യാത്രക്കാരെ സ്വീകരിക്കാൻ ഒരുങ്ങി ദുബായ്; ഇടവേളയ്ക്ക് ശേഷം ദുബായ് അന്താരാഷ്ട്ര വിമാനത്താവളത്തിന്റെ ടെര്മിനല് ഒന്ന് വീണ്ടും തുറക്കുന്നു
ഇന്ത്യയിൽ നിന്നുള്ള യാത്രക്കാർക്ക് യാത്രാനുമതി നൽകിയതിന് പിന്നാലെ മറ്റൊരു നീക്കവുമായി ദുബായ്. യാത്രക്കാരെ സ്വീകരിക്കാനൊരുങ്ങിയിരിക്കുകയാണ് ദുബായ് രാജ്യാന്തര വിമാനത്താവളത്തിലെ ടെര്മിനല് ഒന്ന്. 24 (വ്യാഴാഴ്ച) മുതല് ദുബായിലെ അന്താരാഷ്ട്ര വിമാനത്താവളം പ്രവര്ത്തന സജ്ജമാകുന്നതായിരിക്കും. 15 മാസത്തോളമായി അടഞ്ഞു കിടക്കുകയായിരുന്ന വിമാനത്താവളമാണ് വിദേശ യാത്രക്കാരെ വരവേല്ക്കാന് വേണ്ടി ഒരുങ്ങുന്നത്.
ഇന്ത്യ അടക്കമുള്ള ചില രാജ്യങ്ങളിലെ കാലാവധിയുള്ള യുഎഇ താമസ വിസക്കാര്ക്ക് തിരികെ എത്താന് ദുബായ് കഴിഞ്ഞ ദിവസമാണ് അനുമതി നല്കിയതായുള്ള വാർത്തകൾ പുറത്തേക്ക് വന്നത്. യുഎഇ അംഗീകരിച്ച കൊവിഡ് വാക്സിന്റെ രണ്ട് ഡോസും എടുത്തവര്ക്കാണ് ദുബായിലേക്ക് പ്രവേശനാനുമതി നൽകുകയുള്ളൂ. ജുലൈ 24 മുതല് ദുബായിലേക്ക് സര്വ്വീസ് നടത്തുമെന്ന് എയര് ഇന്ത്യയും എമിറേറ്റ്സ് എയര് ലൈനും അറിയിച്ചു.
അതേസമയം വിദേശത്ത് പോകുന്നവര്ക്ക് നല്കുന്ന വാക്സിനേഷന് സര്ട്ടിഫിക്കറ്റില് ബാച്ച് നമ്പരും തീയതിയും കൂടി ചേര്ക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. ചില വിദേശ രാജ്യങ്ങള് വാക്സിനെടുത്ത തീയതിയും വാക്സിന്റെ ബാച്ച് നമ്പരും കൂടി ആവശ്യപ്പെടുന്ന പശ്ചാത്തലത്തിലാണ് സര്ട്ടിഫിക്കറ്റില് ഇവകൂടി ചേര്ക്കാന് സര്ക്കാര് നിര്ദേശം നല്കിയത്. ഇതിനായുള്ള ഇ ഹെല്ത്തിന്റെ പോര്ട്ടലില് അപ്ഡേഷന് നടത്തിവരികയാണ്.
അടുത്ത ദിവസം മുതല് തന്നെ ബാച്ച് നമ്പരും തീയതിയും ചേര്ത്ത പുതിയ സര്ട്ടിഫിക്കറ്റ് ലഭിക്കുന്നതാണ്. നേരത്തെ സര്ട്ടിഫിക്കറ്റ് എടുത്ത, ബാച്ച് നമ്പരും തീയതിയും ആവശ്യമുള്ളവര്ക്ക് അവകൂടി ചേര്ത്ത് പുതിയ സര്ട്ടിഫിക്കറ്റ് നല്കുമെന്നും മന്ത്രി വ്യക്തമാക്കി.
തീയതിയും ബാച്ച് നമ്പരും കൂടി ആവശ്യമുള്ള നേരത്തെ സര്ട്ടിഫിക്കറ്റ് എടുത്തവര് സംസ്ഥാന സര്ക്കാരിന്റെ https://covid19.kerala.gov.in/vaccine/ എന്ന പോര്ട്ടലില് പ്രവേശിച്ച് ലഭിച്ച പഴയ സര്ട്ടിഫിക്കറ്റ് ക്യാന്സല് ചെയ്തിട്ട് വേണം പുതിയതിന് അപേക്ഷിക്കേണ്ടത്. ശേഷം, മുമ്പ് ബാച്ച് നമ്പരും തീയതിയുമുള്ള കോവിന് (COWIN) സര്ട്ടിഫിക്കറ്റ് ലഭിച്ചിട്ടുള്ളവര് അത് പോര്ട്ടലില് അപ് ലോഡ് ചെയ്യേണ്ടതാണ്. കോവിന് പോര്ട്ടലില് നിന്നും സര്ട്ടിഫിക്കറ്റ് ലഭിക്കാത്തവര് വാക്സിന് എടുത്ത കേന്ദ്രത്തില് നിന്നും ബാച്ച് നമ്പരും തീയതിയും കൂടി എഴുതി വാങ്ങിയ സര്ട്ടിഫിക്കറ്റ് അപ് ലോഡ് ചെയ്യേണ്ടതാണ്.
https://www.facebook.com/Malayalivartha