അനധികൃത സാമ്പത്തിക ഇടപാടുമായി പോപ്പുലര്‍ ഫ്രണ്ടുമായി ബന്ധപ്പെട്ട് നിരവധി പരാതികളാണ് ഉയര്‍ന്നുവന്നത്. ഇതിന്റെ അടിസ്ഥാനത്തില്‍ സംസ്ഥാനത്തെ പോപ്പുലര്‍ ഫ്രണ്ട് നേതാക്കളുടെ വീടുകളില്‍ ഇന്ന് എന്‍ഫോഴ്‌സ്‌മെന്റ് ഡയറക്ട്രേറ്റ് മിന്നല്‍ പരിശോധന നടത്തുകയാണ്. പോപ്പുലര്‍ ഫ്രണ്ട് ഓഫ് ഇന്ത്യ ദേശീയ ചെയര്‍മാന്‍ ഒഎംഎ സലാം, ദേശീയ സെക്രട്ടറി നസറുദ്ദീന്‍ എളമരം എന്നിവരുടെ മലപ്പുറത്തെ വീടുകളിലാണ് ഇഡി പരിശോധന നടത്തുന്നത്. പോപ്പുലര്‍ ഫ്രണ്ട് നേതാവായ തിരുവനന്തപുരം കരമന സ്വദേശി അഷ്‌റഫ് മൗലവിയുടെ പൂന്തുറയിലെ വീട്ടിലും ഇഡി സംഘം പരിശോധിക്കുന്നുണ്ട്. കൊച്ചിയില്‍ നിന്നുള്ള സംഘമാണ് തലസ്ഥാനത്ത് പരിശോധന നടത്തുന്നത്. പരിശോധന ഇപ്പോഴും തുടരുകയാണ്.

പൗരത്വ ഭേദഗതിക്കെതിരായ പ്രതിഷേധത്തിന്റെ മറവില്‍ രാജ്യത്തെ വിവിധയിടങ്ങളില്‍ നടന്ന കലാപങ്ങളുടെ രാഷ്ട്രീയ ബന്ധം സംബന്ധിച്ച് നിര്‍ണ്ണായക വിവരങ്ങള്‍ പുറത്ത് വന്നിയിരുന്നു. ആക്രമ സംഭവങ്ങളില്‍ പോപ്പുലര്‍ ഫ്രണ്ടും, ഭീം ആര്‍മിയും തമ്മിലുള്ള ബന്ധം സംബന്ധിച്ച വിവരങ്ങളാണ് പുറത്തുവന്നിരിക്കുന്നത്. കലാപത്തിനായി ഇരു പാര്‍ട്ടികളും തമ്മില്‍ അനധികൃത സാമ്പത്തിക ഇടപാട് നടത്തിയിരുന്നുവെന്നാണ് വിവരം. എന്‍ഫോഴ്സ്മെന്റ് ഡയറക്ട്രേറ്റാണ് പോപ്പുലര്‍ ഫ്രണ്ട്-ഭീം ആര്‍മി ബന്ധത്തെക്കുറിച്ചുള്ള വിവരങ്ങള്‍ പുറത്തുവിട്ടിരിക്കുന്നത്. ഇതിന്റെ കൂടി അടിസ്ഥാനത്തിലാണ് പരിശോധന നടക്കുന്നത്.

അനധികൃത സാമ്പത്തിക ഇടപാടുകള്‍ സംബന്ധിച്ച് എന്‍ഫോഴ്സ്മെന്റിന്റെ പക്കല്‍ ഉണ്ടെന്നാണ് റിപ്പോര്‍ട്ടുകള്‍. കണ്ടെത്തലിന്റെ അടിസ്ഥാനത്തില്‍ ഉടന്‍ തന്നെ അന്വേഷണം ആരംഭിക്കാനാണ് എന്‍ഫോഴ്സ്മെന്റ് നീക്കം. ഇതിന്റെ ഭാഗമായി അടുത്ത മാസം പോപ്പുലര്‍ ഫ്രണ്ട് പ്രവര്‍ത്തകരെ കസ്റ്റഡിയില്‍ എടുത്ത് ചോദ്യം ചെയ്‌തേക്കും. മൊബൈല്‍, വാട്സ് ആപ്പ് സന്ദേശങ്ങള്‍, ബാങ്ക് ഇടപാടുകളെക്കുറിച്ചുള്ള രേഖകള്‍, എന്നിങ്ങനെയുള്ള തെളിവുകളാണ് എന്‍ഫോഴ്സ്മെന്റിന്റെ പക്കല്‍ ഉള്ളതെന്നാണ് സൂചന. പൗരത്വ ഭേദഗതിക്കെതിരായ പ്രതിഷേധത്തിന്റെ മറവില്‍ നടന്ന കലാപത്തില്‍ പോപ്പുലര്‍ ഫ്രണ്ടിന് പങ്കുള്ളതായി നേരത്തെ വ്യക്തമായിരുന്നു. ഇതേ തുടര്‍ന്ന് മുതിര്‍ന്ന നേതാക്കളെ എന്‍ഫോഴ്സ്മെന്റും, ഡല്‍ഹി പോലീസും ചോദ്യം ചെയ്തിരുന്നു. ഇവരില്‍ നിന്നും ലഭിച്ച വിവരങ്ങളുടെ അടിസ്ഥാനത്തില്‍ നടത്തിയ അന്വേഷണത്തിലാണ് കൂടുതല്‍ തെളിവുകള്‍ എന്‍ഫോഴ്സ്മെന്റിന് ലഭിച്ചത്.