താമസവിസയ്ക്ക് പുറമെ സന്ദർശക വിസയും ഒരുങ്ങുന്നു; ദുബായിലേക്ക് സന്ദർശക വിസക്കാർക്കും വരാൻ വൈകാതെ അവസരമൊരുങ്ങിയേക്കുമെന്ന് അധികൃതർ, എല്ലാ സന്ദർശകരെയും യു.എ.ഇയിലേക്ക് സ്വാഗതം ചെയ്യുന്നതായി ദുരന്തനിവാരണ സമിതി
യുഎഇയുടെ വിലക്ക് പ്രവാസികളെ കൂടുതൽ പ്രതികൂലമായി ബാധിച്ചിരുന്നു. അങ്ങനെ മൂന്ന് മാസമായി തുടർന്ന യുഎഇയുടെ വിലക്ക് കഴിഞ്ഞ കുറച്ച് ദിവസങ്ങൾക്ക് മുമ്പാണ് നീക്കിയത്. എന്നാൽ പൂർണമായും വാക്സിൻ സ്വീകരിച്ച താമസവിസക്കാർക്ക് മാത്രമാണ് അവസരം നൽകിയിരിക്കുന്നത്. ഇതിലൂടെ നിരവധി പ്രവാസികൾ വീണ്ടും വെട്ടിലാവുകയായിരുന്നു. എന്നാലിതാ ഏറെ ആശ്വാസം പകരുന്ന തീരുമാനം പങ്കുവച്ച് അധികൃതർ രംഗത്ത് എത്തിയിരിക്കുകയാണ്...
താമസവിസക്കാർക്ക് പുറമെ ദുബായിലേക്ക് സന്ദർശക വിസക്കാർക്കും വരാൻ വൈകാതെ അവസരമൊരുങ്ങിയേക്കുമെന്ന റിപ്പോർട്ടുകളാണ് പുറത്ത് വരുന്നത്. ടൂറിസ്റ്റ് വിസക്കാർക്ക് ദുബായിലേക്ക് വരാം എന്ന് എമിറേറ്റ്സിന്റെ വെബ്സൈറ്റിലൂടെ അറിയിച്ചിട്ടുണ്ട്. എന്നാൽ, എന്ന് മുതൽ വരാമെന്നോ ഇന്ത്യക്കാർക്ക് വരാൻ കഴിയുമോ എന്നോ ഇതിൽ വ്യക്തമാക്കിയിട്ടില്ല.
എന്നാൽ റസിഡൻറ് വിസക്കാർക്ക് ബാധകമായ നിബന്ധനകൾ ടൂറിസ്റ്റ് വിസക്കാർക്കും ബാധകമായിരിക്കുമെന്നും അറിയിപ്പിൽ പറയുന്നുണ്ട്. ഇത് ശുഭസൂചനയാണെന്നാണ് പൊതുവെയുള്ള വിലയിരുത്തൽ. എല്ലാ സന്ദർശകരെയും യു.എ.ഇയിലേക്ക് സ്വാഗതം ചെയ്യുന്നതായി കഴിഞ്ഞ ദിവസം ദുരന്തനിവാരണ സമിതിയും അറിയിക്കുകയുണ്ടായി.
അങ്ങനെ കാലാവധി കഴിഞ്ഞ താമസവിസക്കാർക്കും പ്രവേശനം അനുവദിച്ചതോടെ സന്ദർശകവിസക്കാരും വളരെ ഏറെ പ്രതീക്ഷയിലാണ്. എക്സ്പോ 2020 തുടങ്ങാനിരിക്കെ ജോലി അവസരങ്ങൾ തേടി യുഎഇയിലെത്താൻ കാത്ത് ലക്ഷങ്ങൾ നാട്ടിൽ കഴിയുകയാണ്. സന്ദർശക വിസക്കാർക്ക് അനുമതി നൽകിയാൽ മാത്രമേ ഇവർക്ക് യു.എ.ഇയിലേക്ക് എത്താൻ സാധിക്കുകയുള്ളു.
അതേസമയം ദുബായിൽ കോവിഡ്19 സുരക്ഷാ മാനദണ്ഡങ്ങളിൽ ഇളവുകൾ പ്രഖ്യാപിച്ചിരിക്കുകയാണ്. ഹോട്ടലുകൾ, റസ്റ്ററന്റുകൾ, കഫെകൾ, വിവാഹം തുടങ്ങിയ ചടങ്ങുകൾ നടക്കുന്ന ഹാൾ എന്നിവയിൽ പങ്കെടുക്കാവുന്ന ആളുകളുടെ എണ്ണം വർധിപ്പിക്കുകയുണ്ടായി. കഴിഞ്ഞ ദിവസം മുതൽ പുതിയ മാനദണ്ഡം നിലവിൽ വന്നു. ഹോട്ടലുകളിൽ പൂർണതോതിൽ ആളുകളെ പ്രവേശിപ്പിക്കാമെന്ന് ദുബായ് വിനോദ സഞ്ചാര വാണിജ്യ വിപണന വകുപ്പ് പുറത്തിറക്കിയ സർക്കുലറിൽ വ്യക്തമാക്കുകയുണ്ടായി.
https://www.facebook.com/Malayalivartha