റെ അഭിപ്രായമാണ്‌ അവര്‍ പറയുന്നതെന്നും ബാറുകള്‍ക്ക്‌ അനുകൂല നിലപാടെടുക്കുന്ന മന്ത്രിമാര്‍ പറയുന്നു. എന്നാല്‍ നികുതി മന്ത്രിയുടെ തീരുമാനത്തെ എങ്ങനെയാണ്‌ മറികടക്കുക എന്നോര്‍ത്ത്‌ മുഖ്യമന്ത്രി ഖിന്നനാണ്‌.
നികുതി സെക്രട്ടറി ഫയലില്‍ വിരുദ്ധാഭിപ്രായം എഴുതിയാല്‍ ഹൈക്കോടതി അത് അവഗണിക്കുകയില്ല. ഹയര്‍ സെക്കന്‍ഡറി ഡയറക്‌ടറുടെ കുറിപ്പ്‌ മറികടന്ന്‌ സ്‌കൂള്‍ അനുവദിച്ചത്‌ ഹൈക്കോടതി റദ്ദാക്കിയിരുന്നു. ഉദ്യോഗസ്ഥതലത്തിലെ തീരുമാനങ്ങള്‍ ഹൈക്കോടതി അവഗണിക്കുകയില്ല എന്നതിന്റെ സൂചനയാണ്‌ ഇത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
