ഇന്ത്യന് വിസക്ക് ബാങ്ക് ഗാരന്റി ഏര്പ്പെടുത്താന് നീക്കം
വീട്ടുവേലക്കാരികളെ റിക്രൂട്ട് ചെയ്യുന്നതിന് സ്പോണ്സര് 720 ദീനാര് ബാങ്ക് ഗാരന്റി കെട്ടിവെക്കണമെന്ന നിബന്ധനയില് ഇന്ത്യ വിട്ടുവീഴ്ചക്ക് തയാറാവാത്ത സാഹചര്യത്തില് കുവൈത്ത് സര്ക്കാറും മറുനിബന്ധനയുമായി പകരംവീട്ടാനൊരുങ്ങുന്നു.
ഇന്ത്യയില്നിന്ന് സര്ക്കാര്, സ്വകാര്യ മേഖലകളിലെ തൊഴില്വിസയില് കുവൈത്തിലേക്ക് വരുന്നവര് നാട്ടിലെ കുവൈത്ത് എംബസിയില്നിന്ന് വിസ സ്റ്റാമ്പ് ചെയ്യിക്കുമ്പോള് 750 ദീനാറിന് തുല്യമായ സംഖ്യ ബാങ്ക് ഗാരന്റിയായി നല്കണമെന്ന വ്യവസ്ഥ കൊണ്ടുവരാനാണ് നീക്കം നടക്കുന്നതെന്ന് സര്ക്കാറുമായി അടുത്ത വൃത്തങ്ങള് സൂചന നല്കി.
ഇതുസംബന്ധിച്ച് കുവൈത്ത് ആഭ്യന്തര, വിദേശ, തൊഴില് മന്ത്രാലയങ്ങളിലെ ഉന്നത ഉദ്യോഗസ്ഥര് ചര്ച്ച നടത്തിവരുകയാണെന്നും ഇക്കാര്യത്തില് ഉടന് തീരുമാനമുണ്ടായേക്കുമെന്നുമാണ് റിപ്പോര്ട്ട്.
ഇന്ത്യയില്നിന്നുള്ള വീട്ടുവേലക്കാരികളെ കൊണ്ടുവരുന്നതിന് സ്പോണ്സര് 720 ദീനാര് ബാങ്ക് ഗാരന്റിയായി നല്കണമെന്ന നിബന്ധന ഈവര്ഷം സെപ്റ്റംബര് മുതല് കുവൈത്തിലെ ഇന്ത്യന് എംബസി നടപ്പാക്കിത്തുടങ്ങിയതാണ് ഇരുരാജ്യങ്ങള്ക്കുമിടയിലെ നയതന്ത്ര ബന്ധത്തെ വരെ ബാധിക്കും വിധത്തിലുള്ള വിവാദമായി വളര്ന്നത്.
ഇത്തരമൊരു നിബന്ധന കുവൈത്തിന്റെ ആഭ്യന്തര കാര്യത്തിലുള്ള ഇടപെടലാണെന്നും സ്വദേശികള്ക്ക് അമിതഭാരം ചുമത്തുന്നതാണെന്നും വാദമുയര്ത്തി കുവൈത്ത് പാര്ലമെന്റിലും മാധ്യമങ്ങളിലുമൊക്കെ വന് വിമര്ശമുയര്ന്നിരുന്നു. തുടര്ന്ന് ഇന്ത്യക്കാര്ക്ക് വിസനിരോധം ഏര്പ്പെടുത്തുന്നതടക്കമുള്ള കടുത്ത നടപടികള്ക്ക് ഒരുങ്ങുകയാണ് കുവൈത്ത് എന്നുവരെയുള്ള റിപ്പോര്ട്ടുകള് വന്നു. ഇതിനിടെ, ഇന്ത്യന് എംബസി അധികൃതരും കുവൈത്ത് വിദേശകാര്യ മന്ത്രാലയവുമായി പലതവണ ചര്ച്ച നടന്നെങ്കിലും മഞ്ഞുരുകിയില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha