ഹാജിമാര് ഇന്ന് അറഫയില്; അറഫ മൈതാനം ആ മഹാസംഗമത്തിന് ഒരിക്കല്ക്കൂടിയാകുന്നു; 20 ലക്ഷത്തിലധികം വിശ്വാസികളാണ് ഇന്ന് ചരിത്ര ഭൂമികയില് ഒത്തുകൂടുന്നത്
എല്ലാം മറന്ന് ദേശവും ഭാഷയും വര്ണവും ഒന്നാകുന്ന മനുഷ്യ മഹാസംഗമത്തിന് അറഫ മൈതാനം ഒരിക്കല്ക്കൂടി സാക്ഷിയാകുന്ന ദിനമാണിന്ന്. ലളിത വസ്ത്രങ്ങളണിഞ്ഞ്, മൃദുമാനസനായി ദൈവസന്നിധിയില് വന്നണഞ്ഞ് വിതുമ്പിക്കേഴാന് എത്തിയ 20 ലക്ഷത്തിലധികം വിശ്വാസികളാണ് ഇന്ന് സംഗമിക്കുന്നത്.
മിനായില്നിന്നുള്ള തെരുവുകള് ഞായറാഴ്ച രാത്രിയോടെ 13 കിലോമീറ്റര് അകലെയുള്ള അറഫയിലേക്കൊഴുകുന്ന കാഴ്ചയായിരുന്നു. 'ലബ്ബൈക്കല്ലാഹുമ്മ ലബ്ബൈക്' എന്നു തുടങ്ങുന്ന നാഥനെ വാഴ്ത്തുന്ന തല്ബിയത്ത് മന്ത്രങ്ങളുമായാണ് തീര്ഥാടകര് അറഫയിലേക്കൊഴുകുന്നത്. മുഴുവന് തീര്ഥാടകരും ഉച്ചയോടെ അറഫയില് സംഗമിക്കും. നോക്കെത്താദൂരം മനുഷ്യസാഗരമാവും പിന്നെയിവിടം. ഉച്ചക്കും വൈകുന്നേരവുമുള്ള നമസ്കാരങ്ങള് ഇവിടെ ഒരുമിച്ച് നിര്വഹിക്കും. ഉച്ച മുതല് അസ്തമയം വരെ അറഫയില് നില്ക്കലാണ് ഹജ്ജിന്റെ മുഖ്യ ചടങ്ങ്. മനമുരുകിയ പ്രാര്ഥനയുടെയും കീര്ത്തനങ്ങളുടെയും മണിക്കൂറുകള്. നമീറ പള്ളിയില് നടക്കുന്ന അറഫ പ്രഭാഷണത്തിന് തീര്ഥാടകര് കാതോര്ക്കും.
അറഫയിലെ പ്രാര്ഥനകള് കഴിഞ്ഞ് സൂര്യാസ്തമയമാകുമ്പോള് മുസ്ദലിഫയിലെത്തി അവിടെ വിശ്രമിക്കും. ഇശാമഗ്രിബ് നമസ്കാരങ്ങള് ഒരുമിച്ച് നിര്വഹിക്കും. ദുല്ഹജ്ജ് 10 പുലരുന്നതോടെ മിനായിലെ കൂടാരങ്ങളിലേക്ക് തിരിച്ചുപോവും. അവിടെ രാത്രി താമസിച്ചാണ് പിന്നീടുള്ള കര്മങ്ങള്.
https://www.facebook.com/Malayalivartha
