39.48 ലക്ഷം രൂപയുടെ സ്വര്‍ണവുമായി മംഗളൂരു വിമാനത്താവളത്തില്‍ ഭാര്യയും ഭര്‍ത്താവും പിടിയിലായതായി റിപ്പോർട്ട്. പ്രവാസി മലയാളികളെയാണ് പോലീസ് പിടികൂടിയത്. കാസര്‍കോട് സ്വദേശികളായ മൊയ്തീന്‍ കുഞ്ഞ് (44), ഭാര്യ ഫൗസിയ മിസ്രിയ (33) എന്നിവരാണ് കസ്റ്റംസിന്റെ പിടിയിലായിരിക്കുന്നത്. ഫൗസിയയില്‍ നിന്നാണ് സ്വര്‍ണം പിടികൂടിയത് എന്ന് അധികൃതർ അറിയിച്ചു. ഇവരില്‍ നിന്നാണ് 39.48 ലക്ഷം രൂപ വിലമതിക്കുന്ന 851 ഗ്രാം സ്വര്‍ണം പിടിച്ചെടുത്തത്.

ശനിയാഴ്ച ദുബായില്‍ നിന്നും വന്ന എയര്‍ഇന്ത്യ വിമാനത്തിലെ യാത്രക്കാരായിരുന്നു ഇവര്‍ എന്നാണ് ലഭ്യമാകുന്ന വിവരം. കുടുംബസമേതമാണ് വിമാനത്തില്‍ വന്നത്. നാല് മക്കളും ഇവര്‍ക്കൊപ്പം ഉണ്ടായിരുന്നതായി അധികൃതർ അറിയിച്ചു. പ്രത്യേകം രൂപ കല്പന ചെയ്ത അടിവസ്ത്രത്തില്‍ ഒളിപ്പിച്ച നിലയിലായിരുന്നു ഫൗസിയയുടെ പക്കല്‍ സ്വര്‍ണം ഉണ്ടായിരുന്നത്. കൂടുതല്‍ അന്വേഷണം പുരോഗമിക്കുകയാണ്. ഡെപ്യൂടി കമീഷണര്‍ അവിനാശ് കിരണ്‍, മനോകത്യായാനി, ശ്രീകാന്ത്, നാഗേഷ് എന്നിവരടങ്ങിയ സംഘമാണ് സ്വര്‍ണം പിടികൂടിയത്.

അതേസമയം ഈ മാസം 10ന് വിമാനത്താവളം വഴി കടത്താൻ ശ്രമിച്ച 62.35 ലക്ഷം രൂപ വില വരുന്ന 1.35 കിലോ സ്വർണം ചെന്നൈ എയർ കസ്റ്റംസ് പിടിച്ചെടുതിരുന്നു. ഇതിൽ ഒരാൾ അറസ്റ്റിലായി. ദുബായിൽ നിന്നും ഇകെ -542 എമിറേറ്റ്സ് വിമാനത്തിൽ എത്തിയ ചെന്നൈ സ്വദേശി അബുബക്കർ (49)എന്നയാളിൽ നിന്നാണ് സ്വർണം പിടിച്ചെടുത്തത്. പിന്നാലെ നടത്തിയ പരിശോധനയിൽ പേസ്റ്റ് രൂപത്തിലാക്കിയ സ്വർണം നാല് പ്ലാസ്റ്റിക് ബാഗുകളിലാക്കി ചാര നിറത്തിലുള്ള ടേപ്പ് കൊണ്ട് പൊതിഞ്ഞ് സോക്സിനുള്ളിൽ ഒളിപ്പിച്ച നിലയിലാണ് കണ്ടെത്തിയത്. സംഭവത്തിൽ അന്വേഷണം പുരോഗമിക്കുന്നു.

കോഴിക്കോട് വിമാനത്താവളം വഴി കടത്താൻ ശ്രമിച്ച 69.6 ലക്ഷം രൂപയുടെ സ്വർണം എയർ കസ്റ്റംസ് ഇന്റലിജൻസ് പിടികൂടിയിരുന്നു. ഷാർജയിൽനിന്ന് എത്തിയ കോഴിക്കോട് സ്വദേശി ഷമീർ അടിവസ്ത്രത്തിനുള്ളിൽ ഒളിപ്പിച്ച 1.79 കിലോഗ്രാം സ്വർണമിശ്രിതമാണു കണ്ടെടുത്തത്.