നിര്‍മാണപ്പിഴവുകൊണ്ട് ലോകാദ്ഭുതങ്ങളുടെ പട്ടികയില്‍ ഇടംപിടിച്ച നിര്‍മിതിയാണ് ഇറ്റലിയിലെ പിസാഗോപുരം. പിസയിലെ കത്തീഡ്രലില്‍ നിര്‍മിച്ച മണിമേടയാണ് 'ചരിഞ്ഞ ഗോപുര'മെന്ന പേരില്‍ ലോകപ്രസിദ്ധമായത്. 200 വര്‍ഷം കൊണ്ട് പണിതീര്‍ത്ത ആ അദ്ഭുതത്തിന്റെ കഥ ഇങ്ങനെ...

വര്‍ഷം 1173-ല്‍ പിസ കത്തീഡ്രലില്‍ ഒരു മണിമേട നിര്‍മിക്കാന്‍ അധികൃതര്‍ തീരുമാനിച്ചു. അഞ്ചുവര്‍ഷം കൊണ്ട് മൂന്നുനില വരെ ഉയര്‍ന്നപ്പോഴാണ് അധികൃതര്‍ ഒരു കാര്യം ശ്രദ്ധിച്ചത്. കെട്ടിടത്തിന് ഒരു ഭാഗത്തേക്ക് ഒരു ചെറിയ ചരിവ്! അധികം ഉറപ്പില്ലാത്ത മണ്ണില്‍ വെറും മൂന്ന് മീറ്റര്‍ ആഴത്തില്‍ കുഴിച്ച് അടിത്തറ കെട്ടിയായിരുന്നു ഇതിന്റെ നിര്‍മാണം. ചരിയാനുള്ള കാരണവും മറ്റൊന്നായിരുന്നില്ല. അങ്ങനെ പണി ഇടയ്ക്കുവച്ച് നിന്നു.

നൂറു വര്‍ഷങ്ങള്‍ക്കുശേഷം ജിയോവാനി സിമോണ്‍ എന്നൊരു ആര്‍ക്കിടെക്ട് ആ വെല്ലുവിളി ഏറ്റെടുത്തു. അങ്ങനെ 1319 ആയപ്പോഴേക്കും അദ്ദേഹം മണിമേടയുടെ ഏഴുനിലകള്‍ പണിതു. ചരിയുന്നതിന്റെ മറുഭാഗത്ത് ഭാരം കൂടുതല്‍ വരുന്ന രീതിയില്‍ ബാലന്‍സ് ചെയ്തായിരുന്നു നിര്‍മാണം. 1372 ആയപ്പോഴേക്കും എട്ടുനിലകളും പണിത് മണിമേട നിര്‍മാണം പൂര്‍ത്തിയാക്കി.

57 മീറ്റര്‍ ഉയരത്തില്‍ 15 .5 മീറ്റര്‍ വ്യാസത്തില്‍ സിലിണ്ടര്‍ ആകൃതിയിലാണ് ഇത് നിര്‍മിച്ചത്. നിര്‍മാണം പൂര്‍ത്തിയായി കുറേനാള്‍ കഴിഞ്ഞപ്പോഴേക്കും കെട്ടിടം വീണ്ടും ചരിഞ്ഞുതുടങ്ങി. കെട്ടിടത്തിന്റെ മുകള്‍ഭാഗം അതിന്റെ കേന്ദ്രത്തില്‍നിന്ന് ഏതാണ്ട് 3.9 മീറ്ററാണ് അകന്നു മാറിയത്.

ചരിഞ്ഞുചരിഞ്ഞ് നിലംപൊത്താന്‍ പോകുന്ന പിസാഗോപുരത്തെ രക്ഷിക്കാന്‍ 1990-ലും 2008-ലും ചില അറ്റകുറ്റപണികള്‍ നടത്തിയിരുന്നു. ചരിയുന്നതിന്റെ എതിര്‍ഭാഗത്തെ മണ്ണ് മാറ്റിയശേഷം ഗോപുരത്തെ നേരെയാക്കുന്ന പ്രവര്‍ത്തനങ്ങളാണ് നടത്തിയത്. ഇതിന്റെ ഫലമായി 19-ാം നൂറ്റാണ്ടിന്റെ തുടക്കത്തില്‍ ഉണ്ടായിരുന്ന അതേ അവസ്ഥയിലേക്ക് ഗോപുരം തിരികെയെത്തി.

 

ഇന്നും ഇറ്റലിയിലെത്തുന്ന ടൂറിസ്റ്റുകളെ ആകര്‍ഷിക്കുന്ന പ്രധാന വിനോദസഞ്ചാരകേന്ദ്രമാണ് പിസാഗോപുരം.