സമൂഹത്തിലെ അംഗങ്ങളുടെ സുരക്ഷയും സംരക്ഷണവും മുന്‍നിര്‍ത്തി നല്ല പെരുമാറ്റ രീതികളെ കുറിച്ചു അവബോധം വർദ്ധിപ്പിക്കുന്നതിനും മറ്റു പ്രധാനപ്പെട്ട വിഷയങ്ങള്‍ പൊതു ജനങ്ങളില്‍ എത്തിക്കുന്നതിനും വേണ്ടി അബുദാബി പോലീസ് രംഗത്ത്. ഇതിനായി വിശുദ്ധ റമസാൻ മാസത്തിൽ സോഷ്യൽ മീഡിയ പ്ലാറ്റ്‌ഫോമുകളിലൂടെയും പ്രാദേശിക ചാനലുകളിലൂടെയും ദിവസേന വീഡിയോകള്‍ പ്രക്ഷേപണം ചെയ്യാന്‍ ഒരുങ്ങുകയാണ്. ഇതിന്റെ ഭാഗമായി കഴിഞ്ഞ ദിവസം പങ്കുവച്ച വീഡിയോ ഏവരുടെയും കേരളലിയിപ്പിക്കുന്നതാണ്.

ഗുരുതര രോഗാവസ്ഥയിലായ നാല് വയസ്സുകാരന് കാര്‍ സമ്മാനമായി നല്‍കിയിരിക്കുകയാണ് അബുദാബി പോലീസ് രംഗത്ത് എത്തിയത്. ഒരു കളിപ്പാട്ട കാര്‍ സ്വന്തമായി വേണമെന്നായിരുന്നു മൊഹമ്മദ് അല്‍ ഹര്‍മൗദിയുടെ ആഗ്രഹം എന്നത്. ഈ ആഗ്രഹം നിറവേറ്റിയിരിക്കുകയാണ് അബുദാബി പോലീസ്. ഇതുകൂടാതെ, ഒരു ദിവസം മുഴുവന്‍ പോലീക്കുപ്പായത്തിൽ കൂടെ ഉണ്ടാകണം എന്ന ആഗ്രഹവും അവർ നിറവേറ്റിക്കൊടുത്തു. പട്രോളിങ് ഡ്യൂട്ടി ചെയ്യുന്നതിനിടെ അവര്‍ അവനെയും കൂട്ടി കൊണ്ടുപോയി. പിതാവിനോടൊപ്പം കാറിലിരുന്ന കുട്ടിയ്ക്ക് പോലീസ് ഉദ്യോഗസ്ഥന്‍ നിയന്ത്രണങ്ങള്‍ മനസ്സിലാക്കി കൊടുക്കുകയും ചെയ്തു.

'മേക്ക് എ വിഷ്' ഫൗണ്ടേഷനുമായി ഏകോപിപ്പിച്ചാണ് സമ്മാനം നല്‍കിയിരിക്കുന്നത്. ഹൃദയസ്പര്‍ശിയായ വീഡിയോ അബുദാബി പോലീസ് ഫേസ്ബുക്ക് പേജില്‍ പങ്കുവയ്ക്കുകയുണ്ടായി. പിന്നാലെ സോഷ്യല്‍ മീഡിയ പ്ലാറ്റ്‌ഫോമുകളില്‍ ഉടനീളം വീഡിയോയ്ക്ക് വലിയ സ്വീകാര്യത ലഭിക്കുകയാണ് ചെയ്തത്. വീഡിയോ വൈറലായതിനു പിന്നാലെ അബുദാബി പോലീസിനെ അഭിനന്ദിച്ചു കൊണ്ട് നിരവധി പ്രതികരണങ്ങള്‍ വന്നു.

ഗുരുതര രോഗത്തിന് ഉടമയായ വ്യക്തിക്ക് മനസ്സിന് സുഖം നല്‍കാനും അവരുടെ ആഗ്രഹങ്ങള്‍ നിറവേറ്റാനും ശ്രമിക്കുന്ന ഒരു സംഘടനയാണ് മേക്ക് എ വിഷ് എന്നത്. രോഗിയുടെ അവസാന നാളുകളില്‍ പോലും അവരെ പുഞ്ചിരിപ്പിക്കുകയെന്നതാണ് ഈ സംഘടന പ്രധാനമായും ലക്ഷ്യമിടുന്നത്.

അതേസമയം, റമസാൻ മാസത്തില്‍ പ്രത്യേകിച്ച് നിലവിലെ സാഹചര്യത്തില്‍ കൊറോണ വൈറസ് വ്യാപിക്കുന്നത് പരിമിതപ്പെടുത്തുന്നതിനുള്ള മുൻകരുതൽ നടപടികൾ, വ്യക്തികളും കുടുംബങ്ങളും ഒഴിവാക്കേണ്ട ആചാരങ്ങളും പെരുമാറ്റ രീതികളും, സമൂഹത്തിലെ എല്ലാ അംഗങ്ങളുടെയും സുരക്ഷയെ ബാധിക്കുന്ന വിഷയങ്ങള്‍ തുടങ്ങിയവ ഇത്തരം വീഡിയോകളിലൂടെ പൊതു സമൂഹത്തില്‍ എത്തിക്കുക എന്നതാണ് ലക്ഷ്യം എന്ന് അബുദാബി പോലീസ് കമാൻഡ് അഫയേഴ്‌സ് സെക്ടറിലെ സെക്യൂരിറ്റി മീഡിയ ഡിപ്പാർട്ട്‌മെന്റ് ഡയറക്ടർ ബ്രിഗേഡിയർ മുഹമ്മദ് അലി അൽ മുഹൈരി പറഞ്ഞു.