യു എഇയുടെ വമ്പൻ നീക്കം.ഭക്ഷ്യോൽപാദന രംഗത്തു സ്വയംപര്യാപ്തത നേടാനും വിതരണശൃംഖല കാര്യക്ഷമമാക്കാനുമുള്ള പദ്ധതികൾ ശക്തമാക്കിയിരിക്കുകയാണ് യുഎഇ. കോവിഡ് സാഹചര്യത്തിൽ നിരവധി പദ്ധതികൾക്ക് രൂപം നൽകിയിരുന്നു.

എന്നാൽ ഇവ കൂടുതൽ വേഗത്തിൽ നടപ്പാക്കാൻ എമിറേറ്റ്സ് ഫുഡ് സെക്യൂരിറ്റി കൗൺസിൽ തീരുമാനിച്ചു. ആധുനിക സാങ്കേതിക വിദ്യകൾ ഉപയോഗപ്പെടുത്തി കൃഷി വിപുലമാക്കും. സൂയസ് കനാൽ പ്രതിസന്ധിയും ഭക്ഷ്യലഭ്യതയെ ഒരു പരിധിവരെ ബാധിച്ചിരുന്നു.

ഭക്ഷ്യസുരക്ഷാ സമിതിയുടെ ലക്ഷ്യങ്ങൾ കൈവരിക്കാൻ കർമപരിപാടികൾക്ക് ഉടൻ തുടക്കമാകുമെന്ന് യുഎഇ ഭക്ഷ്യ-ജലസുരക്ഷാ സഹമന്ത്രി മറിയം അൽ മഹൈരി വ്യക്തമാക്കി ഭക്ഷ്യോൽപാദന-സംസ്കരണ രംഗത്ത് ആശ്രിതത്വം പൂർണമായും ഒഴിവാക്കും.

ഇതിനായി അടുത്ത 50 വർഷത്തേക്കുള്ള പദ്ധതികൾക്കു രൂപം നൽകി സമയബന്ധിതമായി നടപ്പാക്കും. ലോകത്തെ പ്രമുഖ ഭക്ഷ്യസംഭരണ കേന്ദ്രമായി യുഎഇയെ മാറ്റുമെന്നും വ്യക്തമാക്കി.

സാമ്പത്തിക മന്ത്രാലയം, പരിസ്ഥിതി-കാലാവസ്ഥാ വ്യതിയാന മന്ത്രാലയം, ഊർജ മന്ത്രാലയം, ആരോഗ്യ മന്ത്രാലയം, ദുബായ് മുനിസിപ്പാലിറ്റി, ഷാർജ ഹെൽത്ത് അതോറിറ്റി, റാസൽഖൈമ എൻവയൺമെന്റ് പ്രൊട്ടക്‌ഷൻ ആൻഡ് ഡവലപ്മെന്റ് അതോറിറ്റി, ഫുജൈറ മുനിസിപ്പാലിറ്റി പ്രതിനിധികളും പങ്കെടുക്കുകയും ചെയ്തു .

പ്രാദേശിക കാർഷിക മേഖലയുടെ വികസനം, വെള്ളം, ഊർജം എന്നിവയുടെ ലഭ്യത, നൂതന ജലസേചനം, വിദേശ നിക്ഷേപം, ഭക്ഷ്യസംഭരണം എന്നിവയെ അടിസ്ഥാനമാക്കിയുള്ള പദ്ധതികൾക്കാണു രൂപം നൽകിയത്.

തരിശുഭൂമി കൃഷിയോഗ്യമാക്കാൻ ഇന്റർനാഷനൽ സെന്റർ ഫോർ ബയോസാലൈൻ അഗ്രിക്കൾചറിന്റെ (ഐസിബിഎ) നേതൃത്വത്തിൽ പ്രത്യേക പദ്ധതികൾ ആവിഷ്കരിക്കും. കാലാവസ്ഥാ വെല്ലുവിളികളെ അതിജീവിക്കാൻ കൂടുതൽ ഹരിതഗൃഹങ്ങൾ സ്ഥാപിക്കും.

ഭക്ഷ്യസുരക്ഷ ഉറപ്പാക്കാനുള്ള കർമപരിപാടികൾക്ക് ഇന്ത്യയുമായും ധാരണയായി. കോവിഡ് പ്രതിസന്ധിയിലും കഴിഞ്ഞ ഏപ്രിൽ മുതൽ സെപ്റ്റംബർ വരെയുള്ള ഇന്ത്യ-യുഎഇ വ്യാപാര ഇടപാടിൽ 43% വർധനയുണ്ടെന്നാണ് റിപ്പോർട്ട്.

ഇന്ത്യ-യുഎഇ ഭക്ഷ്യ ഇടനാഴി പൂർണ സജ്ജമാകുന്നതോടെ വ്യാപാര ഇടപാടിൽ വൻ മുന്നേറ്റമുണ്ടാകും. ഭക്ഷ്യ ഇടനാഴിക്ക് ഇന്ത്യയിൽ യുഎഇ 700 കോടി ഡോളറിന്റെ നിക്ഷേപം നടത്തുന്നതായാണു റിപ്പോർട്ട്. 20 ലക്ഷം കർഷകർക്ക് നേട്ടമാകും. 2 ലക്ഷം തൊഴിലവസരങ്ങളുണ്ടാക്കും.

പുതുതലമുറയെ കാർഷിക പദ്ധതികളിലേക്ക് ആകർഷിക്കാനുള്ള പദ്ധതികൾക്കും യുഎഇ തുടക്കമിട്ടു. ഉപ്പുകലർന്ന മണ്ണിലെ കൃഷി, നൂതന കാർഷിക രീതികൾ, ചുരുങ്ങിയ തോതിലുള്ള ജലസേചനം, എന്നിവയിലെല്ലാം പരിശീലനം നൽകും.