പ്രവാസികള്‍ക്ക് ഏര്‍പ്പെടുത്തിയിരുന്ന യാത്രാവിലക്കില്‍ ഇളവ് വന്നതോടെ നാളെ മുതല്‍ യുഎഇയിലേക്ക് മടങ്ങാം. കഴിഞ്ഞ ദിവസമാണ് പ്രവാസികൾക്ക് ഏറെ സന്തോഷം പകർന്ന് യുഎഇ രംഗത്ത് എത്തിയത്. അങ്ങനെ ഇന്ത്യയില്‍നിന്നുള്ള യാത്രവിലക്കില്‍ വ്യാഴാഴ്ച മുതല്‍ യു.എ.ഇ ഇളവ് നല്‍കിയത് ആശ്വാസമാകുന്നത് ലക്ഷങ്ങളോളം വരുന്ന പ്രവാസികൾക്കാണ്. മൂന്ന് മാസമായി തുടരുന്ന വിലക്കുമൂലം ആശങ്കയിലായിരുന്നു ഇവര്‍. ഇതിനുപിന്നാലെ വിമാനടിക്കറ്റുകളുടെ വില്പന തകൃതിയായി....

കൊറോണ വ്യാപനം മൂലം ഏപ്രില്‍ 24നാണ് 10 ദിവസത്തെ യാത്രവിലക്ക് യു.എ.ഇ കൊണ്ടുവന്നത്. ഇന്ത്യയിലെ കോവിഡ് രോഗികളുടെ നിരക്ക് വര്‍ധിച്ചതോടെ വിലക്ക് വീണ്ടും നീട്ടുകയായിരുന്നു. നാട്ടിലെത്തി യാത്ര തിരിക്കാനിരിക്കെയാണ് അപ്രതീക്ഷിതമായി യാത്രവിലക്ക് വന്നത്. അവധിക്കാലമെത്തിയതോടെ നിരവധി അധ്യാപകരും വിദ്യാര്‍ഥികളും രക്ഷിതാക്കളും സ്കൂള്‍ ജീവനക്കാരും നാട്ടില്‍ കുടുങ്ങിയിരുന്നു. വ്യാഴാഴ്ച മുതല്‍ യാത്രക്ക് അപേക്ഷ നല്‍കാമെങ്കിലും ഐ.സി.എയുടെ അനുമതി ലഭിച്ചശേഷം എന്ന് യാത്രചെയ്യാന്‍ കഴിയുമെന്ന കാര്യത്തിലും ആശങ്ക നിലനിൽക്കുന്നുണ്ട്. എന്നിരുന്നാൽ തന്നെയും യു.എ.ഇയിലേക്ക് വിമാനക്കമ്പനികള്‍ ഇതിനോടകം തന്നെ ഓണ്‍ലൈന്‍ ടിക്കറ്റ് വില്‍പന തുടങ്ങി.

ഫ്‌ളൈ ദുബൈ ടിക്കറ്റ് നിരക്ക് 2000 ദിര്‍ഹത്തിന് മുകളിലാണ് അതായത് കാൽ ലക്ഷത്തിലേറെ രൂപ. രണ്ട് ഡോസ് വാക്‌സിനെടുത്ത താമസ വിസക്കാര്‍ക്കാണ് രാജ്യത്ത് തിരിച്ചെത്താന്‍ അനുമതി നൽകിയിട്ടുള്ളത്. ആഗസ്റ്റ് അഞ്ച് മുതലാണ് ഇളവുകള്‍ പ്രാബല്യത്തില്‍ വരിക. രണ്ടാം ഡോസ് വാക്‌സിന്‍ സ്വീകരിച്ച് 14 ദിവസം പിന്നിട്ടവര്‍ക്കാണ് മടങ്ങിയെത്താന്‍ അനുമതിയുള്ളത്.

യാത്രക്കാര്‍ വാക്സിന്‍ സര്‍ട്ടിഫിക്കറ്റ് കൈയില്‍ കരുതണം. യാത്ര പുറപ്പെടുന്നതിനു 48 മണിക്കൂര്‍ മുമ്ബ് നടത്തിയ കോവിഡ് ആര്‍ടിപിസിആര്‍ പരിശോധനയുടെ നെഗറ്റീവ് ഫലവും, നാല് മണിക്കൂര്‍ മുമ്ബ് വിമാനത്താവളത്തില്‍ റാപ്പിഡ് പിസിആര്‍ പരിശോധനയും നടത്തണം. ഐസിഎ വെബ്‌സൈറ്റ് വഴി അനുമതി നേടണമെന്നും ദേശീയ ദുരന്ത നിവാരണ സമിതി പുറത്തിറക്കിയ അറിയിപ്പില്‍ വ്യക്തമാകുന്നുണ്ട്. അതേസമയം, യുഎഇയില്‍ ജോലി ചെയ്യുന്ന ഡോക്ടര്‍മാര്‍, നഴ്‌സുമാര്‍, ടെക്‌നീഷ്യന്‍സ് എന്നിവരുള്‍പ്പെടുന്ന ആരോഗ്യ പ്രവര്‍ത്തകര്‍, യുഎഇയിലെ വിദ്യാര്‍ത്ഥികള്‍ എന്നീ വിഭാഗങ്ങള്‍ക്ക് വാക്സിന്‍ സ്വീകരിച്ചിട്ടില്ലെങ്കിലും രാജ്യത്തേക്ക് തിരികെയെത്താൻ സാധിക്കുന്നതാണ്.

അതേസമയം ഇന്ത്യ, ശ്രീലങ്ക, പാക്കിസ്ഥാന്‍, ഉഗാണ്ട, നേപ്പാള്‍, നൈജീരിയ എന്നീ രാജ്യങ്ങള്‍ക്കാണ് ഇളവ് അനുവദിച്ചിരിക്കുന്നത്. വിമാനത്താവളത്തില്‍ എത്തിയ ശേഷം യാത്രയ്ക്ക് നാല് മണിക്കൂര്‍ മുന്‍പ് കോവിഡ് പരിശോധനയും നടത്തണം. വ്യാഴാഴ്ച മുതല്‍ ഇളവ് പ്രാബല്യത്തില്‍ വരും. ഇതു സംബന്ധിച്ച്‌ ദേശീയ ദുരന്ത നിവാരണ സമിതിയാണു വിജ്ഞാപനം പുറപ്പെടുവിച്ചത്. അതേസമയം വിസിറ്റിംഗ് വീസക്കാര്‍ക്ക് യുഎഇയില്‍ പ്രവേശിക്കാൻ സാധിക്കില്ല.