മലയാളികളടക്കം ഒട്ടേറെ ഇന്ത്യക്കാർക്ക് ആശ്വാസത്തോടൊപ്പം ആശങ്കയും; താമസ വീസക്കാരുടെ തിരക്ക് കഴിയുന്ന സാഹചര്യത്തിൽ സന്ദർശകര്ക്കു കൂടി വരാൻ യുഎഇ അധികൃതർ അനുവാദം നൽകുമെന്ന് സൂചന, ടിക്കറ്റിനായി നെട്ടോട്ടം
യുഎഇയിലേക്ക് എത്തിച്ചേരാൻ കാത്തിരുന്ന പ്രവാസികൾക്ക് സന്തോഷ വാർത്തയാണ് കഴിഞ്ഞ ദിവസം പുറത്തുവന്നത്. ഈ മാസം 23 മുതൽ ഇന്ത്യയിൽ നിന്ന് യുഎഇയിലേയ്ക്ക് പറക്കാൻ സാധിക്കും. മലയാളികളടക്കം ഒട്ടേറെ ഇന്ത്യക്കാർക്ക് ആശ്വാസം പകരുന്നതായിരുന്നു ആ വാർത്ത. ചെറിയ അവധിക്കായി എത്തി മാസങ്ങളായി ഇന്ത്യയിൽ കുടുങ്ങിക്കിടക്കുന്ന താമസ വീസക്കാർ വിമാന സർവീസ് പുനരാരംഭിക്കുന്നതും കാത്തിരിക്കുകയായിരുന്നു. എന്നാൽ സന്ദർശക വീസയെടുത്തിരുന്ന സ്ത്രീകളും കുട്ടികളുമടക്കമുള്ളവർ തങ്ങൾക്ക് കൂടി പെട്ടെന്ന് യുഎഇയിലെത്താൻ സാധിക്കുമെന്ന പ്രതീക്ഷയിലാണ് ഉള്ളത്.
താമസ വീസക്കാരുടെ തിരക്ക് കഴിയുന്ന സാഹചര്യത്തിൽ സന്ദർശകര്ക്കു കൂടി വരാൻ യുഎഇ അധികൃതർ അനുവാദം നൽകുമെന്നാണ് ഏവരും പ്രതീക്ഷിക്കുന്നത്. യാത്രാ വിലക്ക് ആരംഭിക്കുന്നതിന് മുൻപ് യുഎഇയിലേയ്ക്ക് വരാൻ വേണ്ടിയെടുത്ത സന്ദർശക വീസയുടെ കാലാവധി കഴിഞ്ഞെങ്കിലും ഇളവ് ലഭിക്കുമെന്ന പ്രതീക്ഷയിലാണെന്ന് കാസർകോട് മൊഗ്രാൽപുത്തൂർ സ്വദേശി ഹിഷാം മൊയ്തീൻ ഒരു പ്രമുഖ മാധ്യമത്തോട് പറഞ്ഞു. ഇതിനായി എടുത്തിരുന്ന വിമാന ടിക്കറ്റ് നഷ്ടമായി. വീസയെങ്കിലും നിലനിർത്താനാകുമെന്നാണ് കരുതുന്നത്.
ഇന്നലെ യാത്രാ വിലക്ക് നീക്കുന്ന വാർത്ത കേട്ടതിന് പിന്നാലെ യുഎഇയിലെ ട്രാവൽ ഏജൻസികൾക്ക് നിലയ്ക്കാത്ത ഫോൺ കോളുകൾ ലഭിക്കുകയുണ്ടായി. ടിക്കറ്റ് ബുക്ക് ചെയ്യാനും യാത്രാ സംബന്ധമായ അന്വേഷണങ്ങളുമാണ് കൂടുതലും ലഭിക്കുന്നത്. നിലവിൽ ഫ്ലൈ ദുബായ് മാത്രമാണ് ടിക്കറ്റ് ബുക്കിങ് ആരംഭിച്ചിരിക്കുന്നത്. ഈ മാസം 24ന് കൊച്ചിയിൽ നിന്ന് ദുബായിലേയ്ക്ക് 855 ദിർഹവും കോഴിക്കോട് നിന്ന് ദുബായിലേയ്ക്ക് 879 ദിർഹവുമാണ് നിരക്ക് ഏർപ്പെടുത്തിയിട്ടുള്ളത്. എയർ ഇന്ത്യ, എയർ ഇന്ത്യാ എക്സ്പ്രസ് എന്നിവ വൈകാതെ ടിക്കറ്റ് ബുക്കിങ് ആരംഭിക്കുമെന്നാണ് പ്രതീക്ഷ. നിലവിൽ ദുബായിലേയ്ക്ക് മാത്രമേ വരാൻ സാധിക്കുകയുള്ളൂ. അബുദാബി, റാസൽഖൈമ, ഷാർജ രാജ്യാന്തര വിമാനത്താവളങ്ങളിലേയ്ക്കുള്ള പ്രവേശനത്തെക്കുറിച്ച് വൈകാതെ തീരുമാനമുണ്ടായേക്കുമെന്നും സൂചനയുണ്ട്.
യുഎഇ അംഗീകരിച്ച വാക്സീനിന്റെ രണ്ടു ഡോസും എടുത്തവർക്ക് മാത്രമേ ദുബായിലേയ്ക്ക് വരാനുള്ള അനുമതി ലഭിക്കുകയുള്ളൂ.
1. സിനോഫാം
2. ഫൈസർ–ബയോഎൻടെക്
3. സ്പുട്നിക് വി റഷ്യ
4. ഒാക്സ്ഫോർഡ്–ആസ്ട്രാ സെനെക അഥവാ കോവിഷീൽഡ്
https://www.facebook.com/Malayalivartha