ദുബൈക്ക് പിന്നാലെ അബൂദബി, ഷാർജ എന്നീ എമിറേറ്റുകൾ അനുവദിച്ച വിസിറ്റ്, ടൂറിസ്റ്റ് വിസകളുടെയും കാലാവധി നീട്ടിയതായി റിപ്പോർട്ട്. മാർച്ച് 31 വരെയാണ് വിസയുടെ കാലാവധി നീട്ടി നൽകിയിരിക്കുന്നത്. 2020 സെപ്തംബർ 10ന് ശേഷം അനുവദിച്ചതോ കാലഹരണപ്പെട്ടതോ ആയ വിസകൾക്ക് പുതിയ തീരുമാനം ബാധകമാവുന്നതാണ്.

അത്തരം വിസക്കാർക്ക് രാജ്യത്ത് മാർച്ച് 31വരെ പിഴയൊന്നും നൽകാതെ തന്നെ യു.എ.ഇയിൽ തുടരാൻ സാധിക്കുകയും ചെയ്യും. ഈ കാലയളവിൽ ഒളിച്ചോടിയതായി കാണിച്ച് സ്പോണ്‍സര്‍മാര്‍ പരാതിപ്പെട്ടവർക്ക് പോലും അവരുടെ വിസക്ക് സാധുത ലഭിക്കും. പ്രവാസികളായ മലയാളികൾ ഉൾപ്പെടെ നൂറുകണക്കിന് പേർക്ക് ഇതിന്റെ പ്രയോജനം ലഭിക്കുന്നതാണ്.

കൊറോണ വ്യാപനം മൂലം ഉണ്ടായ യാത്രാവിലക്കുകളും പ്രതിസന്ധികളും കാരണം യു.എ.ഇയിൽ കുടുങ്ങിപ്പോയ പ്രവാസികൾക്കും ഇത് ഏറെ പ്രയോജനം ചെയ്യുമെന്ന് അധികൃതർ വ്യക്തമാക്കി. സെപ്തംബർ 10ന് ശേഷം അനുവദിച്ച എല്ലാ വിസിറ്റ്, ടൂറിസ്റ്റ് വിസകളുടെയും കാലാവധി മാർച്ച് 31 വരെ ദീർഘിപ്പിച്ചതായാണ് സ്മാർട്ട് ചാനലിൽ വ്യക്തമാക്കുന്നത്. എന്നാൽ ഔദ്യോഗികമായുള്ള അറിയിപ്പുകളൊന്നും ഇല്ലെങ്കിലും വിസ കാലാവധി നീട്ടിയതായാണ് സിസ്റ്റത്തിൽ കാണിക്കുന്നത്.

അതേസമയം കുവൈറ്റും ഇന്ത്യയും തമ്മിലുള്ള യാത്രാവിമാന വിലക്ക് മാര്‍ച്ച് 31 വരെ നീട്ടിയതായി ഇന്ത്യന്‍ ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ (ഡിജിസിഎ) അറിയിച്ചു. കൊവിഡ് വ്യാപനത്തെ തുടര്‍ന്നുള്ള യാത്രാ നിരോധനത്തിന്റെ പശ്ചാത്തലത്തില്‍ കഴിഞ്ഞ വര്‍ഷം മര്‍ച്ച് 23നായിരുന്നു കുവൈറ്റിലേക്കുള്ള വിമാനങ്ങള്‍ ഇന്ത്യ നിര്‍ത്തിവച്ചത്. ഫെബ്രുവരി 28ഓടെ അത് അവസാനിക്കുമെന്നാണ് നേരത്തേ അറിയിച്ചിരുന്നതെങ്കിലും ഒരു മാസത്തേക്കു കൂടി വിലക്ക് നീട്ടുകയായിരുന്നു. നിലവില്‍ എല്ലാ രാജ്യങ്ങളില്‍ നിന്നുമുള്ള വിദേശികള്‍ക്കും കുവൈറ്റിലേക്ക് യാത്രാ വിലക്ക് ഏര്‍പ്പെടുത്തിയിരിക്കുകയാണ് അധികൃതര്‍.

ഇരുരാജ്യങ്ങള്‍ക്കുമിടയിലെ കാര്‍ഗോ, ചാര്‍ട്ടേര്‍ഡ് വിമാന സര്‍വീസുകള്‍ തുടരും. നിലവില്‍ കുവൈറ്റില്‍ നിന്ന് ഇന്ത്യയിലേക്ക് മാത്രമാണ് ചാര്‍ട്ടേര്‍ഡ് വിമാനങ്ങള്‍ സര്‍വീസ് നടത്തുന്നത്. കുവൈറ്റിലേക്ക് നേരിട്ടുള്ള ഒരു വിമാനവും സര്‍വീസ് നടത്താന്‍ കുവൈത്ത് അധികൃതര്‍ അനുവാദം നല്‍കിയിട്ടില്ല. കൊവിഡ് വ്യാപനം രൂക്ഷമാണെന്ന പേരില്‍ ഇന്ത്യയുള്‍പ്പെടെയുള്ള 60ലേറെ രാജ്യങ്ങളില്‍ നിന്നുള്ള വിമാനങ്ങള്‍ക്ക് വിലക്കേര്‍പ്പെടുത്തിയിരിക്കുകയാണ് കുവൈത്തിപ്പോള്‍.