കാറിൽ മറന്നുവെച്ച 500 കുവൈത്ത്‌ ദിനാറും (ഏകദേശം 1,20,000 രൂപ) വിലപ്പെട്ട രേഖകളും കാണാതായതോടെ ആ മനുഷ്യന്റെ ചങ്കോന്നു പിടഞ്ഞു. എന്നാൽ സാധനം മലയാളിയുടെ കയ്യിൽ ... നടന്നത് ഏറ്റവും മാതൃകാപരമായ പ്രവർത്തികൾ . കുവൈത്തിൽ കാറിൽ മറന്നുവെച്ച 500 കുവൈത്ത്‌ ദിനാറും (ഏകദേശം 1,20,000 രൂപ) വിലപ്പെട്ട രേഖകളും ഉടമയ്ക്ക് തിരികെ നൽകി മലയാളി ടാക്സി ഡ്രൈവർ മാതൃകയായി. കോവിഡ് പ്രതിസന്ധികാരണം അഞ്ചുമാസമായി വരുമാനമില്ലാതെ സാമ്പത്തിക ബുദ്ധിമുട്ട് അനുഭവിക്കുന്നതിനിടയിലും നന്മ കൈ വിടാതെ വർക്കല സ്വദേശി അനിൽ.

കഴിഞ്ഞദിവസം രാത്രി എട്ടരയ്ക്കാണ് അനിലിന്റെ ടാക്സിയിൽ ഫിലിപ്പീൻസ് സ്വദേശിയും കുടുംബവും യാത്രചെയ്തത്. യാത്രയ്ക്കിടയിൽ പണവും വിലപ്പെട്ട രേഖകളും അടങ്ങിയ പേഴ്സ് യാത്രക്കാരൻ വാഹനത്തിൽ മറന്നുവെച്ചു. പിറ്റേന്ന് വാഹനം വൃത്തിയാക്കുന്നതിനിടയിലാണ് പണമടങ്ങിയ പേഴ്സ് അനിലിന്റെ ശ്രദ്ധയിൽപ്പെട്ടത്.ഇതോടെ കുവൈത്തിലെ ടാക്സി ഡ്രൈവർമാരുടെ കൂട്ടായ്മയായ യാത്ര കുവൈത്തിന്റെ വാട്സാപ്പ് ഗ്രൂപ്പിൽ വിവരമറിയിച്ചു. സംഘടനാ പ്രവർത്തകർ വിവിധ മണിഎക്സ്ചേഞ്ചുകൾ വഴിയും വാട്സാപ്പ് ഗ്രൂപ്പുകൾ വഴിയും സിവിൽ ഐഡി നമ്പർ നൽകി ഉടമയുടെ ഫോൺ നമ്പർ കണ്ടെത്തി. തുടർന്ന് പണവും രേഖകളും തിരികെ നൽകി. ഏറെ സന്തോഷത്തോടെയും നന്ദിയോടെയുമാണ് ഫിലിപ്പീൻസ് സ്വദേശി അനിലിന്റെ കൈയിൽനിന്ന് പണവും രേഖകളും ഏറ്റുവാങ്ങിയത്.സംഭവം ഇതിനകം സാമൂഹിക മാധ്യമങ്ങളിൽ വൈറലായതോടെ അനിലിന് മലയാളികളടക്കമുള്ളവരുടെ അഭിനന്ദനപ്രവാഹമാണിപ്പോൾ. എന്തായാലും അദ്ദേഹം മലയാളികളുടെ മാനം അന്യനാട്ടിൽ കാത്തിരിക്കുകയാണ്.