ഇനി പറക്കും ആംബുലന്‍സ്
കുവൈറ്റില്‍ ചികിത്സാ രംഗത്ത് മാറ്റത്തിന്റെ കാറ്റുമായി പറക്കും ആംബുലന്‍സ് സര്‍വീസ് അടുത്ത ജനുവരിയോടെ ആരംഭിക്കുമെന്ന് ആരോഗ്യമന്ത്രാലയം വ്യക്തമാക്കി. മന്ത്രാലയത്തിലെ മെഡിക്കല്‍ സേവനകാര്യങ്ങളുമായി ബന്ധപ്പെട്ട അണ്ടര്‍ സെക്രട്ടറി ഡോ. ജമാല്‍ അല്‍ഹറബിയാണ് ഇക്കാര്യം വ്യക്തമാക്കിയത്. ഇതിനായി മൂന്ന് ഹെലികോപ്ടറുകള്‍ മന്ത്രാലയം അമേരിക്കയില്‍നിന്ന് വാങ്ങിയിട്ടുണ്ട്.
പ്രാഥമികഘട്ടം എന്നനിലക്ക് ആറുമാസത്തേക്ക് ഈ മൂന്ന് ഹെലികോപ്ടറുകളെയായിരിക്കും ആംബുലന്‍സ് സര്‍വീസുകള്‍ക്കായി ഉപയോഗിക്കുക. തുടര്‍ന്ന് സാധ്യതകള്‍ വിലയിരുത്തിയ ശേഷം ഇതിനായി കൂടുതല്‍ ഹെലികോപ്ടറുകള്‍ വരുത്തിക്കുകയാണ് ചെയ്യുക. മൂന്ന് ഹെലികോപ്ടറുകളില്‍ രണ്ടെണ്ണം അബ്ദുല്ല അല്‍ മുബാറക് താവളത്തിലും മൂന്നാമത്തേത് സഅദ് അല്‍ അബ്ദുല്ല വിമാനത്താവളത്തിലുമാണ് നിര്‍ത്തിയിട്ടിരിക്കുന്നത്. ആംബുലന്‍സ് സേവനം ആരംഭിക്കുന്നതോടെ മൂന്ന് ഹെലികോപ്ടറുകളും ഫര്‍വാനിയ, അദാന്‍, ജഹ്‌റ എന്നിവിടങ്ങളിലെ പ്രത്യേക താവളങ്ങളിലേക്ക് മാറ്റും.
വാഹനാപകടങ്ങളുണ്ടാകുമ്പോള്‍ റോഡില്‍നിന്നും ജനങ്ങളില്‍നിന്നും ചുരുങ്ങിയത് 30 മീറ്റര്‍ ദൂരെയായിരിക്കും സര്‍വസന്നാഹങ്ങളുമായി ഹെലികോപ്ടര്‍ ആംബുലന്‍സുകള്‍ പറന്നിറങ്ങുക. അല്‍ സഫ്വ സെക്യൂരിറ്റി ആന്‍ഡ് ഡിഫന്‍സ് സിസ്റ്റംസ് കമ്പനിയുമായി സഹകരിച്ചാണ് ഹെലികോപ്ടര്‍ ആംബുലന്‍സ് സര്‍വീസ് നടത്തുക.
കമ്പനി അസിസ്റ്റന്റ് എക്‌സിക്യൂട്ടിവ് മേധാവി എന്‍ജിനീയര്‍ അലി അല്‍ ഫൗദരിയാണ് ഇക്കാര്യം വ്യക്തമാക്കിയത്. സബാഹ് മെഡിക്കല്‍ ഏരിയയില്‍ പറക്കും ആംബുലന്‍സുകള്‍ക്കുവേണ്ടി ഹെലിപാഡ് സ്ഥാപിക്കാന്‍ നീക്കം തുടങ്ങിയിട്ടുണ്ട്. അതിന്റെ പ്രവര്‍ത്തനം പൂര്‍ത്തിയാവുന്നതുവരെ കുവൈത്ത് വിമാനത്താവളത്തിലെ സഅദ് അല്‍ അബ്ദുല്ല ടെര്‍മിനലിനോട് ചേര്‍ന്നുള്ള ഹെലിപാഡാണ് പറക്കും ആംബുലന്‍സുകള്‍ക്കായി ഉപയോഗിക്കുക. റിട്ടയേഡ് പൈലറ്റുമാരും മറ്റുമായിരിക്കും ഇവ പറത്തുക. പുതിയ പൈലറ്റുമാര്‍ക്കും ഇതിനായി പരിശീലനം നല്‍കുന്നുണ്ട്. മണിക്കൂറില്‍ 237 കിലോമീറ്റര്‍ വേഗത്തില്‍ പറക്കുന്ന ഹെലികോപ്ടറുകളില്‍ പരിക്കേറ്റ രണ്ടുപേര്‍ക്ക് പുറമെ ഒരാള്‍ക്ക് രണ്ട് സഹായികളെയും പ്രവേശിപ്പിക്കും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
