യുഎഇയിൽ നിന്ന് നാട്ടിലേക്ക് പ്രവാസികളുടെ വമ്പൻ തിരക്ക്; നാട്ടിലേക്ക് പോയാല് തിരികെ വരാന് പ്രയാസമുണ്ടാവില്ലെന്ന് ബോധ്യമായതോടെ പ്രവാസികളുടെ കുത്തൊഴുക്ക്, ടിക്കറ്റ് നിരക്ക് കുതിച്ചുയർന്നു
വിലക്കുകൾ ഒന്നൊന്നായി നീങ്ങുമ്പോൾ പ്രവാസികൾക്ക് ആശ്വാസം ഏറുകയാണ്. ഇപ്പോഴിതാ ഇന്ത്യ ഉള്പ്പെടെ യാത്രാ വിലക്കുള്ള രാജ്യങ്ങളില് നിന്ന് നേരിട്ടുള്ള വിമാന സര്വീസുകള്ക്ക് യുഎഇ അനുമതി നല്കിയിരിക്കുകയാണ്. ഇതോടെ നാട്ടില് കുടുങ്ങിക്കഴിയുകയായിരുന്ന പ്രവാസികളുടെ കുത്തൊഴുക്കാണ് വിവിധ എമിറേറ്റുകളിലേക്ക് കഴിഞ്ഞ ഏതാനും ദിവസങ്ങളിലായി അനുഭവപ്പെടുന്നത്.
എന്നാല്, ജോലി ആവശ്യാര്ഥവും മറ്റും യുഎഇയിലേക്ക് തിരിക്കുന്നവരെ പോലെ തന്നെ ഉറ്റവരെയും ഉടയവരെയും കാണാനും മറ്റ് ആവശ്യങ്ങള്ക്കുമായി യുഎഇയില് നിന്ന് നാട്ടിലേക്ക് തിരിക്കുന്ന ഇന്ത്യന് പ്രവാസികളുടെ എണ്ണവും അനുദിനം വര്ധിച്ചുവരുന്നതായാണ് റിപ്പോർട്ടുകൾ വ്യക്തമാക്കുന്നത്.
നാട്ടിലേക്ക് പോയാല് തിരികെ വരാന് പ്രയാസമുണ്ടാവില്ലെന്ന് ബോധ്യമായതോടെയാണ് ഇതു പേടിച്ച് നാട്ടിലേക്ക് വരാന് മടിച്ചവര് ഇപ്പോള് കൂട്ടത്തോടെ യാത്രയ്ക്കായി ഒരുങ്ങുന്നത്. നാട്ടിലേക്കുള്ള ലഭ്യമായ ആദ്യ വിമാനത്തില് തന്നെ ടിക്കറ്റ് തരപ്പെടുത്താനുള്ള നെട്ടോട്ടത്തിലാണ് പ്രവാസികള് ഏവരും. വേനലവധിക്ക് നാട്ടിലേക്ക് വരാതെ യുഎഇയില് തന്നെ തങ്ങിയവരാണ് ഇവരില് പലരും. നാട്ടിലേക്ക് പോയാല് തിരിച്ചുവരാനാവാതെ നാട്ടില് കുടുങ്ങിപ്പോവുമോ എന്ന ആശങ്കയില് യുഎഇയില് തന്നെ നിൽക്കുകയായിരുന്നു. എന്നാല് കഴിഞ്ഞ ആഴ്ച മുതല് ഇക്കാര്യത്തില് തീരുമാനം വന്നതോടെ നാട്ടിലേക്ക് തിരിക്കാന് ഇവര് തീരുമാനിക്കുകയായിരുന്നു.
കൂടാതെ യാത്ര ചെയ്യാന് വാക്സിനേഷന് നിര്ബന്ധമില്ലാത്ത ദുബായില് നിന്നാണ് കൂടുതല് പേരും നാട്ടിലേക്ക് തിരിക്കുന്നത്. അങ്ങനെ കൊവിഷീല്ഡ് വാക്സിനെടുത്തവര്ക്ക് മറ്റ് എമിറേറ്റുകളിലേക്ക് യാത്ര ചെയ്യാമെന്നായതോടെ നാട്ടില് വന്ന ശേഷം വാക്സിനെടുത്ത് തിരിച്ചു പോവാമെന്ന കണക്കുകൂട്ടലില് അവിടെ നിന്നുള്ള പ്രവാസികളും നാട്ടിലേക്ക് യാത്ര തിരിക്കുകയാണ്. നിലവില് ഇന്ത്യയിലേക്ക് ടിക്കറ്റുകള് കിട്ടാനില്ലാത്ത സ്ഥിതിയാണ്. ആവശ്യക്കാര് ഏറിയതോടെ ടിക്കറ്റ് നിരക്കും കുതിച്ചുയര്ന്നിട്ടുണ്ട്.
https://www.facebook.com/Malayalivartha