ലോക വിപണിയില്‍ എണ്ണവിലയിലുണ്ടായ ഇടിവ് താല്‍ക്കാലിക പ്രതിഭാസം മാത്രമാണെന്നും ഗള്‍ഫ് രാജ്യങ്ങള്‍ക്ക് അതിനെ അതിജീവിക്കാനാകുമെന്നും ലുലു ഗ്രൂപ്പ് എം.ഡി എം.എ.യൂസഫലി. ബഹ്‌റൈന്‍ ദേശീയ ദിനത്തില്‍ ആ രാജ്യത്തെ പരമോന്നത ബഹുമതിയായ \'വിസാമുല്‍ ബഹ്‌റൈന്‍\' രാജാവില്‍ നിന്ന് ഏറ്റുവാങ്ങി തിരിച്ചത്തെിയ അദ്ദേഹം ദുബൈയില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു.
എണ്ണവില ഇതിനു മുമ്പും ഇടിഞ്ഞിട്ടുണ്ട്. തിരിച്ചുകയറിയിട്ടുമുണ്ട്. ദീര്‍ഘദര്‍ശിത്വത്തോടെ നിലപാടുകളും നയങ്ങളും സ്വീകരിക്കുക വഴി പ്രതിസന്ധിയെ മറികടക്കാന്‍ അറബ് ഭരണാധികാരികള്‍ക്ക് സാധിക്കുന്നു. എണ്ണയെ മാത്രം ആശ്രയിക്കാതെ സമ്പദ് ഘടനയെ ശക്തിപ്പെടുത്തുന്നതിന് മറ്റു മാര്‍ഗങ്ങള്‍ ഗള്‍ഫ് രാജ്യങ്ങള്‍ അവലംബിക്കുന്നുണ്ട്. ദുബൈ ഇതിന് മികച്ച ഉദാഹരണമാണ്.
വിനോദ സഞ്ചാരം, വ്യവസായം തുടങ്ങിയ മേഖലകളിലെ കുതിപ്പ് വഴി എണ്ണയെ ആശ്രയിക്കാതെ നിലനില്‍ക്കാമെന്ന് ദുബൈ തെളിയിച്ചിട്ടുണ്ട്. ഇപ്പോഴത്തെ വിലയിടിവ് മാറി പഴയ വിലയിലേക്ക് എണ്ണ എത്തുമെന്നും യൂസഫലി പറഞ്ഞു.
തനിക്ക് ബഹ്‌റൈന്‍ പരമോന്നത ബഹുമതി ലഭിച്ചതില്‍ ദൈവത്തെ സ്തുതിക്കുന്നതോടൊപ്പം ബഹ്‌റൈനിലെ മലയാളി സമൂഹത്തിനും നന്ദി പറയുന്നു. മലയാളികളും അവിടത്തെ ബിസിനസ് സമൂഹവും ഈ ബഹുമതിയില്‍ ഏറെ സന്തോഷിക്കുന്നുണ്ട്. ബഹ്‌റൈന് വേണ്ടി ചെയ്ത നിസ്തുല സേവനത്തിനാണ് ഈ അംഗീകാരം നല്‍കിയതെന്നാണ് രാജാവ് ഹമദ് ബിന്‍ ഈസ ആല്‍ഖലീഫ പറഞ്ഞത്. അവിടെ ആഭ്യന്തര പ്രശ്‌നങ്ങളുണ്ടായപ്പോള്‍ സര്‍ക്കാരിനോടും ജനങ്ങളോടും അടുത്തുപ്രവര്‍ത്തിക്കാനായതായി യൂസഫലി വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha