ആരോഗ്യ സംരക്ഷണത്തിനായി വെളുത്തുള്ളി ഉപയോഗിക്കുന്നതാണ്. എന്നാൽ വെളുത്തുള്ളി സൗന്ദര്യ സംരക്ഷണത്തിന് ഉപയോഗിക്കാമെന്നു പറഞ്ഞാൽ അതൊരു പുതിയ കാര്യമാണ്. പലവിധത്തിലുള്ള ചർമ പ്രശ്നങ്ങൾക്ക് ഉത്തമ പ്രതിവിധിയാണ് വെളുത്തുള്ളി. സൗന്ദര്യ സംരക്ഷണത്തിനായി വെളുത്തുള്ളി ഉപയോഗിക്കുന്ന രീതി അറിയാം.

മുഖക്കുരുവാണ് ഇന്നത്തെ എല്ലാവരുടെയും വലിയ പ്രശ്‌നം. ഇതിനു പ്രതിവിധിയായി വെളുത്തുള്ളി ഉപയോഗിക്കാം. അതിനായി അഞ്ചാറ് അല്ലി വെളുത്തുള്ളിയെടുത്ത് നന്നായി അരച്ചോ ഞെരുടിയോ നീരെടുക്കുക. മുഖക്കുരുവുള്ള ഭാഗത്ത് അതു പുരട്ടുകയും തുടർന്ന് അഞ്ചു മിനിറ്റിനു ശേഷം കഴുകിക്കളയുകയും ചെയ്യുക. അൽപസമയത്തിനകം മുഖക്കുരു മൂലമുണ്ടായ ചുവപ്പും പാടുകളും വളരെ വേഗം മാഞ്ഞു തുടങ്ങുന്നതായി കാണാം.

ഇനി വെളുത്തുള്ളി ഉപയോഗിച്ച് ഇതും ചെയ്യാം. ഒരു വെളുത്തുള്ളിയിലെ അല്ലി മുഴുവനായെടുത്ത് നീരെടുത്ത് ഒരു പകുതി തക്കാളി കൂടി ഉടച്ചു ചേർക്കുക. ഈ മിശ്രിതം മുഖത്തു പുരട്ടി പത്തു മിനിറ്റിനു ശേഷം കഴുകിക്കളയുമ്പോൾ, ചർമത്തിലെ സുഷിരങ്ങൾ തുറന്നു വരുകയും മാലിന്യങ്ങൾ അകലുകയും ചെയ്യുന്നു.

അതുപോലെ അലർജി മൂലമോ മറ്റെന്തെങ്കിലും കാരണം കൊണ്ടോ ചർമത്തിലുണ്ടാകുന്ന ചൊറിച്ചിൽ, ചുവപ്പ് നിറം, പൊള്ളൽപാടുകൾ ഇവയെ അകറ്റാനും വെളുത്തുള്ളി ധാരാളം മതി. തലയോട്ടി, മുട്ടുകൾ എന്നിവിടങ്ങളിലായിരിക്കും ഇത്തരം അലർജികൾ കൂടുതലായി കാണുന്നത്. ഇത്തരത്തിലുള്ള അലർജികളിൽനിന്നു വെളുത്തുള്ളിയിലടങ്ങിയിരിക്കുന്ന ആന്റി ഇൻഫ്ലമേറ്ററി ഘടകങ്ങൾ ചർമത്തെ രക്ഷിക്കുന്നു. കൂടാതെ വെളുത്തുള്ളി നീരും ഒലീവ് ഓയിലും സ്ട്രെച്ച് മാർക്കുകളിൽ പുരട്ടുക. കുറച്ചു ദിവസം ഇത് ആവർത്തിക്കുകയാണെങ്കിൽ ദിവസങ്ങൾക്കകം പാടുകൾ മാഞ്ഞു തുടങ്ങും.