കാമുകിക്ക് സർപ്രൈസ് ആയി നൽകാൻ ഒട്ടകക്കുഞ്ഞിനെ മോഷ്ടിച്ച യുവാവിനെ പോലീസ് അറസ്റ്റു ചെയ്തു. ദുബായിലെ ഒരു ഫാമിൽ നിന്നാണ് ഇയാൾ ഒട്ടകത്തെ മോഷ്ടിച്ചത്. കാമുകിക്ക് ജന്മദിന സമ്മാനമായി നൽകാനായിരുന്നു തീരുമാനിച്ചിരുന്നത്. ഒട്ടകക്കുഞ്ഞിനെ ഫാമിൽ നിന്ന് കാണാതായതായി പോലീസിൽ ഉടമസ്ഥർ പരാതി നൽകിയിരുന്നു.

കുറച്ച് ദിവസങ്ങൾക്ക് ശേഷം ഒട്ടകത്തെ തന്റെ ഫാമിനരികിൽ നിന്ന് ലഭിച്ചതായി യുവാവ് തന്നെ പോലീസിനെ അറിയിക്കുകയായിരുന്നു. മോഷണ വിവരം പുറത്തറിഞ്ഞേക്കുമെന്ന ഭയത്താൽ യുവാവും കാമുകിയും മെനഞ്ഞ കഥയായിരുന്നു അത്.

ഇതിൽ അവിശ്വസനീയത തോന്നിയ പോലീസ് നടത്തിയ വിശദമായ ചോദ്യം ചെയ്യലിലാണ് സത്യം മനസ്സിലായത്. ഒട്ടകം മോഷ്ടിക്കപ്പെട്ട ഫാമും യുവാവിന്റെ ഫാമും തമ്മിൽ മൂന്ന് കിലോ മീറ്ററിലധികം ദൂരമുണ്ടായിരുന്നു. പ്രധാന പാതയും ഇതിലൂടെയാണ്.

ഒട്ടകക്കുഞ്ഞ് ഒരിക്കലും ഇത്രയും ദൂരം നടന്നുവരില്ലെന്ന പോലീസിന്റെ നിഗമനത്തിലൂന്നിയ ചോദ്യം ചെയ്യൽ ഒടുവിൽ ഫലം ചെയ്യുകയായിരുന്നു. ഒടുവിൽ ഒട്ടകത്തെ ഉടമയ്ക്ക് നൽകി. യുവാവിനെയും യുവതിയെയും തുടർനടപടികൾക്ക് വിധേയമാക്കിയതായി ദുബായ് പോലീസ് ഡയറക്ടർ ബ്രിഗേഡിയർ അബ്ദുല്ല ഖാദിം പറഞ്ഞു.