കെജ്രിവാള് വീട്ടുതടങ്കലില്? മുഖ്യമന്ത്രിയുടെ പരിപാടികള് റദ്ദാക്കി; വസതിക്ക് മുന്നില് കനത്ത പോലീസ് കാവല്; പ്രതിഷേധവുമായി ആം ആദ്മി പ്രവര്ത്തകര്; ആരോപണം തള്ളി ഡല്ഹി പോലീസ്; നടപടി കര്ഷക നേതാക്കളുമായി കൂടികാഴ്ച്ച നടത്താന് ഇരിക്കെ
ഡല്ഹി മുഖ്യമന്ത്രി അരവിന്ദ് കെജ്രിവാളിനെ വീട്ടുതടങ്കലിലോ? ഗുരുതര ആരോപണം ഉയര്ത്തുന്നത് അദ്ദേഹത്തിന്റെ പാര്ട്ടിയായ ആം ആദ്മി പാര്ട്ടി നേതാക്കളാണ്. കര്ഷകസമരനേതാക്കളെ കാണാന് പോയി തിരികെ എത്തിയ കെജ്രിവാളിനെയും വീട്ടിലുള്ള മറ്റാരെയും പുറത്തേക്ക് പോകാനോ, വീട്ടിലേക്ക് ആരെയെങ്കിലും വരാനോ ദില്ലി പൊലീസ് അനുവദിക്കുന്നില്ലെന്നാണ് എഎപി നേതാക്കള് ആരോപിക്കുന്നത്. എന്നാല് ഈ ആരോപണം ഡല്ഹി പോലീസ് നിഷേധിക്കുന്നു. പോലീസ് പുറത്തുപോകാന് അനുവദിക്കാത്തതിനാല് അരവിന്ദ് കെജ്രിവാള് തന്റെ ഇന്നത്തെ എല്ലാ പരിപാടികളും റദ്ദാക്കിയിരുന്നു.
എന്നാല് കെജ്രിവാളിന്റെ വീട്ടിന് പുറത്ത് ആം ആദ്മി പ്രവര്ത്തകരും മറ്റ് പാര്ട്ടിയിലെ പ്രവര്ത്തകരും തമ്മില് ഏറ്റുമുട്ടല് ഉണ്ടാകാതിരിക്കാന് സുരക്ഷ കൂട്ടിയത് മാത്രമാണെന്നാണ് ഡല്ഹി പോലീസിന്റെ വിശദീകരണം. ഇതിന് തെളിവായി കെജ്രിവാളിന്റെ വീടിന് മുന്നിലെ ഒരു ഫോട്ടോയും പുറത്തുവിടുന്നു. കെജ്രിവാളിനെ വീട്ടുതടങ്കലിലാക്കി എന്ന ആരോപണം പൂര്ണമായും തെറ്റെന്നാണ് ഡല്ഹി എസിപി ആന്റോ അല്ഫോണ്സ് മാധ്യമങ്ങളോട് പ്രതികരിച്ചു.
രാജ്യവ്യാപകമായി കര്ഷക സംഘടനകള് പ്രഖ്യാപിച്ചിരിക്കുന്ന ഭാരത് ബന്ദിന് ആം ആദ്മി പാര്ട്ടി പിന്തുണ പ്രഖ്യാപിച്ചിരുന്നു. പാര്ട്ടി നേതാക്കളോടും പ്രവര്ത്തകരോടും ബന്ദിനെ പിന്തുണയ്ക്കാന് പാര്ട്ടിയുടെ ദേശീയ കണ്വീനറും ദില്ലി മുഖ്യമന്ത്രിയുമായ അരവിന്ദ് കെജ്രിവാള് ആവശ്യപ്പെടുകയും ചെയ്തിരുന്നതാണ്. തിങ്കളാഴ്ച സിംഘുവിലെത്തി കര്ഷകസമരനേതാക്കളെ കെജ്രിവാള് കണ്ടിരുന്നു. അവര്ക്ക് വേണ്ട സൗകര്യങ്ങള് ഒരുക്കിയിട്ടില്ലേ എന്ന് പരിശോധിക്കുകയും ചെയ്തു. അതിന് ശേഷം തിരികെ വീട്ടിലെത്തി, പിന്നീട് പുറത്തുപോകാന് അനുവദിക്കുന്നില്ലെന്നാണ് ആരോപണം. കേന്ദ്രഭരണപ്രദേശമായ ഡല്ഹിയില് പോലീസ് സംസ്ഥാനഭരണത്തിന് കീഴിലല്ല. കേന്ദ്ര ആഭ്യന്തരമന്ത്രാലയത്തിന് കീഴിലാണ് ഡല്ഹി പോലീസ്.
