യുവനടിയെ അപമാനിച്ച സംഭവം; പ്രതികളുടെ ദൃശ്യങ്ങള് പുറത്ത് വിട്ട് പോലീസ്; പ്രതികള് എറണാകുളം ജില്ലക്ക് പുറത്ത് നിന്നുള്ളവര്; അന്നു തന്നെ ട്രെയിന് മാര്ഗം ജില്ലവിട്ടു; ഇടപ്പള്ളി മെട്രോ സ്റ്റേഷന്, ഷോപ്പിങ് മാള്, സൗത്ത് റെയില്വേ സ്റ്റേഷന് എന്നിവിടങ്ങളിലെ ദൃശ്യങ്ങള് പുറത്ത്
ഷോപ്പിങ് മാളില് യുവനടിയെ അപമാനിച്ച കേസിലെ പ്രതികളുടെ ദൃശ്യങ്ങള് പോലീസ് പുറത്തുവിട്ടു. ഇടപ്പള്ളി മെട്രോ സ്റ്റേഷന്, ഷോപ്പിങ് മാള്, സൗത്ത് റെയില്വേ സ്റ്റേഷന് എന്നിവിടങ്ങളിലെ ദൃശ്യങ്ങളാണ് ഇപ്പോള് പുറത്തുവന്നിരിക്കുന്നത്. ഇതിലൂടെ പ്രതികളെ കണ്ടെത്താനാകുമെന്നാണ് പോലീസിന്റെ പ്രതീക്ഷ. ഇതുവരെയും പ്രതികളെ കുറിച്ച് ഒന്നും കണ്ടെത്താന് പോലീസിന് സാധിച്ചിരുന്നില്ല. ഇതിനെ തുടര്ന്നാണ് സിസിടിവി ദൃശ്യങ്ങള് പുറത്ത് വിട്ടത്.
17-ാം തീയതി വൈകിട്ട് 5.45-നാണ് പ്രതികളായ രണ്ടുപേരും ഷോപ്പിങ് മാളിലെത്തിയത്. ഏകദേശം രണ്ട് മണിക്കൂറോളം ഇവര് മാളില് ചിലവഴിച്ചു. രാത്രി 7.02-നാണ് നടിക്ക് നേരെ മോശംപെരുമാറ്റമുണ്ടായത്. ഇതിനുപിന്നാലെ 7.45-ഓടെ മാളില്നിന്ന് പുറത്തിറങ്ങി ഇടപ്പള്ളി മെട്രോ സ്റ്റേഷനിലെത്തി. ഇവിടെനിന്ന് എറണാകുളം സൗത്ത് റെയില്വേ സ്റ്റേഷനിലും എത്തി. രാത്രിയോടെ ഇരുവരും ട്രെയിന് മാര്ഗം കൊച്ചിയില്നിന്ന് യാത്രതിരിച്ചെന്നാണ് പോലീസിന്റെ നിഗമനം. ഇരുവരും ജില്ലയ്ക്ക് പുറത്തുനിന്നുള്ളവരാണെന്നും പോലീസ് കരുതുന്നു.
മാസ്ക് ധരിച്ചതിനാല് പ്രതികളെ തിരിച്ചറിയാന് കഴിയാത്തതാണ് പോലീസിനെ കുഴക്കുന്നത്. അതേസമയം, ദൃശ്യങ്ങള് പുറത്തുവിട്ടതോടെ ഇവരെ പരിചയമുള്ളവര്ക്ക് എളുപ്പത്തില് തിരിച്ചറിയാന് കഴിയുമെന്നാണ് കരുതുന്നത്. മാളില് പേരോ നമ്പറോ നല്കാതെ കബളിപ്പിച്ച പ്രതികള് ഒരു സാധനം പോലും മാളില്നിന്ന് വാങ്ങിയിട്ടില്ലെന്നും പോലീസ് കണ്ടെത്തിയിട്ടുണ്ട്.
അതെ സമയം മാളില് പ്രതികള് കയറിയത് സെക്യൂരിറ്റി ജീവനക്കാരെ കബളിപ്പിച്ചെന്ന് പോലീസ് കണ്ടെത്തിയിരുന്നു. ഫോണ് നമ്പരോ പേരോ രേഖപ്പെടുത്താതെയാണ് ഇവര് മാളിനകത്ത് കയറിയത്. പ്രതികള് പോയതും വന്നതും മെട്രോ വഴിയാണെന്നും പോലീസ് കണ്ടെത്തി. മറ്റൊരാളുടെ ഒപ്പെന്ന വ്യജേനയാണ് ഇവര് മാളിനുള്ളില് കയറിയത്. ആലുവ മുട്ടം ഭാഗത്തേക്കാണ് ഇവര് പോയത്. മെട്രോ സ്റ്റേഷനിലെ ദൃശ്യങ്ങള് പരിശോധിച്ച ശേഷമാണ് ഇക്കാര്യം പോലീസ് ഉറപ്പിച്ചത്.
വെറുതെ മാളില് കറങ്ങി നടന്ന ഇവര് നടിയെ കണ്ടതോടെ താരത്തിന്റെ അടുത്തേക്ക് ചെല്ലുകയായിരുന്നു. കൊച്ചി നഗരത്തില് നിന്നാണ് ഇവര് മാളിലേക്ക് എത്തിയതെന്നും പോലീസ് സൂചിപ്പിച്ചു. ഇവര്ക്കെതിരെ സിസിടിവി ദൃശ്യങ്ങള് അടക്കം കൂടുതല് തെളിവുകള് ലഭിച്ചതായി പോലീസ് അറിയിച്ചു. താരത്തിന്റെ അമ്മയുടെ മൊഴി പോലീസ് രേഖപ്പെടുത്തിയിട്ടുണ്ട്. ഇന്ന് വീട്ടിലെത്തി നടിയുടെ മൊഴിയും പോലീസെടുക്കും.
വ്യാഴാഴ്ചയാണ് യുവനടിക്ക് നഗരത്തിലെ ഷോപ്പിങ് മാളില്വെച്ച് ദുരനുഭവമുണ്ടായത്. ഇക്കാര്യം നടി സാമൂഹികമാധ്യമങ്ങളില് പങ്കുവെച്ചിരുന്നു. തുടര്ന്ന് പോലീസ് കേസെടുത്ത് അന്വേഷണം ആരംഭിക്കുകയായിരുന്നു.വനിത കമ്മീഷനും യുവജനകമ്മീഷനും സംഭവത്തില് ഇടപെട്ടിരുന്നു.
https://www.facebook.com/Malayalivartha