എല്ലാ ഗൾഫ് രാഷ്ട്രങ്ങളിലും കൊവിഡ് പ്രതിരോധ വാക്‌സിന്റെ വിതരണം പുരോഗമിച്ച്‌ വരികയാണ്. ആദ്യ ഘട്ടത്തില്‍ പ്രായമായവര്‍ക്കും വിട്ടുമാറാത്ത അസുഖങ്ങളുള്ളവര്‍ക്കും ശ്വാസകോശ-വൃക്ക സംബന്ധമായ രോഗങ്ങളുള്ളവര്‍ക്കും കൊവിഡ് പ്രതിരോധത്തിന്റെ മുന്‍നിരയില്‍ പ്രവര്‍ത്തിക്കുന്ന ആരോഗ്യ പ്രവര്‍ത്തകര്‍ക്കുമാണ് വാക്‌സിന്‍ നൽകുന്നത്. പതിനായിരക്കണക്കിനാളുകള്‍ വാക്‌സിന്‍ സ്വീകരിച്ച് തുടങ്ങിയതോടെ ഇവര്‍ക്ക് വിദേശ യാത്ര നടത്താന്‍ പറ്റുമോ എന്ന സംശയം ഉയര്‍ന്നു വന്ന സാഹചര്യത്തില്‍ ഇക്കാര്യത്തില്‍ വ്യക്തത വരുത്തി രംഗത്തെത്തിയിരിക്കുകയാണ് ഖത്തര്‍ ആരോഗ്യ വകുപ്പ് രംഗത്ത് എത്തിയിരിക്കുകയാണ്.

ഹമദ് ആശുപത്രി മെഡിക്കല്‍ ഡയറക്ടര്‍ ഡോ. യൂസുഫ് അല്‍ മസ്ലമാനിയാണ് വിശദീകരണവുമായി രംഗത്തുവന്നിരിക്കുന്നത്. രാജ്യത്ത് രണ്ട് ഡോസ് ആയാണ് കൊവിഡ് വാക്‌സിന്‍ മുന്‍ഗണനാ ക്രമത്തില്‍ ജനങ്ങള്‍ക്കിടയില്‍ വിതരണം ചെയ്തു വരുന്നത്. ആദ്യ ഡോസെടുത്ത് മൂന്ന് ആഴ്ച പൂര്‍ത്തിയാക്കിയ ശേഷമാണ് രണ്ടാം ഡോസ് കുത്തിവയ്ക്കുന്നത്. ഇങ്ങനെ രണ്ടാം ഡോസും എടുത്ത് ഒരു വാരം പൂര്‍ത്തിയാക്കിയവര്‍ക്ക് വിദേശയാത്ര ചെയ്യുന്നതില്‍ തടസ്സമില്ലെന്ന് അദ്ദേഹം വ്യക്തമാക്കുകയുണ്ടായി. രണ്ടാം ഡോസിന് ശേഷവും ആരോഗ്യ പ്രശ്‌നങ്ങളൊന്നുമില്ലെന്ന് ഉറപ്പുവരുത്തുന്നതിനു വേണ്ടിയാണിത് ചെയ്യുന്നതെന്നും അദ്ദേഹം പറഞ്ഞു.