പ്രവാസികൾക്ക് മുന്നറിയിപ്പുമായി ഗൾഫ് രാഷ്ട്രം. വിലക്കുകൾ നീങ്ങിയതോടെ നിബന്ധനകളിൽ മാറ്റം വരുത്തി. വിദേശ രാജ്യങ്ങളില്‍ നിന്നെത്തുന്ന യാത്രക്കാര്‍ക്കുള്ള പ്രവേശന മാനദണ്ഡങ്ങളില്‍ മാറ്റങ്ങള്‍ വരുത്തി ബഹ്റൈന്‍ രംഗത്ത്. കൊവിഡ് പ്രതിരോധത്തിനായുള്ള പ്രത്യേക ടാസ്‌ക് ഫോഴിസിന്റെ നിര്‍ദ്ദേശങ്ങള്‍ പ്രകാരം ബഹ്റൈന്‍ സിവില്‍ ഏവിയേഷന്‍ അതോറിറ്റിയാണ് പുതിയ മാറ്റങ്ങള്‍ പ്രഖ്യാപിച്ചുകൊണ്ടുള്ള ഉത്തരവ് ഇറക്കിയത്. ഇതു പ്രകാരം, ഓഗസ്റ്റ് 29 ഞായറാഴ്ച മുതല്‍ പ്രവേശന മാനദണ്ഡങ്ങളില്‍ ഇനിപറയുന്ന മാറ്റങ്ങള്‍ നിലവില്‍ വരുന്നതാണ്.

- ഓണ്‍ അറൈവല്‍ വിസയില്‍ ആളുകള്‍ക്ക് വരാന്‍ അര്‍ഹതയുള്ള രാജ്യങ്ങളില്‍ നിന്നുള്ള പൗരന്മാര്‍ക്ക്, സ്വന്തം നാട്ടില്‍ നിന്ന് കൊവിഡ് വാക്‌സിനേഷന്‍ സ്വീകരിച്ചതിന്റെ സര്‍ട്ടിഫിക്കറ്റ് ഉപയോഗിച്ച് ബഹ്‌റൈനിലേക്ക് പ്രവേശിക്കാൻ സാധിക്കും.

- വിമാനം കയറുന്നതിന് 72 മണിക്കൂറിനുള്ളില്‍ എടുത്ത പിസിആര്‍ ടെസ്റ്റിലെ നെഗറ്റീവ് സര്‍ട്ടിഫിക്കറ്റ് കരുതിയിരിക്കണം.

- ഇവര്‍ ബഹ്റൈന്‍ വിമാനത്താവളത്തില്‍ എത്തിയ ഉടനെയും, അതിനു ശേഷം അഞ്ചാം ദിവസവും പത്താം ദിവസവും പിസിആര്‍ പരിശോധന നടത്തിയ കൊവിഡ് നെഗറ്റീവാണെന്ന് ഉറപ്പുവരുത്തണം.

- എന്നാൽ ഈ രാജ്യങ്ങളില്‍ നിന്നെത്തുന്നവര്‍ക്ക് വീട്ടിലോ ഹോട്ടലിലോ ക്വാറന്റൈന്‍ ആവശ്യമില്ല.

- യാത്ര ചെയ്യുന്നതിന് മുമ്പ് www.evisa.gov.bh എന്ന വെബ്‌സൈറ്റില്‍ നിന്ന് ബഹ്‌റൈനില്‍ ഓണ്‍ അറൈവല്‍ വിസ അര്‍ഹതയുള്ള രാജ്യമാണോ എന്ന് പരിശോധിച്ച് ഉറപ്പുവരുത്തേണ്ടതാണ്.

​റെഡ് ലിസ്റ്റ് രാജ്യങ്ങളില്‍ നിന്നുള്ളവരുടെ ശ്രദ്ധയ്ക്ക്...

- ഇന്ത്യ ഉള്‍പ്പെടെ റെഡ് ലിസ്റ്റ് രാജ്യങ്ങളില്‍ നിന്നുള്ളവരും വാക്‌സിന്‍ എടുക്കാതെ വരുന്നവരും പിസിആര്‍ ടെസ്റ്റിലെ നെഗറ്റീവ് സര്‍ട്ടിഫിക്കറ്റില്‍ ക്യുആര്‍ കോഡ് സംവിധാനം ഉണ്ടെന്ന് ഉറപ്പുവരുത്തേണ്ടതാണ്. കൂടാതെ, 48 മണിക്കൂറിനകം ടെസ്റ്റ് നടത്തിയതായിരിക്കണം.

- ഇവര്‍ ബഹ്‌റൈനിലെത്തിയ ശേഷം സ്വന്തം വീട്ടിലോ നാഷനല്‍ ഹെല്‍ത്ത് റെഗുലേറ്ററി അതോറിറ്റിയുടെ കീഴിലുള്ള ഹോട്ടലിലോ 10 ദിവസം ക്വാറന്റൈനില്‍ കഴിയേണ്ടതാണ്.

- ബഹ്റൈന്‍ വിമാനത്താവളത്തില്‍ എത്തിയ ഉടനെയും, അതിനു ശേഷം ക്വാറന്റൈനില്‍ കഴിയുന്ന അഞ്ചാം ദിവസവും പത്താം ദിവസവും പിസിആര്‍ പരിശോധന നടത്തിയ കൊവിഡ് നെഗറ്റീവാണെന്ന് ഉറപ്പുവരുത്തണം.

- ആറ് വയസ്സിന് താഴെയുള്ളവര്‍ക്ക് ടെസ്റ്റ് നിബന്ധന ബാധകമല്ല.