കര്ഷക സമരത്തിന് പിന്തുണ വര്ധിക്കുന്നത് കേന്ദ്ര സര്ക്കാരിന് കനത്ത വെല്ലുവിളിയാകുകയാണ്. ഇതിനിടെ കര്ഷകരെ പാര്പ്പിക്കാന് ഡല്ഹിയിലെ സ്റ്റേഡിയങ്ങള് വിട്ടു നല്കണമെന്നത് ഉള്പ്പെടെ കര്ഷക സമരത്തിനെ നിയന്ത്രിക്കാന് പോലീസ് ആവശ്യപ്പെട്ട ഒരു ആവശ്യവും അംഗീകരിക്കാന് ഡല്ഹി സര്ക്കാര് തയ്യാറായിരുന്നില്ല. ഇതിന് പിന്നാലെ സമരത്തിന് പിന്തുണയും ഇന്നു നടക്കുന്ന ഭാരത് ബന്ദിന് പിന്തിുണയും അരവിന്ദ് കെജരിവാള് പ്രഖ്യാപിച്ചു. ഇതിനെ തുടര്ന്നാണ് പോലീസിന്റെ നടപടിയെന്നാണ് ആം ആദ്മി പാര്ട്ടിയുടെ വിലയിരുത്തല്.
അതെ സമയം കാര്ഷിക നിയമങ്ങളില് പ്രതിഷേധിച്ച് കര്ഷക സംഘടനകള് ആഹ്വാനം ചെയ്ത ഭാരത് ബന്ദ് രാവിലെ പതിനൊന്ന് ആരംഭിച്ചു. തദ്ദേശ തെരഞ്ഞെടുപ്പ് നടക്കുന്നതിനാല് കേരളത്തെ ഒഴിവാക്കിയിട്ടുണ്ട്. അവശ്യ സര്വീസുകള് തടസപ്പെടുത്തില്ലെന്ന് കര്ഷക സംഘടനകള് വ്യക്തമാക്കിയിട്ടുണ്ട്. കര്ഷക സംഘടനകള് ആഹ്വാനം ചെയ്ത ഭാരത് ബന്ദിന് ഐക്യദാര്ഡ്യം അറിയിച്ച് ഗുജറാത്ത്, മധ്യപ്രദേശ് തുടങ്ങിയ സംസ്ഥാനങ്ങളില് നിന്നുള്ള കൂടുതല് കര്ഷകര് ദില്ലിയുടെ അതിര്ത്തികള് വളയും. കോണ്ഗ്രസും, ഇടത് പാര്ട്ടികളുമടക്കം പതിനെട്ട് പ്രതിപക്ഷ പാര്ട്ടികളും ബന്ദിന് ഐകൃദാര്ഡ്യം അറിയിച്ചിട്ടുണ്ട്. ക്രമസമാധാന നില ഉറപ്പ് വരുത്താന് സംസ്ഥാനങ്ങള്ക്കും, കേന്ദ്ര ഭരണ പ്രദേശങ്ങള്ക്കും കേന്ദ്ര ആഭ്യന്തര മന്ത്രാലയം നിര്ദ്ദേശം നല്കിയിട്ടുണ്ട്.
https://www.facebook.com/Malayalivartha
