സുല്‍ത്താനേറ്റിന്റെ ചരിത്രത്തിലെ ഏറ്റവും വലിയ വികസന പ്രവര്‍ത്തനം നടക്കുന്ന മസ്‌കത്ത് അന്താരാഷ്ട്ര വിമാനത്താവളം നവീകരണത്തിന്റെ ആദ്യഘട്ടംഉദ്ഘാടനം ചെയ്തു. നിലവിലെ വിമാനത്താവളത്തില്‍നിന്ന് വിശിഷ്ടാതിഥികളുമായി എ 330 വിമാനം പുതിയ നാല് കീലോമീറ്റര്‍ നീളവും 60 മീറ്റര്‍ വീതിയുമുള്ള പുതിയ റണ്‍വേയില്‍ ഉച്ചക്ക് 12.40ന് പറന്നിറങ്ങിയതോടെയാണ് ഉദ്ഘാടനച്ചടങ്ങുകള്‍ ആരംഭിച്ചത്.

നവീകരണത്തിന്റെ ഒന്നാംഘട്ടമായ റണ്‍വേയുടെയും ട്രാഫിക് കണ്‍ട്രോള്‍ ടവറിന്റെയും സിവില്‍ ഏവിയേഷന്റെയും ഉദ്ഘാടനം ഗതാഗതം, കമ്യൂണിക്കേഷന്‍സ് മന്ത്രി അഹ്മദ് അല്‍ ഫുത്തൈസി നിര്‍വഹിച്ചു. വലിയ വിമാനങ്ങള്‍ ഇറക്കാന്‍ സൗകര്യമുള്ളതാണ് പുതിയ റണ്‍വേ. ഈ റണ്‍വേയെ നിലവിലെ പാസഞ്ചര്‍ ടെര്‍മിനലുമായി ബന്ധിപ്പിച്ചിട്ടുണ്ട്. നവംബര്‍ 18, സുല്‍ത്താന്‍ ഖാബൂസ് റോഡുകളുമായി പുതിയ വിമാനത്താവളത്തെ ബന്ധിപ്പിക്കുന്നുമുണ്ട്. പബ്‌ളിക് അതോറിറ്റി ഫോര്‍ സിവില്‍ ഏവിയേഷന്റെ കെട്ടിടവും മറ്റ് 12 കെട്ടിടങ്ങളും ഉള്‍ക്കൊള്ളുന്നതാണ് എയര്‍ ട്രാഫിക് കോംപ്‌ളക്‌സ്. കാലാവസ്ഥാ മുന്നറിയിപ്പ് കേന്ദ്രം, ഇന്‍ഫര്‍മേഷന്‍ സെന്റര്‍, ഇലക്ട്രിക് പ്രോബ് സൗകര്യം എന്നിവയും ഇവിടെയുണ്ട്.

പുതിയ റണ്‍വേ തിങ്കളാഴ്ച മുതല്‍ പ്രവര്‍ത്തിച്ചുതുടങ്ങും. ആദ്യഘട്ടത്തില്‍ ദിവസം അഞ്ച് മണിക്കൂറാണ് റണ്‍വേ പ്രവര്‍ത്തിക്കുക. ഉച്ചക്ക് ഒന്ന് മുതല്‍ വൈകീട്ട് ആറ് വരെയായിരിക്കും പ്രവര്‍ത്തനം. ജനുവരി ആദ്യ ആഴ്ച മുതല്‍ റണ്‍വേ മുഴുവന്‍ സമയവും പ്രവര്‍ത്തിച്ചു തുടങ്ങും.
മൊത്തം 180 കോടി ഡോളര്‍ ചെലവിട്ടാണ് നവീകരണം നടപ്പാക്കുന്നത്. നിര്‍മാണം പൂര്‍ണമായും പൂര്‍ത്തിയാകുന്നതോടെ പ്രതിവര്‍ഷം 1.2 കോടി യാത്രക്കാരെ ഉള്‍ക്കൊള്ളാനുള്ള ശേഷിയും മസ്‌കത്തിന് കൈവരും. ഇതിലൂടെ മിഡ്‌ലീസ്റ്റിലെ മികച്ച വിമാനത്താവളങ്ങളിലൊന്നായി മസ്‌കത്ത് കുതിപ്പ് നടത്തും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha