ദുബായ് നഗരമധ്യത്തിലെ ഷോപ്പിങ് മാളിലേയ്ക്ക് നിയന്ത്രണം വിട്ട കാര്‍ പാഞ്ഞുകയറി രണ്ടുപേർക്ക് പരിക്കേറ്റതായി റിപ്പോർട്ടുകൾ. ബര്‍ ദുബായിലെ ബുര്‍ജുമാന്‍ ഷോപ്പിങ് മാളില്‍ രാവിലെ 10.50നായിരുന്നു അപകടമുണ്ടായത്.

എടിഎമ്മിനകത്തുണ്ടായിരുന്ന ഇടപാടുകാരില്‍ ഒരാള്‍ക്കും കാര്‍ ഓടിച്ചിരുന്നയാള്‍ക്കുമാണ് പരുക്കേറ്റത്. തലനാരിഴയ്‌ക്കായിരുന്നു വലിയൊരു അപകടത്തിൽ നിന്നും എടിഎമ്മിനകത്തുണ്ടായിരുന്ന മറ്റുള്ളവർ രക്ഷപ്പെട്ടത്.

എന്‍ബിഡി എടിഎമ്മിന്റെ പ്രധാന വാതില്‍ തകര്‍ത്താണ് കാര്‍ ഉള്ളിലേക്കു പാഞ്ഞുകയറിയത്. 51 കാരനായ ഏഷ്യന്‍ ഡ്രൈവറാണ് വാഹനമോടിച്ചിരുന്നതെന്നു ദുബായ് പോലീസ് മീഡിയാ വിഭാഗം തലവന്‍ ലഫ്.കേണല്‍ ഫൈസല്‍ അല്‍ ഖാസിം പറഞ്ഞു. പരുക്കേറ്റ രണ്ടുപേരെയും ആശുപത്രിയില്‍ പ്രവേശിപ്പിച്ചു.

ഡ്രൈവറുടെ അശ്രദ്ധയാണ് അപകട കാരണമെന്നും ഇത്തരത്തില്‍ ഈ വര്‍ഷം ഇതുവരെയുണ്ടായ 35 വാഹനാപകടങ്ങളില്‍ ആറു പേര്‍ മരിക്കുകയും 32 പേര്‍ക്ക് പരുക്കേല്‍ക്കുകയും ചെയ്തുവെന്ന് അധികൃതർ വ്യക്തമാക്കി. അതേസമയം രാത്രികാലങ്ങളിലാണ് മിക്ക അപകടങ്ങളും നടന്നത്.