കഴിഞ്ഞ കുറേ ദിവസമായി മുഖ്യമന്ത്രി പിണറായി വിജയനും പ്രതിപക്ഷനേതാവ് രമേശ് ചെന്നിത്തലയും നടത്തിവരുന്ന വാക്‌പോര് തുടരുന്നു. പ്രതിപക്ഷനേതാവ് സര്‍ക്കാരിനെതിരെ പറയുന്ന കാര്യങ്ങള്‍ അദ്ദേഹത്തിന്റെ നാട്ടുകര്‍ പോലും വിശ്വസിക്കാത്തതും അംഗീകരിക്കാത്തതുമാണെന്ന് മുഖ്യമന്ത്രി പിണറായി വിജയന്‍ ആരോപിച്ചു. ചെന്നിത്തലയുടെ സ്വന്തം പഞ്ചായത്തില്‍ 2300 വോട്ടാണ് എല്‍.ഡി.എഫ് സ്ഥാനാര്‍ത്ഥി സജി ചെറിയാന് ലഭിച്ചത്. അദ്ദേഹത്തിന്റെ വീടിരിക്കുന്ന ബൂത്തില്‍ 457 വോട്ടാണ് ആകെ പോള്‍ ചെയ്തത്. അതില്‍ 280തും സജി ചെറിയാന് ലഭിച്ചു. അതിനാല്‍ സര്‍ക്കാരിനെതിരെ നടത്തുന്ന അപവാദപ്രചരണങ്ങള്‍ അദ്ദേഹത്തിന്റെ വീടിന് നാല് ചുറ്റും ഉള്ളവര്‍ പോലും വിശ്വസിക്കുന്നില്ല എന്ന് വ്യക്തമാണെന്നും മുഖ്യമന്ത്രി ചൂണ്ടിക്കാട്ടി. 

ജനങ്ങളോട് ഉത്തരം പറയേണ്ടാത്ത ചിലര്‍ സര്‍ക്കാരിനെതിരെ അപകീര്‍ത്തിപരമായ പ്രചരണങ്ങള്‍ നടത്തുന്നുണ്ട്. അവര്‍ക്കുള്ള തിരിച്ചടി കൂടിയാണ് ചെങ്ങന്നൂരിലെ വിധിയെന്നും മുഖ്യമന്ത്രി പറഞ്ഞു. എല്‍.ഡി.എഫ് സര്‍ക്കാര്‍ അധികാരത്തിലേറി 24 മണിക്കൂര്‍ തികയും മുമ്പ് സംസ്ഥാനത്തെ ക്രമസമാധാനനില തകര്‍ന്നെന്ന് ആരോപിച്ചയാളാണ് പ്രതിപക്ഷനേതാവ്. ഇത്തരത്തില്‍ മന്ത്രിസഭയ്‌ക്കെതിരെ നടത്തിയ അടിസ്ഥാനരഹിതമായ അപവാദപ്രചരണത്തിനുള്ള തിരിച്ചടിയാണ് ചെങ്ങന്നൂരില്‍ കിട്ടിയത്. മുതര്‍ന്ന കോണ്‍ഗ്രസ് നേതാവ് വി.എം സുധീരനും മുഖ്യമന്ത്രി രാജിവയ്ക്കണമെന്ന് ആവശ്യപ്പെടുന്നു. മന്ത്രിസഭ ഇല്ലാതാക്കണം എന്നാണ് ഇവരെല്ലാം ആഗ്രഹിക്കുന്നത്. ഇത് ദുരിദ്ദേശത്തോടെയുള്ള രാഷ്ട്രീയമാണ്. അത് കേരള ജനത തിരിച്ചറിഞ്ഞെന്നും പിണറായി വിജയന്‍ വ്യക്തമാക്കി. 

മുഖ്യമന്ത്രി രാജാവാണോ, അദ്ദേഹത്തിന് അകമ്പടിയായി 15 വാഹനങ്ങള്‍ എന്തിനാണെന്ന് പ്രതിപക്ഷനേതാവ് രമേശ് ചെന്നിത്തല വിമര്‍ശനം നടത്തിയിരുന്നു. കോട്ടയത്ത് ദുരഭിമാനകൊലക്ക് ഇരയായ കെവിന്റെ ഭാര്യ പരാതി നല്‍കാനെത്തിയപ്പോള്‍ മുഖ്യമന്ത്രിയുടെ സുരക്ഷാ ചുമതലയുള്ളതിനാല്‍ പറ്റില്ലെന്നും അത് കഴിഞ്ഞ് പരിശോധിക്കാമെന്നും ഗാന്ധിനഗര്‍ എസ്.ഐ പറഞ്ഞതിനെ തുടര്‍ന്നായിരുന്നു ചെന്നിത്തലയുടെ വിമര്‍ശനം. ഇക്കാര്യം മാധ്യമങ്ങള്‍ ശ്രദ്ധയില്‍പ്പെടുത്തിയപ്പോള്‍ ചെന്നിത്തല വിടുവായത്തം പറയുന്നയാളാണെന്നും അദ്ദേഹത്തിന് പ്രതിപക്ഷനേതാവിന്റെ സ്ഥാനം അറിയില്ലെന്നും മുഖ്യമന്ത്രി രൂക്ഷമായ ഭാഷയില്‍ വിമര്‍ശിച്ചു.

തൊട്ടുപിന്നിലെ നടത്തിയ വാര്‍ത്താസമ്മേളനത്തില്‍, മുഖ്യമന്ത്രിക്ക് സമനിലതെറ്റിയെന്നും അദ്ദേഹം പറയുന്നത് വിഡ്ഢിത്തമാണെന്നും പ്രതിപക്ഷനേതാവ് ആരോപിച്ചു. മുഖ്യമന്ത്രിയല്ല, മഹാരാജാവ് ആയാലും പറയാനുള്ളത് പറയുമെന്നും അത് ജനങ്ങളോടുള്ള ഉത്തരവാദിത്തമാണെന്നും ചെന്നിത്തല ആഞ്ഞടിച്ചു. മാധ്യമങ്ങള്‍ നാടിനെ അപമാനിക്കുന്നു എന്ന മുഖ്യമന്ത്രിയുടെ പ്രസ്താവന ശരിയല്ല, മുഖ്യമന്ത്രിയാണ് ജനങ്ങളെ അപമാനിക്കുന്നത്. മാധ്യമങ്ങളുടെ ജാഗ്രത കൊണ്ടാണ് സമൂഹത്തില്‍ പല കുറ്റകൃത്യങ്ങളും നടക്കാത്തതെന്നും പ്രതിപക്ഷനേതാവ് ചൂണ്ടിക്കാട്ടിയിരുന്നു. അതിന് പിന്നാലെയാണ് ഇന്ന് മുഖ്യമന്ത്രി അദ്ദേഹത്തിനെതിരെ വാര്‍ത്താസമ്മേളനത്തില്‍ അതിരൂക്ഷവിമര്‍ശനം നടത്തിയത്.