സാധാരണ മനുഷ്യരുടെ പ്രായം കൂടുന്നതിനെക്കാള്‍ എട്ട് മടങ്ങ് വേഗത്തില്‍ പ്രായം കൂടുന്ന അപൂര്‍വരോഗം ബാധിച്ചിരിക്കുന്നത് മദ്ധ്യപ്രദേശിലെ ശ്രേയനസ് ബാര്‍മത്ത് എന്ന ബാലനാണ്. ലോകത്തില്‍ ആകെ 150ല്‍ താഴെ കുട്ടികള്‍ മാത്രമാണ് ഇങ്ങനെയൊരവസ്ഥയുമായി ജനിക്കുന്നതെന്നാണ് റിപ്പോര്‍ട്ടുകള്‍. രോഗം ചികിത്സിച്ച് ഭേദപ്പെടുത്തുന്നതിനും പരിമിതികളുണ്ടെന്നാണ് വിദഗ്ധര്‍ പറയുന്നത്. 11വയസ്സ് മാത്രം പ്രായമുള്ള ഈ കുട്ടിയെ കണ്ടാല്‍ അറുപത് കഴിഞ്ഞ വൃദ്ധനാണെന്ന് തോന്നും. അസാധാരണമായ പ്രോട്ടീന്‍ നിര്‍മിക്കുന്ന ഹച്ചിന്‍സണ്‍ ഗില്‍ഫോര്‍ഡ് പ്രോജേറിയ സിന്‍ഡ്രോം എന്നാണ് ഈ രോഗത്തെ ഡോക്ടര്‍മാര്‍ വിളിക്കുന്നത്. ഇത്തരം പ്രോട്ടീനുകളടങ്ങിയ കോശങ്ങള്‍ ശരീരത്തെ വേഗത്തില്‍ പ്രായം കൂടാന്‍ പ്രേരിപ്പിക്കുന്നതായാണ് കണ്ടെത്തല്‍.

പ്രോജേറിയ ബാധിച്ച രോഗികള്‍ സാധാരണയായി പതിമൂന്ന് വയസ്സിനകം ഹൃദയാഘാതമോ പക്ഷാഘാതമോ ബാധിച്ച് മരിക്കാറുണ്ടെന്നാണ് ഡോക്ടര്‍മാര്‍ പറയുന്നത്.തലയില്‍ കഷണ്ടിയും പ്രായാധിക്യവും കാണിക്കുന്ന ഈ രോഗം പ്രോജേറിയ എന്നാണ് അറിയപ്പെടുന്നത്. മറ്റു കുട്ടികളുടെതിനെ അപേക്ഷിച്ച് ശരീരത്തിന് ബലമില്ലാത്ത അവസ്ഥയും ശ്രേയസ് നേരിടുന്നു. ഇത്തരം രോഗാവസ്ഥയുടെ കഥ പറയുന്ന ദി ക്യൂരിയസ് കേസ് ഓഫ് ബെഞ്ചമിന്‍ ബട്ടണ്‍ എന്ന ചിത്രം നേരത്തെ പുറത്തിറങ്ങിയിരുന്നു. ഇതില്‍ നിന്നാണ് പ്രൊജേറിയ എന്ന് ഈ രോഗം അറിയപ്പെടാന്‍ തുടങ്ങിയത്. ഇത്തരം ഒരവസ്ഥ തനിക്കുണ്ടെങ്കിലും തന്റെ സ്വപ്നങ്ങളെ അതൊരിക്കലും ബാധിക്കില്ലെന്ന് ശ്രേയസ് പറയുന്നു. സംഗീതോപകരണങ്ങള്‍ വായിക്കുന്നതിനും പാട്ടു പാടുന്നതിനും സൈക്കിളോടിക്കുന്നതിനുമൊന്നും ഇത് തടസ്സമല്ലെന്ന് ശ്രേയസ് വിശ്വസിക്കുന്നു. ശ്രേയസിന്റെ ഏറ്റവും വലിയ സ്വപ്നം പ്രശസ്തനായ ഒരു പാട്ടുകാരനാകുകയെന്നതാണ്.