സൗദി അറേബ്യ നൽകിയിരുന്ന ഇളവുകൾ കൊറോണ വ്യാപനത്തിന് പിന്നാലെ എടുത്തുമാറ്റുകയാണ് അധികൃതർ. ഗൾഫിലേക്ക് എത്തിച്ചേരുക എന്ന കടമ്പകൾക്ക് പിന്നാലെ നാട്ടിലേക്ക് എത്തണമെങ്കിലോ മറ്റൊരു ജോലിയിലേക്ക് പ്രവേശിക്കണമെങ്കിലോ തന്നെ ഇനി കടമ്പകൾ കടക്കേണ്ടിവരുന്നതാണ്.

അതായത് നിലവിലെ ജോലി മതിയാക്കി നാട്ടിലേക്ക് മടങ്ങാന്‍ പ്രവാസികള്‍ക്ക് ഫൈനല്‍ എക്‌സിറ്റ് വിസ ലഭിക്കണമെങ്കില്‍ നിബന്ധനകളേറെയാണ്. മൊബൈല്‍ ബില്ലുകള്‍ ഉള്‍പ്പെടെ എല്ലാ സാമ്പത്തിക ഇടപാടുകളും തീര്‍ത്ത ശേഷമേ ഇനി ഫൈനല്‍ എക്‌സിറ്റ് വിസയില്‍ നാട്ടിലേക്ക് മടങ്ങാനാവൂ എന്ന് സൗദി ജനറല്‍ ഡയറക്ടറേറ്റ് ഓഫ് പാസ്‌പോര്‍ട്ട്‌സ് (ജവാസാത്ത്) വ്യക്തമാക്കിയിരുന്നു. എന്നു മാത്രമല്ല, ഈ വിസയില്‍ രാജ്യം വിടാന്‍ ആഗ്രഹിക്കുന്ന വ്യക്തിയുടെ പേരില്‍ രജിസ്റ്റര്‍ ചെയ്ത വാഹനങ്ങള്‍ ഉണ്ടെങ്കില്‍ അവര്‍ക്ക് ഫൈനല്‍ എക്‌സിറ്റ് വിസ ലഭിക്കുന്നതല്ല. അതിന്റെ രജിസ്‌ട്രേഷന്‍ മറ്റൊരാളിലേക്കു മാറ്റുകയോ വാഹനം മറ്റൊരാള്‍ക്ക് വില്‍ക്കുകയോ മറ്റോ ചെയ്യേണ്ടതാണ്.

അതോടൊപ്പം ഫൈനല്‍ എക്‌സിറ്റ് വിസയ്ക്ക് അപേക്ഷ നല്‍കുന്ന വ്യക്തിയുടെ പേരില്‍ നേരത്തേ ലഭിച്ച ഉപയോഗിച്ചിട്ടില്ലാത്ത മറ്റൊരു വിസ ഉണ്ടായിരിക്കാനും പാടില്ല. വിസ ഇഷ്യൂ ചെയ്യപ്പെടുന്ന ദിവസം തൊട്ട് 60 ദിവസമായിരിക്കും ഫൈനല്‍ എക്‌സിറ്റ് വിസയുടെ കാലാവധി എന്നത്. ഈ കാലയളവിനുള്ളില്‍ സൗദിയില്‍ നിന്ന് പുറത്തുകടന്നിരിക്കണം എന്നും നിബന്ധനയുണ്ട്. ഈ വിസയ്ക്ക് അപേക്ഷ നല്‍കുമ്പോള്‍ അപേക്ഷകന്‍ സൗദിയില്‍ ഉണ്ടായിരിക്കണം എന്നതാണ് മറ്റൊരു വ്യവസ്ഥ എന്നത്. നാട്ടിലുള്ള ഒരാള്‍ക്ക് അവിടെ ഇരുന്നു കൊണ്ട് ഫൈനല്‍ എക്‌സിറ്റ് വിസയ്ക്ക് അപേക്ഷിക്കാനാവില്ല. അപേക്ഷിക്കുന്ന സമയത്ത് പാസ്‌പോര്‍ട്ടിന് ചുരുങ്ങിയത് 60 ദിവസത്തെ കാലാവധി ഉണ്ടായിരിക്കണമെന്നും ഉത്തരവിൽ വ്യവസ്ഥയുണ്ട്.

അതേസമയം ഫൈനല്‍ എക്‌സിറ്റ് വിസയ്ക്കുള്ള അപേക്ഷയ്ക്ക് പ്രത്യേക ഫീസൊന്നും ഈടാക്കില്ല. ഈ വിസയ്ക്കായി നല്‍കിയ അപേക്ഷ കാന്‍സല്‍ ചെയ്യണമെങ്കില്‍ 100 റിയാല്‍ കാന്‍സലേഷന്‍ ഫീസ് നല്‍കേണ്ടതാണ്. ഇനി ഈ വിസയില്‍ രാജ്യം വിട്ട ഒരാള്‍ക്ക് പുതിയൊരു വിസയില്‍ മാത്രമേ സൗദിയിലേക്ക് തിരികെ വരാൻ സാധിക്കൂ എന്നും ജവാസാത്ത് അറിയിച്ചു. ജീവനക്കാരന് ജോലി മതിയാക്കി നാട്ടിലേക്ക് പോകാനുള്ള ഫൈനല്‍ എക്‌സിറ്റ് വിസ നല്‍കുന്നതിന് തൊഴിലുടമയ്ക്ക് എന്തെങ്കിലും തടസ്സ വാദമുണ്ടെങ്കില്‍ അത് വിസ ഇഷ്യൂ ചെയ്യുന്നതിന് മുമ്പ് തന്നെ അധികൃതരെ അറിയിക്കണം. വിസ നല്‍കിക്കഴിഞ്ഞാല്‍ അത്തരം പരാതികള്‍ സ്വീകരിക്കുന്നതല്ല.

അതോടൊപ്പം തന്നെ, സൗദി അറേബ്യയിൽ 1,251 പേരിൽ കൂടി പുതിയതായി കൊവിഡ് വൈറസ് ബാധ റിപ്പോർട്ട് ചെയ്തു. ചികിത്സയിലുള്ളവരിൽ 1,026 പേർ സുഖം പ്രാപിച്ചു. കഴിഞ്ഞ 24 മണിക്കൂറിനിടെ രാജ്യത്ത് വിവിധ ഭാഗങ്ങളിലായി 15 മരണങ്ങൾ കൂടി റിപ്പോർട്ട് ചെയ്തു. ആകെ റിപ്പോർട്ട് ചെയ്ത കൊവിഡ് കേസുകളുടെ എണ്ണം 4,51,687 ആയി ഉയർന്നു. ഇതിൽ 4,34,439 പേർ രോഗമുക്തരായി.