പ്രവാസികളെ കാക്കുന്ന പ്രവാസലോകം... ആത്മവിശ്വാസം ഒരിക്കലും കൈവിടരുതെന്ന് നമ്മെ ഓർമിപ്പിക്കുകയാണ് യുഎഇ. ബിഗ് ടിക്കറ്റ്, മെഹ്‌സൂസ്‌, ഡ്യൂട്ടി ഫ്രീ എന്നീ നറുക്കെടുപ്പുകളിലൂടെ ഒട്ടനവധി പ്രവാസികൾക്ക് നല്ല ജീവിതം നൽകിക്കൊണ്ട് തങ്ങളുടെ ജൈത്രയാത്ര തുടരുകയാണ്. ഒട്ടുമിക്കപ്പോഴും പ്രവാസി മലയാളികൾക്ക് ഭാഗ്യം നൽകുന്ന നറുക്കെടുപ്പ് ഇത്തവണയും പ്രവാസി മലയാളിക്ക് സ്വന്തം. ഒരൊറ്റ ടിക്കറ്റിൽ ലഭിച്ചത് കോടികളാണ്.....

പ്രവാസി മലയാളിക്ക് യുഎഇയില്‍ ഏഴ് കോടിയില്‍പരം രൂപയുടെ ഭാഗ്യസമ്മാനം ലഭിച്ചിരിക്കുകയാണ്. 60കാരനായ എബ്രഹാം ജോയിക്കാണ് ഇന്നത്തെ ദുബൈ ഡ്യൂട്ടി ഫ്രീ നറുക്കെടുപ്പില്‍ 10 ലക്ഷം ഡോളര്‍ അതായത് ഏഴ് കോടിയിലധികം ഇന്ത്യന്‍ രൂപ സമ്മാനമായി ലഭിച്ചത്. യുഎഇയില്‍ ട്രേഡിങ് കമ്പനി നടത്തുന്ന എബ്രഹാം ജോയി ഇക്കഴിഞ്ഞ മേയ് 27ന് എടുത്ത 1031-ാം നമ്പര്‍ ടിക്കറ്റിലൂടെയാണ് അദ്ദേഹത്തെ ഇന്ന് ഭാഗ്യം തേടിയെത്തിയത് തന്നെ.

കഴിഞ്ഞ 35 വര്‍ഷമായി ദുബൈയില്‍ ജീവിക്കുന്ന തനിക്ക് ഇതൊരു അത്‍ഭുതകരമായ വിജയം തന്നെയാണെന്ന് അദ്ദേഹം പറയുകയുണ്ടായി. 15 വർഷമായി നറുക്കെടുപ്പിൽ പങ്കെടുക്കാറുണ്ടെന്നും ഇൗ വലിയ വിജയത്തിൽ ഏറെ സന്തോഷമുണ്ടെന്നും അദ്ദേഹം കൂട്ടിച്ചേർത്തു. കൂടാതെ ദുബൈക്കും ദുബൈ ഡ്യൂട്ടി ഫ്രീയ്‍ക്കും അദ്ദേഹം നന്ദി അറിയിച്ചു. സമ്മാനത്തുകയുടെ നല്ലൊരു പങ്കും തന്റെ ബിസിനസിനായി ഉപയോഗപ്പെടുത്തുമെന്ന് പറഞ്ഞ അദ്ദേഹം ദുബൈയിലെ ജീവകാരുണ്യ പ്രവര്‍ത്തനങ്ങള്‍ക്കായി അതിലൊരു പങ്ക് മാറ്റിവെയ്‍ക്കുമെന്നും അറിയിക്കുകയുണ്ടായി.

അതേസമയം ദുബൈ ഡ്യൂട്ടി ഫ്രീയിലൂടെ പത്ത് ലക്ഷം ഡോളര്‍ സമ്മാനം നേടുന്ന 180-ാമത്തെ ഇന്ത്യക്കാരനാണ് എബ്രഹാം ജോയി. ഇന്ന് നടന്ന ഫൈനസ്റ്റ് സര്‍പ്രൈസ് നറുക്കെടുപ്പില്‍ അദ്ദേഹത്തിന് പുറമെ മറ്റ് മൂന്ന് പേര്‍ കൂടി ആഡംബര വാഹനങ്ങള്‍ സ്വന്തമാക്കിയിട്ടുണ്ട്. ഷാര്‍ജയില്‍ താമസിക്കുന്ന ഇന്ത്യക്കാരന്‍ അബ്‍ദുല്ല അഹ്‍മദിന് റേഞ്ച് റോവര്‍ സ്‍പോര്‍ട് കാറും ദുബൈയില്‍ താമസിക്കുന്ന ഇന്ത്യക്കാരനായ സജ്ഞയ് അസ്‍നാനിയ്‍ക്ക് എപ്രിലിയ RSV4 മോട്ടോര്‍ ബൈക്കും ലഭിച്ചു. സജ്ഞയ് അസ്‍നാനിക്ക് ഇത് രണ്ടാം തവണയാണ് മോട്ടോര്‍ ബൈക്ക് ലഭിക്കുന്നത്. ഇപ്പോൾ 10 വർഷമായി ദുബായിൽ താമസിക്കുന്ന അസ്നാനി എമിറേറ്റ്സ് എൻ‌ബി‌ഡിയുടെ റിലേഷൻഷിപ്പ് മാനേജരായി ജോലി ചെയ്യുകയാണ്.

ജൂൺ 16 ബുധനാഴ്ച ദുബായ് അന്താരാഷ്ട്ര വിമാനത്താവളത്തിലെ കോൺകോർസ് ബിയിലാണ് നറുക്കെടുപ്പ് നടന്നത്. ദുബായ് ഡ്യൂട്ടി ഫ്രീ മില്ലേനിയം മില്യണയർ ടിക്കറ്റ് വാങ്ങുന്നവരിൽ ഏറ്റവും കൂടുതൽ പേർ ഇന്ത്യൻ പൗരന്മാരാണ്. ബുധനാഴ്ച നറുക്കെടുപ്പ് നടത്തിയത് ദുബായ് ഡ്യൂട്ടി ഫ്രീയുടെ എക്സിക്യൂട്ടീവ് വൈസ് ചെയർമാനും സിഇഒയുമായ കോം മക്ലിൻ, ഇവിപി - കോർപ്പറേറ്റ് സർവീസസ്, സലാ തഹ്‌ലക്, എസ്‌വിപി - മാർക്കറ്റിംഗ് സിനദ് എൽ സിബായ് എന്നിവരാണ്.