എയർ ബബ്ൾ വിമാന സർവിസുകൾ വർധിപ്പിക്കുവനൊരുങ്ങി ഇന്ത്യയും ബഹ്റൈനും. എയർലൈൻസുകൾ പുതിയ സർവിസുകൾക്കുള്ള ബുക്കിങ് തുടങ്ങിക്കഴിഞ്ഞു. സെപ്റ്റംബർ 15 മുതൽ വിമാന സര്‍വീസുകള്‍ ആരംഭിക്കുവാനാണ് സാധ്യത. ദിവസവും രണ്ട് സർവിസുകൾ വീതം ഉണ്ടാകും.

ഡൽഹിയിൽ നിന്ന് ബഹ്റൈനിലേക്ക് എയർ ഇന്ത്യ/എയർ ഇന്ത്യ എക്സ്പ്രസ് ആഴ്ചയിൽ രണ്ട് സർവിസാണ് നടത്തിയിരുന്നത്. എന്നാൽ ഇനി മുതൽ നാല് സര്‍വീസ് നടത്തും. ഒരു സർവിസ് മാത്രമാണ് ഹൈദരാബാദിൽ നിന്ന് നടത്തിയിരുന്നത്. ഇനി മുതല്‍ രണ്ട് സര്‍വീസ് നടത്തും.

ബംഗളൂരുവിൽ നിന്ന് കൊച്ചി വഴി ബഹ്റൈനിലേക്ക് സർവീസുകൾ തുടങ്ങി. ഈ സര്‍വീസ് നടത്തുന്നത് ബുധൻ, വ്യാഴം ദിവസങ്ങളിലാണ്.മാസത്തിൽ രണ്ട് സർവിസ് ആണ് ബഹ്റൈനിൽ നിന്ന് കോഴിക്കോട് വഴി മുംബൈയിലേക്ക് ഉണ്ടായിരുന്നത്. ഇത് ആഴ്ചയിൽ രണ്ട് സര്‍വീസ് എന്ന നിലയില്‍ ഇനിമുതൽ ക്രമീകരിക്കപ്പെടുന്നു.

വ്യാഴം, ഞായർ ദിവസങ്ങളിലായിരിക്കും ഈ സര്‍വീസ് നടത്തുന്നത്. മുബൈയിൽ നിന്ന് ബഹ്റൈനിലേക്ക് നേരിട്ട് സര്‍വീസ് ഉണ്ടായിരിക്കും. എന്നാൽ കേരളത്തില്‍ നിന്നുള്ള യാത്രക്കാര്‍ക്ക് വിമാന സർവിസ് ഇരട്ടിയാക്കുന്നത് ഉപകാരപ്രദമാകില്ല. എയർ ഇന്ത്യ ബംഗളൂരുവിൽ നിന്ന് കൊച്ചി വഴിയുള്ള സർവിസ് ആരംഭിച്ചതുമാത്രമാണ് മലയാളികൾക്ക് ആകെ ആശ്വാസം.

തിരുവനന്തപുരം, കോഴിക്കോട്, കണ്ണൂർ എന്നിവിടങ്ങളില്‍ നിന്ന് ഒന്നും അധിക സര്‍വീസ് ഇതുവരെയും തുടങ്ങിയിട്ടില്ല. തിരുവനന്തപുരത്തുനിന്ന് അധിക സർവീസ് നടത്തുന്നതിനുള്ള ശ്രമങ്ങൾ നടക്കുന്നെണ്ടെന്ന റിപ്പോർട്ടുകൾ പുറത്തുവരുന്നുണ്ട്. എയർ ഇന്ത്യ ഇപ്പോൾ പ്രഖ്യാപിച്ചിരിക്കുന്നത് ഒക്ടോബർ 30 വരെയുള്ള ഷെഡ്യൂളാണ്.

ഗൾഫ് എയർ തിരുവനന്തപുരത്തു നിന്ന് ഒരു സര്‍വീസ് ആണ് നടത്തിയിരുന്നതെങ്കില്‍ ഇനി മുതല്‍ രണ്ട് സര്‍വീസ് നടത്തും. ചൊവ്വ, ശനി ദിവസങ്ങളിൽ സര്‍വീസ് നടത്തുവാനാണ് പദ്ധതി . കൊച്ചിയിൽ നിന്ന് ഗള്‍ഫ് എയര്‍ രണ്ട് സര്‍വീസ് നടത്തും .

കോഴിക്കോട് നിന്നുള്ള സർവിസിൽ വർധന വന്നിട്ടില്ല. മുംബൈ, ഡൽഹി എന്നിവിടങ്ങളിൽനിന്നും രണ്ട് സര്‍വീസും, ബെംഗളൂരു, ഹൈദരാബാദ് എന്നിവിടങ്ങളിൽനിന്ന് പുതിയ സർവിസ് ഇതിനോടകം തുടങ്ങിക്കഴിഞ്ഞു.എയർ ബബ്ൾ പ്രകാരമുള്ള വിമാന സർവിസ് ആരംഭിച്ചത്
കഴിഞ്ഞ വർഷം സെപ്റ്റംബർ 13നാണ്.

ഗൾഫ് എയറിനും എയർ ഇന്ത്യ/എയർ ഇന്ത്യ എക്സ്പ്രസിനും ഒരോ ദിവസവും ഒരു സര്‍വീസ് നടത്താന്‍ ആയിരുന്നു അനുമതി ഉണ്ടായിരുന്നത്. എന്നാൽ ഇപ്പോള്‍ അത് വര്‍ദ്ധിപ്പിച്ചിരിക്കുകയാണ് തുടക്കത്തിൽ ആഴ്ചയിൽ 650 യാത്രക്കാരെ കൊണ്ടുവരാൻ അനുവദിച്ചിരുന്നു .

പക്ഷേ പിന്നീട് ഇത് ഉയര്‍ത്തി. ഇപ്പോൾ ആഴ്ചയിൽ 1100 യാത്രക്കാരെ കൊണ്ടുവരാൻ കഴിയും. കൂടുതൽ സർവീസുകൾക്ക് തുടക്കമിടുന്നതോടെ ഇന്ത്യയിൽനിന്ന് ബഹ്റൈനിലേക്ക് പോകാന്‍ ആഗ്രഹിക്കുന്ന പ്രവാസികൾക്ക് വാതിലുകൾ തുറക്കപ്പെടുകയാണ്.