ഏറെ നാളുകൾക്ക് ശേഷം പ്രവാസികൾക്ക് ഏറെ ശുഭകരമായ വാർത്തയാണ് പുറത്ത് വരുന്നത്. രൂപയുടെ മൂല്യം കുത്തനെ ഇടിഞ്ഞതോടെ കറൻസികളും ഇന്ത്യൻ രൂപയും തമ്മിലെ വിനിമയ നിരക്കിലെ നേട്ടം പ്രവാസികൾക്ക് ഗുണകരമായി മാറുകയാണ്.

ദിര്‍ഹം-രൂപ വിനിമയ നിരക്കിലെ നേട്ടം പ്രയോജനപ്പെടുത്തുകയാണ് പ്രവാസികള്‍. കുറച്ചു കാലം കൂടി ഇന്ത്യൻ രൂപയുടെ ഇടിവ് തുടർന്നേക്കും എന്നാണ് സൂചന. ഉയര്‍ന്ന നിരക്ക് ലഭ്യമായതോടെ മിക്ക ധനവിനിമയ സ്ഥാപനങ്ങളിലും നാട്ടിലേക്ക് പണമയയ്ക്കുന്നതിനായി പ്രവാസികളുടെ തിരക്ക് അനുഭവപ്പെടുന്നുണ്ട്.

ഒരു ദിർഹത്തിനു 20 രൂപ 46 പൈസയായിരുന്നു പകൽ രേഖപ്പെടുത്തിയ മികച്ച വിനിമയ നിരക്ക് എന്നത്. പ്രാദേശിക പണമിടപാട് സ്ഥാപനങ്ങൾ 20 രൂപ 34 പൈസയാണ് നൽകിയത്. ഇതുകൂടാതെ കഴിഞ്ഞ ഏതാനും ദിവസങ്ങളായി രൂപയുടെ ഇടിവിനെ തുടർന്ന് വിദേശ കറൻസികൾക്ക് നല്ല വിനിമയ മൂല്യമാണ് ലഭിച്ചു വരുന്നത്. ദിർഹത്തിന് ഇരുപത് രൂപക്കും ചുവടെയായിരുന്ന വിനിമയ മൂല്യം 21 വരെ ഉയർന്നേക്കുമെന്നാണ് പുറത്തുവരുന്ന സൂചന. നാട്ടിലേക്ക് അയക്കുന്ന പണത്തിൽ നല്ല വർധനവാണുള്ളതെന്ന് വിവിധ പണമിടപാട് സ്ഥാപനങ്ങൾ അറിയിക്കുകയുണ്ടായി.

റമദാനും വിഷു ഉൾപ്പെടെ ആഘോഷ വേളകളും ഒത്തുവന്നതും നാട്ടിലേക്കുള്ള പണപ്രവാഹം ഉയരാൻ കാരണമായി മാറിയിട്ടുണ്ട്. കൊവിഡ് പ്രതിസന്ധിയോടെ ഏതാനും മാസങ്ങളായി ദിര്‍ഹത്തിന് വിനിമയ നിരക്ക് 20 രൂപയില്‍ താഴെയായിരുന്നു. ഈ സാഹചര്യത്തിലാണ് ഇപ്പോള്‍ മികച്ച നിരക്ക് ലഭിച്ചത് പ്രവാസികള്‍ക്ക് നേട്ടമാകുന്നത്.

രാജ്യാന്തര വിപണയില്‍ അസംസ്‌കൃത എണ്ണവിലയില്‍ വര്‍ധനവുണ്ടായതും ഡോളര്‍ കരുത്താര്‍ജിച്ചതുമാണ് രൂപയ്ക്ക് തിരിച്ചടിയായത്. ഭൂരിഭാഗം പേരും വീട്ടുചെലവുകള്‍ക്ക് വേണ്ടിയാണ് നാട്ടിലേക്ക് പണമയച്ചതെങ്കില്‍ ചെറിയൊരു വിഭാഗം ആളുകള്‍ നിക്ഷേപം മുന്‍നിര്‍ത്തി പണമയച്ചവരാണ്. ആയതിനാൽ തന്നെ ഈ അവസരം പ്രവാസികൾക്ക് ആശ്വാസമായി തീരുകയാണ്.