കൊറോണ വ്യാപനം നൽകിയ പ്രതിസന്ധികൾക്കിടയിലും തളരാതെ യുഎഇ. പ്രത്യേക ഓഫറുകളുമായി യാത്രക്കാരെ കാത്തിരിക്കുകയാണ് ദുബായ്. ഇന്ത്യയില്‍ നിന്ന് ദുബായിലേക്കുള്ള യാത്രക്കാര്‍ക്ക് പ്രത്യേക ഓഫറുകളുമായി എമിറേറ്റ്സ് എയര്‍ലൈന്‍സ് രംഗത്ത് എത്തിയിരിക്കുകയാണ്. രണ്ടു രാത്രി സൗജന്യ ഹോട്ടല്‍ താമസം, 10 കിലോഗ്രാംവരെ അധിക ബാഗേജ് അലവന്‍സ്, പ്രത്യേക വിമാനനിരക്കുകള്‍ എന്നിവ ഉള്‍പ്പെടെയാണ് വാഗ്ദാനം നൽകുന്നത്.

മാര്‍ച്ച്‌ 15 നും ജൂണ്‍ 30 നും ഇടയില്‍ യാത്ര ചെയ്യുന്നതിനായി മാര്‍ച്ച്‌ 8 മുതല്‍ 28 വരെ ദുബായിലേക്ക് റിട്ടേണ്‍ എക്കണോമി ക്ലാസ് ടിക്കറ്റ് ബുക്ക് ചെയ്യുന്ന ഇന്ത്യയില്‍ നിന്നുള്ള ഇക്കോണമി ക്ലാസ് യാത്രക്കാര്‍ക്കാണ് ആനുകൂല്യം ലഭിക്കുക എന്ന് അധികൃതർ വ്യക്തമാക്കി. ദുബായ് ആസ്ഥാനമായുള്ള കാരിയര്‍ ഖലീജ് ടൈംസിന് നല്‍കിയ പ്രസ്താവനയിലാണ് എമിറേറ്റ്സ് ഇക്കാര്യം വ്യക്തമാക്കിയത്.

അതേസമയം ഇവര്‍ക്ക് ജെ.ഡബ്ല്യൂ മാരിയറ്റ് മാര്‍ക്വിസ് ഹോട്ടലില്‍ ഒരു രാത്രി സൗജന്യമായി താമസിക്കാൻ സാധിക്കുന്നതാണ്. അതേ കാലയളവില്‍ ബുക്ക് ചെയ്യുന്ന ബിസിനസ് ക്ലാസ്, ഫസ്റ്റ് ക്ലാസ് യാത്രക്കാര്‍ക്ക് പഞ്ചനക്ഷത്ര ഹോട്ടലില്‍ രണ്ട് രാത്രി സൗജന്യമായി താമസിക്കാവുന്നതാണ്. ഇക്കോണമി ക്ലാസിന് 17,982 രൂപ (ദിര്‍ഹം 905), ബിസിനസ് ക്ലാസിന് 68,996 രൂപ (3,473 ദിര്‍ഹം), ഫസ്റ്റ് ക്ലാസിന് 192,555 രൂപ (ദിര്‍ഹം 9,700) മുതല്‍ ഡിസ്‌കൗണ്ട് നിരക്കില്‍ ടിക്കറ്റുകള്‍ ലഭിക്കുന്നതാണ്. ഇതുകൂടാതെ അധിക ബാഗേജ് അലവന്‍സും എമിറേറ്റ്‌സ് വാഗ്ദാനം ചെയ്യുന്നു. എല്ലാ യാത്രക്കാര്‍ക്കും സൗകര്യപ്രദമായ ടിക്കറ്റ് ബുക്കിങ് ഓപ്ഷനുകളും മള്‍ട്ടി റിസ്‌ക് ട്രാവല്‍ ഇന്‍ഷൂറന്‍സും എമിറേറ്റ്സ് നല്‍കി വരുന്നു.

അതേസമയം അബുദാബി വിമാനത്താവളത്തില്‍ എത്തുന്ന എല്ലാ യാത്രക്കാര്‍ക്കും ഇനിമുതല്‍ സൗജന്യ പിസിആര്‍ പരിശോധന നടത്തുന്നതാണ്. 90 മിനിറ്റുകള്‍ക്കുള്ളില്‍ പരിശോധനാ ഫലം ലഭ്യമാക്കുന്നതാണ്. അതായത് ലോകത്തില്‍ വെച്ച് തന്നെ ഏറ്റവും വേഗതയേറിയ കൊവിഡ് പരിശോധനാ ഫലമാണിതെന്ന് അബുദാബി സര്‍ക്കാര്‍ ഓഫിസ് അറിയിക്കുകയുണ്ടായി.

പ്രതിദിനം 20,000 യാത്രക്കാരില്‍ വരെ കൊവിഡ് പരിശോധന നടത്താമെന്നതിനാല്‍ ലബോറട്ടറി വിമാന യാത്രാ നടപടി ക്രമങ്ങള്‍ സുഗമമാക്കുകയും ക്വാറന്റൈന്‍ നടപടികള്‍ക്ക് സഹായിക്കുകയും ചെയ്യുമെന്ന് മാധ്യമ ഓഫിസ് അറിയിപ്പ് നൽകി. പ്യുവര്‍ ഹെല്‍ത്ത്, തമൗ ഹെല്‍ത്ത്‌കെയര്‍ എന്നിവയുടെ പങ്കാളിത്തത്തിലാണ് സൗകര്യം വികസിപ്പിച്ചിരിക്കുന്നത്.