പ്രവാസലോകത്ത് സ്വന്തം പിതാവിന്റെയും പിതാവിന്റെ കാമുകിയുടെയും നിരന്തര പീഡനം സഹിക്കേണ്ടി വന്ന കുട്ടികളെക്കുറിച്ചുള്ള നൊമ്പരപ്പെടുത്തുന്ന വാർത്തയാണ് ഇപ്പോൾ പുറത്ത് വരുന്നത്. വീട്ടിൽ നിന്നും ഷാർജ പോലീസിന്റെ ചാരത്തേക്ക് അഭയം തേടിയെത്തിയ കുട്ടികൾക്ക് കരുതലായത് ഷാർജ ഇന്ത്യൻ അസോസിയേഷൻ ആയിരുന്നു....

ചൊവ്വാഴ്​ച അവന്റെ 12ാം ജന്മദിനമായിരുന്നു. കേക്ക്​ മുറിച്ച്​ 17കാരനായ ഇക്കാക്ക്​ മധുരം നൽകുമ്പോൾ പ്രവാസലോകത്തെ ചില സന്നദ്ധപ്രവർത്തകർ മാത്രമായിരുന്നു അവരുടെ ചുറ്റും ഉണ്ടായിരുന്നത്​. വളരെ സന്തോഷത്തിലായിരുന്നു രണ്ടുപേരും. ചെറുപ്രായത്തിൽ തന്നെ ആർക്കും താങ്ങാനാവാത്ത പ്രയാസങ്ങൾ സധൈര്യം അതിജീവിച്ച്​ പെറ്റമ്മയുടെ അടുത്തേക്ക്​ പോകാനൊരുങ്ങുകയാണവർ. ഇവരുടെ ജീവിതം ഒരു പ്രമുഖ മാധ്യമം റിപ്പോർട്ട്​ ചെയ്​തതിന് പിന്നാലെയാണ് പുറംലോകം അറിഞ്ഞത്.

സ്വന്തം പിതാവിന്റെയും പിതാവിന്റെ കാമുകിയുടെയും നിരന്തരമായ പീഡനത്തെ തുടർന്നാണ്​ കഴിഞ്ഞ മാസം നാലിന്​ ഇവർ ഷാർജയിലെ വീട് വിട്ടിറങ്ങി ഷാർജ ഇന്ത്യൻ അസോസിയേഷന്റെ സഹായത്തോടെ പൊലീസിൽ അഭയം തേടിയത്​. നാട്ടിലുള്ള തങ്ങളുടെ മാതാവിന്റെ കൈകളിൽ എത്തുന്നതുവരെ താൽക്കാലിക സംരക്ഷണത്തിന്​ ഷാർജ ഇന്ത്യൻ അസോസിയേഷൻ മുഖാന്തരം ചൈൽഡ് പ്രൊട്ടക്​ട്​ ടീം കേരള(സി.പി.ടി)യുടെ യു.എ.ഇയിലെ ഭാരവാഹികൾക്ക്‌ ഷാർജ പൊലീസ് കൈമാറുകയാണ് ചെയ്തത്.

ഒരുമാസത്തിലധികമായി ഇന്ത്യൻ അസോസിയേഷൻ ഷാർജയുടെയും സി.പി.ടിയുടെയും സംരക്ഷണത്തിൽ കഴിയുകയായിരുന്നു കുട്ടികൾ. ഇവർ ഇന്ന് നാട്ടിലേക്ക്​ പറക്കും. വിസയുടെ കാലാവധി തീർന്ന്​ വർഷങ്ങൾ കഴിഞ്ഞതിനാൽ രണ്ട് കുട്ടികൾക്കുമായി വന്നുചേർന്ന 1,67,000 ദിർഹം ദുബൈ എമിഗ്രേഷൻ വകുപ്പ്​ ഒഴിവാക്കിനൽകിയിരുന്നു. നഷ്​ടപ്പെട്ടതും അവധികഴിഞ്ഞതുമായ പാസ്​പോർട്ടുകൾക്ക് പകരം ദുബൈ കോൺസുലേറ്റ് എമർജൻസി പാസ്​പോർട്ടുകൾ നൽകി. കുട്ടികളെ തട്ടിക്കൊണ്ടു പോയെന്ന് ചൈൽഡ് ലൈനിലും വിവിധ പൊലീസ് സ്​റ്റേഷനുകളിലും കുട്ടികളുടെ പിതാവ് ചൈൽഡ് പ്രൊട്ടക്​ട്​ ടീമിലെ സന്നദ്ധപ്രവർത്തകർക്കെതിരെ നൽകിയ കേസുകൾ അടിസ്ഥാനരഹിതമാണെന്ന് ബോധ്യപ്പെട്ടതിനാൽ ഒഴിവാക്കി​.

അതോടൊപ്പം തന്നെ നാട്ടിലെത്തി മാതാവിനൊപ്പം ജീവിക്കണമെന്നും പഠനം പൂർത്തിയാക്കണമെന്നുമാണ്​ ഇരുവരുടെയും ആഗ്രഹം. കൂടാതെ മൂത്തയാൾക്ക്​ യു.എ.ഇയിൽതന്നെ തിരിച്ചെത്തി പൊലീസാകണമെന്നാണ്​ ​ആഗ്രഹം. മികച്ച രീതിയിൽ ഖുർആൻ പാരായണം ചെയ്യുന്ന ഈ വിദ്യാർഥിക്ക്​ മതപഠനം പൂർത്തിയാക്കി പള്ളിയിൽ ഇമാം നിൽക്കാനും ആഗ്രഹമുണ്ട്​. മൃഗങ്ങളെ സ്​നേഹിക്കുന്ന രണ്ടാമന്​ വെറ്ററിനറി ഡോക്​ടറാകാനാണ്​ ആഗ്രഹം.

കുട്ടികളുടെ വാർത്ത പുറത്ത് വന്നതിന് പിന്നാലെ കുട്ടികളുടെ തുടർപഠനം പൂർണമായും നേരത്തെ സൗജന്യമായി കോഴിക്കോട് മർകസ് ഏറ്റെടുത്തിരുന്നു. ഇന്ന് രാത്രി 11.50ന് ദുബൈയിൽനിന്ന്​ തിരുവനന്തപുരത്തേക്കുള്ള എയർ ഇന്ത്യ എക്​സ്​പ്രസ്​ വിമാനത്തിൽ കുട്ടികൾ പുറപ്പെടുമെന്ന്​ ചൈൽഡ് പ്രൊട്ടക്​ട്​ ടീം സംസ്ഥാന എക്​സിക്യൂട്ടിവ് അംഗം മഹമൂദ് പറക്കാട്ട്, സി.പി.ടി യു.എ.ഇ പ്രസിഡൻറ്​ നാസർ ഒളകര, സെക്രട്ടറി ഷഫീൽ കണ്ണൂർ എന്നിവർ വാർത്തസമ്മേളനത്തിൽ അറിയിച്ചു. തിരുവനന്തപുരം വിമാനത്താവളത്തിൽ ചൈൽഡ് പ്രൊട്ടക്​ട്​ ടീം സംസ്ഥാന വൈസ് പ്രസിഡൻറ്​ ശാന്തകുമാറി​െൻറ നേതൃത്വത്തിൽ കുട്ടികളെ സ്വീകരിച്ച്​ മാതാവിന് കൈമാറുന്നതാണ്.