തൊഴിലാളികൾ സഞ്ചരിച്ചിരുന്ന ബസ് അപകടത്തിൽപെട്ട് 10 പേർക്ക്‌ പരിക്കേൽക്കുകയായിരുന്നു. ദുബായ് ഉമ്മുൽസുഖീം റോഡിൽ വ്യാഴാഴ്ചരാവിലെ ആറ് മണിക്കായിരുന്നു അപകടം നടന്നത്. ഇത്രയും വലിയ അപകടം നടന്നിട്ടും ആളപായമില്ല എന്നത് ആശ്വാസകരമായതാണ്.

ഡ്രൈവർ ഉറങ്ങിപ്പോയതാണ് അപകടകാരണമെന്ന് ദുബായ് പോലീസ് ട്രാഫിക് ഡിപ്പാർട്ട്‌മെന്റ് ഡയറക്ടർ ബ്രിഗേഡിയർ സെയ്ഫ് മുഹൈർ അൽ മസ്രൂയി പറഞ്ഞു. ബസ് റോഡിന്റെ ഇടതുവശത്തേക്ക് തെന്നിമാറുകയും ബാരിയറിൽ തട്ടി മറിയുകയുമായിരുന്നുവെന്നാണ് പ്രാഥമിക റിപ്പോർട്ട്.

സായിദ് ബിൻ ഹംദാൻ അൽ നഹ്യാൻ റൗണ്ട് എബൗട്ടിന് ശേഷം ശൈഖ് സായിദ് റോഡിലേക്കുള്ള ദിശയിലാണ് അപകടമുണ്ടായത്. ബസിൽ 32 പേരുണ്ടായിരുന്നു. ഡ്രൈവർക്ക് മതിയായ ഉറക്കമോ വിശ്രമമോ ലഭിച്ചിരുന്നില്ലെന്നും അതാണ് അപകടമുണ്ടാക്കിയതെന്നും പോലീസ് അറിയിച്ചു.

അപകടവിവരം അറിഞ്ഞയുടൻ രക്ഷാപ്രവർത്തകർ സംഭവസ്ഥലത്തെത്തി. പരിക്കേറ്റവരെ ആശുപത്രിയിലേക്ക് മാറ്റി. കമ്പനികൾ സ്വന്തം ഡ്രൈവർമാരുമായി നിരന്തരം ആശയവിനിമയം നടത്തണമെന്നും തൊഴിലാളികൾക്ക് മതിയായ വിശ്രമം ലഭിക്കുന്നുണ്ടോയെന്ന് ശ്രദ്ധിക്കണമെന്നും അൽ മസ്രൂയി ഓർമിപ്പിച്ചു.

ഡ്രൈവർക്ക് കൃത്യമായ ഉറക്കം കിട്ടാത്തതിനെ തുടർന്നായിരുന്നു ഇത്തരത്തിൽ ഒരു അപകടം സംഭവിച്ചത്. എന്നാൽ വമ്പൻ അപകടം തലനാരിഴയ്ക്കാണ് ഒഴിഞ്ഞുമാറിയത്.