മഹാഭാഗ്യം വീണ്ടും മലയാളി യുവാവിനെ തേടിയെത്തിയിരിക്കുന്നു. ദുബായ് ഡ്യൂട്ടി ഫ്രീ നറുക്കെടുപ്പില്‍ പ്രവാസി മലയാളിക്ക് കോടികളുടെ സമ്മാനം. അബുദാബിയില്‍ ജോലി ചെയ്യുന്ന എറണാകുളം മുളന്തുരുത്തി സ്വദേശി സൂരജ് അനീദിനാണ് ഏഴുകോടിയിലേറെ രൂപ അതായത് 10 ലക്ഷം യു.എസ് ഡോളര്‍ സമ്മാനം ലഭിച്ചത്. ജനുവരി 20ന് ഓണ്‍ലൈന്‍ വഴിയാണ് സൂരജ് അനീദ് ടിക്കറ്റെടുത്തത്. 350ാം സീരീസിലെ 4645 എന്ന ടിക്കറ്റ് നമ്പറിലാണ് സൂരജിനെത്തേടി ഭാഗ്യമെത്തിയത്.

ബുധനാഴ്ച നടന്ന നറുക്കെടുപ്പില്‍ വിജയിയായ വിവരം ഫെയ്സ്ബുക്ക് ലൈവിലൂടെയാണ് ഇദ്ദേഹം അറിയുന്നത്. വീഡിയോയില്‍ തന്റെ പേര് വിജയിയായി പ്രഖ്യാപിച്ചപ്പോള്‍ വിശ്വസിക്കാനായില്ലെന്ന് സൂരജ് പറയുന്നു. ദുബായ് ഡ്യൂട്ടി ഫ്രീ നറുക്കെടുപ്പില്‍ സമ്മാനം നേടുന്ന 175മത് ഇന്ത്യക്കാരനാണ് ഇദ്ദേഹം. കഴിഞ്ഞ അഞ്ചുവര്‍ഷമായി സൂരജ് യു.എ.ഇ.യിലുണ്ട്.


ബാങ്കിലെ കസ്റ്റമര്‍ സര്‍വീസ് വിഭാഗത്തില്‍ ജോലിചെയ്യുന്ന സൂരജ് ഭാര്യയ്ക്കും മകള്‍ക്കുമൊപ്പം അബുദാബിയിലാണ് താമസം. ഡ്യൂട്ടി ഫ്രീ ബിഗ് ടിക്കറ്റിന്റെ മുഴുവന്‍ നറുക്കും ഇന്ത്യക്കാര്‍ക്ക്. ഒന്നാംസമ്മാനമായ 15 ദശലക്ഷം ദിര്‍ഹത്തിന് 30 കോടിയോളം രൂപ തസ്ലീന പുതിയപുരയില്‍ അര്‍ഹയായി.


ഓണ്‍ലൈനായി എടുത്ത 291310 നമ്പര്‍ ടിക്കറ്റിലൂടെയാണ് തസ്ലീനയെ ഭാഗ്യം തേടിയെത്തിയത്. രണ്ടുംമൂന്നും സമ്മാനങ്ങള്‍ യഥാക്രമം പ്രേംമോഹന്‍, അലി അസ്‌കര്‍ എന്നിവര്‍ നേടി. എട്ട് കാഷ് നറുക്കുകളും ഒരു ആഡംബര വാഹന നറുക്കുമാണ് നടന്നത്.