പ്രവാസികൾക്ക് മുന്നറിയിപ്പ് നൽകി സൗദി അറേബ്യ. ഇവിടെ നിന്നും ഫൈനൽ എക്സിറ്റ് വിസക്ക് അപേക്ഷിക്കാൻ പാസ്സ്‌പോർടിനു 60 ദിവസമോ അതിനു മുകളിലോ കാലാവധി ഉണ്ടായിരിക്കണമെന്ന് സൗദി അറേബ്യയിലെ ജനറൽ ഡയറക്ടറേറ്റ് ഓഫ് പാസ്‌പോർട്ട് (ജവാസത്ത്) വ്യക്തമാക്കിയിരിക്കുകയാണ്. ചോദ്യത്തിന് മറുപടിയായി ജവാസത്തിന്റെ ഔദ്യോഗിക ട്വിറ്റർ അക്കൗണ്ട് വഴിയാണ് ഇക്കാര്യം വ്യക്തമാക്കിയിരിക്കുന്നത്. പാസ്സ്പോർട് കാലാവധി കഴിഞ്ഞിട്ടെല്ലിങ്കിൽ ഇലക്ട്രോണിക് സംവിധാനത്തിലൂടെ ഫൈനൽ എക്സിറ്റ് വിസ ലഭ്യമാക്കാമെന്നും ജവാസാത് പറഞ്ഞു.

അതേസമയം പ്രവാസികള്‍ പ്രധാനമായും ജോലി ചെയ്യുന്ന റസ്റ്ററന്റുകള്‍, കഫേകള്‍, ഹൈപ്പര്‍ മാര്‍ക്കറ്റുകള്‍, മാളുകള്‍ തുടങ്ങിയ സ്ഥാപനങ്ങളിലെ ജോലികള്‍ കൂടി സ്വദേശിവല്‍ക്കരിക്കാന്‍ തീരുമാനിച്ചതായി സൗദി മനുഷ്യവിഭവ – സാമൂഹ്യ വികസന മന്ത്രാലയം അറിയിക്കുകയുണ്ടായി. ഇതിനുള്ള നടപടികള്‍ ഉടന്‍ തന്നെ ആരംഭിക്കുമെന്നും മന്ത്രി അഹ്മദ് അല്‍ റാജിഹി വ്യക്തമാക്കി. സ്വകാര്യ മേഖലയില്‍ സൗദികള്‍ക്ക് കൂടുതല്‍ തൊഴിലവസരങ്ങള്‍ സൃഷ്ടിക്കുന്നതിന്റെ ഭാഗമായാണ് ഇത്തരത്തിൽ നടപടി സ്വീകരിക്കുന്നത്. എന്നാല്‍ റസ്റ്ററന്റുകളിലെയും മറ്റും ഏതൊക്കെ ജോലികളാണ് സ്വദേശികള്‍ക്ക് മാത്രമാക്കുകയെന്ന കാര്യം മന്ത്രി ഇതുവരെ വ്യക്തമാക്കിയിട്ടില്ല.