കാരുണ്യത്തിന്റെ കരം നീട്ടിയ പ്രവാസികളെ തേടി ദുബായ് ഭരണാധികാരി ഷെയ്ഖ് മുഹമ്മദ്. ഗര്‍ഭിണിയായ പൂച്ചയുടെ ജീവന്‍ രക്ഷിച്ച പ്രവാസികൾക്ക് 10 ലക്ഷം ഉപഹാരം നല്‍കി ദുബായ് ഭരണാധികാരിയുടെ മാസ്സ് നീക്കം. ദുബായ് ദേരയില്‍ കെട്ടിടത്തിന്റെ ബാല്‍ക്കണിയില്‍നിന്ന് താഴേക്കു വീണ ഗര്‍ഭിണിയായ പൂച്ചയെ പുതപ്പ് വിരിച്ച്‌ രക്ഷിച്ചതിനെ യു.എ.ഇ. വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം കഴിഞ്ഞ ദിവസം ട്വിറ്ററിലൂടെ അഭിനന്ദിച്ചിരുന്നു.

‘ഞങ്ങളുടെ മനോഹര നഗരത്തിലെ അനുകമ്ബയുള്ള പ്രവൃത്തി, ഇവരെ തിരിച്ചറിയുന്നവര്‍ അഭിനന്ദനങ്ങള്‍ നല്‍കാനായി ഞങ്ങളെ സഹായിക്കുക’ എന്ന് ഷെയ്ഖ് മുഹമ്മദ് പൂച്ചയെ രക്ഷപ്പെടുത്തുന്ന ദൃശ്യം പങ്കുവെച്ചുകൊണ്ട് ട്വീറ്റ് ചെയ്യുകയായിരുന്നു .

അതേസമയം നാദാപുരം പുറമേരി സ്വദേശി മുഹമ്മദ് റാഷിദാണ് വിഡിയോ പകര്‍ത്തി ഇന്‍സ്റ്റഗ്രാമില്‍ പങ്കുവെച്ചത്. നാസര്‍ ശിഹാബാണ് തുണി വിരിച്ച്‌ പൂച്ചയെ രക്ഷപ്പെടുത്തിയ സംഘത്തിൽ ഉൾപ്പെട്ടിരുന്നത്. ഈ രണ്ട് മലയാളികള്‍ അടക്കം ഒരു പാകിസ്താനിയ്ക്കും ഒരു മൊറോക്കന്‍ സ്വദേശിക്കുമാണ് 50,000 ദിര്‍ഹം വീതം ഷെയ്ഖ് മുഹമ്മദ് സമ്മാനിച്ചത് .

അതോടൊപ്പം തന്നെ പാടിപുകഴ്ത്താത്ത അനേകം വീരന്‍മാര്‍ നമുക്കിടയിലുണ്ടെന്ന് ചൂണ്ടിക്കാട്ടിയായിരുന്നു ദുബായ് ഭരണാധികാരി മലയാളികള്‍ ഉള്‍പ്പെടെയുള്ള നാലു പേരുടെ നന്‍മ സ്വന്തം ട്വിറ്ററില്‍ പങ്കുവെച്ചത്.