ചെറിയ വീടുകളോട് താല്പര്യമുണ്ടോ? എങ്കില് ഇതൊന്ന് ശ്രദ്ധിക്കൂ...
ബുദ്ധിയുള്ള വീട്ടുകാരും മിടുക്കനായ ഡിസൈനറും കൃത്യമായ അളവില് ചേര്ന്നിട്ടുണ്ടെങ്കില് മികച്ച ഒരു വീട് ഉണ്ടാകുമെന്ന കാര്യത്തില് സംശയമേ വേണ്ട. പാലാ പൈകയിലുള്ള ഈ വീടിന്റെ പ്രത്യേകതയുടെ രഹസ്യം അതാണ്.
അച്ഛനും അമ്മയും ഏകമകളും അടങ്ങുന്ന കുടുംബത്തിനു വേണ്ട എല്ലാ സൗകര്യങ്ങളും ഈ വീട്ടിലുണ്ട്, പരിചരണം കൂടുതല് വേണ്ടിവരുന്നത് ഒന്നും ഇല്ല താനും. നാലുമാസം കൊണ്ട് പണി തീര്ത്ത് താമസം തുടങ്ങിയ വീടാണിത്. ചെറിയൊരു വരാന്ത, സ്വീകരണമുറി, ഊണുമുറി, വര്ക്ഏരിയ, മൂന്ന് കിടപ്പുമുറികള് എന്നിവയാണ് വീടിനുള്ളത്.
പ്രധാന കിടപ്പുമുറിയോടു ചേര്ന്ന് ബാത്റൂം ഉണ്ട്. മറ്റു രണ്ടു കിടപ്പുമുറികള്ക്ക് പൊതുവായി കോമണ് ബാത്റൂം ഉപയോഗിക്കാം. റോഡില് നിന്നു വളരെയധികം താഴ്ന്നു കിടന്നിരുന്ന പ്ലോട്ട് ഉയര്ത്തിയെടുക്കാന് അല്പം പണച്ചെലവു വന്നു. ഏകദേശം മൂന്ന് ലക്ഷം രൂപ ഇതിനായി ചെലവായി.
മൂന്നു കിടപ്പുമുറികള് അടുത്തടുത്തായും ഊണുമുറി, അടുക്കള, വര്ക്ഏരിയ എന്നീ മുറികള് ഒരുമിച്ചും ക്രമീകരിച്ചിരിക്കുന്നു. ഇതു സ്വകാര്യത സംരക്ഷിക്കാന് സഹായിക്കും. കൂടുതല് പണച്ചെലവു വരാന് ഇടയുള്ള, ജനാലകളും വാതിലുകളും ലളിതമാക്കുക വഴി നല്ലൊരു തുക ലാഭിക്കാന് സാധിച്ചു.
ജനാലകളുടെ ചട്ടം കോണ്ക്രീറ്റ് കൊണ്ടു നിര്മിച്ചവയാണ്. പാളികള്ക്ക് ആഞ്ഞിലിയും പ്ലാവും ഉപയോഗിച്ചു. പോളിഷിങ്ങിനു പകരം വെളുത്ത പെയിന്റ് നല്കി പണം ലാഭിച്ചു. കളര് ഗ്ലാസുകൂടി സ്ഥാപിച്ചപ്പോള്, ജനാലകളുടെ ഭംഗി ഇരട്ടിച്ചു. വാതിലുകളും ഏറ്റവും ലളിതമായാണ് നിര്മിച്ചിരിക്കുന്നത്. ആഞ്ഞിലിയും പ്ലാവുമാണ് വാതിലുകള് നിര്മിക്കാന് ഉപയോഗിച്ചിരിക്കുന്നത്. പ്രധാന വാതിലിലും കളര് ഗ്ലാസിന്റെ സാന്നിധ്യമുണ്ട്. ഗ്ലോസി ഫിനിഷ് നല്കിയതിനാല് വാതിലുകള് വൃത്തിയാക്കാന് എളുപ്പമാണ്.
ഫ്ലോറിങ്ങിന് ഐവറി നിറമുള്ള സാധാരണ വിട്രിഫൈഡ് ടൈല് ഉപയോഗിച്ചു. വില ചതുരശ്രയടിക്ക് 48 രൂപ. ഫെറോസിമന്റും അലുമിനിയം ഹൈലം ഷീറ്റും ഉപയോഗിച്ചാണ് കബോര്ഡുകള് മുഴുവന് നിര്മിച്ചത്.
മേല്ക്കൂര ഫ്ലാറ്റ് ആയി വാര്ത്ത് മുകളില് ട്രസ് റൂഫ് ഇടുകയായിരുന്നു. ഇതാണ് ഈ വീട്ടിലെ ഏറ്റവും ചെലവേറിയ ഭാഗം. പക്ഷേ, സ്ഥിരം ഉപയോഗമില്ലാത്ത സാധനങ്ങളെല്ലാം അവിടെ സൂക്ഷിക്കാം. തയ്യല് മെഷീന്, വാഷിങ് മെഷീന് എന്നിവയെല്ലാം പ്രവര്ത്തിപ്പിക്കാനും ഈ അധികയിടം ഉപകരിക്കും.
ഒരുവിധം നല്ല നിരപ്പായി തേച്ചതിനാല് പെയിന്റിങ്ങിനു മുന്പ് പുട്ടിയിടേണ്ടിവന്നില്ല. ഇതും ചെലവു നിയന്ത്രിക്കാന് ഉപകരിച്ചു. അനാവശ്യമായ വലുപ്പമോ അലങ്കാരങ്ങളോ ഇല്ല അടുക്കളയ്ക്ക്. അടുക്കളയോടു ചേര്ന്ന് പുകയടുപ്പ് സ്ഥാപിച്ചിരിക്കുന്ന ചെറിയ വര്ക് ഏരിയയുമുണ്ട്.
ലളിതമായ പ്ലാനും നിര്മാണരീതികളുമാണ് ഈ വീടിന്റെ ചെലവു നിയന്ത്രിക്കാന് സഹായിച്ചത്. ഉപകാരമില്ലാത്ത ഒരു ഇഞ്ച് സ്ഥലം പോലും ഇവിടെ കാണാനാകില്ല. (ഡിസൈനര്: ബിജു ടോം നരിത്തൂക്കില് കണ്സ്ട്രക്ഷന്സ്, പൈക, പാലാ)
https://www.facebook.com/Malayalivartha
